Read gen Èhàwo 37 Bible Online

Èhàwo 37 - gen bible

Èhàwo 37

¹David tɔ̀. Mù gbà do àdɔ̀mèze ɖo àmè bàɖà ŋuti ò. Mù gbà hùãŋu ènudrãwɔ̀tɔ ò.

²Wo la yrɔ̀ kaba sìgbè àmà nène, wo la pu sìgbè ègbewo nène.

³Dojì ɖo Tɔhonɔ̀ ŋuti, ne wòa wɔ̀ ènu kè nyɔa kpò; Eŋuã, wò la nɔ̀ ànyigbã ji lè ŋuti fàfa mè.

⁴Kpɔ jìjɔɛ lè Tɔhonɔ̀ mè, e la na wò ènu kè wò le jia.

⁵Sɔ àgbè wòa do àsi na Tɔhonɔ̀. Dojì ɖo e ŋuti eye e la wɔ̀ kè jèa.

⁶E la ɖè àpo èɖemànya fiɔ, sìgbè ŋùkèkè be kɛ̃klɛ̃ nène, kudo àpo jɔ̀jɔɛsòso, sìgbè dɔ̃ŋùkusu jàse nène.

⁷Bɔ̀nu kpoo lè Tɔhonɔ̀ be ŋùkɔ̀, ne wòa kpɔ e sinu. Mù gbà bijì ɖo àmè kè le ɖùjia ŋuti ò, ɖo àmè kè le wɔ̀ ènu drã ŋuti ò.

⁸Ɖè àsi lè èjìbibi ŋuti, èjì mu gbà ku wò ò. Tàsi àdɔ̀mèze, gbledo kpò e hɛ̃nà va.

⁹Ɛ̃ɛ, wo la tutu vuɛ̃wɔ̀tɔwo jo. Eye àmè kèwo le nɔ̀tè kpɔ Tɔhonɔ̀ sinua, la ɖù ànyigbã be ècrɔ̃.

¹⁰E kpɔ̀tɔ̀ viɖe ye àmènyrãkuwo la dɛ̃. Eye ne wò ɖè èkɔ̀ kpɔ fikè wo nɔ̀ sãa, wò mu la gbà kpɔ àmè ɖe ò.

¹¹Vɔ̀a, hòmèfanɔ̀wo ye la nɔ̀ ànyigbã ji. Eye wo la nɔ̀ ànyi lè ŋuti fàfa blibo mè.

¹²Àmè bàɖàa, nɔ̀nà àjòha mè na àmè kè le wɔ̀ ɖo Tɔhonɔ̀ be èjro jia, eye e ɖùnà àɖuklui ɖo e ŋuti cã.

¹³Vɔ̀a, Tɔhonɔ̀ kònà àmè bàɖà, ɖo e le kpɔ yebe kòjoɖoɖo zãa gbãnà.

¹⁴Àmè bàɖàwo lìɔ woabe èwui to lè àku mè. Wo jrà woabe àŋùdàtiwo ɖo, ne woa sɔ te ènuwɔ̀donɔ̀ ku wɔ̀amènɔ̀wo pu ànyi. Ne woa wù àmè kè lè èmɔ̃ nyuɛ̃a jia.

¹⁵Vɔ̀a, woabe èwuia la trɔ̃ woa ŋutɔwo be èjì eye woabe àŋùdàtia la ŋɛ̃.

¹⁶Àmè kè le sètonu na Mawu a be èhiã nyɔ wu àmè bàɖà be ènunɔ̀amèsi.

¹⁷Ɛ̃ɛ, àmè bàɖà be ŋusɛ̃a nu la ci kplò. Tɔhonɔ̀ la do ŋusɛ̃ àmè kè sènà ètonu na ɛ̀a.

¹⁸Tɔhonɔ̀ nya ànùkuamèwo be ŋùkèkèwo, eye woabe ècrɔ̃-nyigbã la nɔ̀ ànyi kaka sɔyì.

¹⁹Èŋù mu la kpɛ̃ wo lè nyrãdo be gàmè ò; eye lè àdɔ̀toto be hùenua, ènu la sù woa si.

²⁰Ɛ̃ɛ, àmè bàɖàa la ku. Tɔhonɔ̀ be kɛ̃tɔwo la pu sìgbè àvemè be ègbe nène. Wo la fiɔ̃, wo la fiɔ̃ ɖiwa lè àzìzɔ mè.

²¹Ne àmè bàɖà donu lè àmè sia, mu trɔ ɛ̀ va na ò. Vɔ̀a, àmè kè sènà ètonu na Mawu a, vena àmè nu eye e mana ènu kudo àmè fàa.

²²Àmè kèwo Tɔhonɔ̀ tu sì na a tɔ̀ ye le nyi ànyigbã; Wo la crɔ̃ àmè kèwo e sɛ̃kpɛ̃ na a wo.

²³Ne àmè ɖe be wɔ̀na jè Tɔhonɔ̀ tɔ̀ jia, Tɔhonɔ̀ nana yebe àfɔ̀ ɖèɖè linakè goŋu-goŋu.

²⁴Ne e gbà klɛ̃ àfɔ̀ cã a, mu la jè ànyi ò, ɖo Tɔhonɔ̀ le è ɖo àsi.

²⁵Mù nɔ̀ ɖèkajɛ mè sãa, fifìa mù sĩ. Vɔ̀a, nyè mu kpɔ kpɔ be Mawu ɖènà èkɔ̀ lè àmè kè le sètonu na ɛ̀a ŋuti ò. Nyè mu kpɔ kpɔ be yebe viwo cã biɔ ènu ɖù kpɔ ò.

²⁶E kuna ŋuzĩzĩ na àmè wè sia wè, gbà dona ènu na àmè eye sìtu lè èviawo ji.

²⁷Ɖè àsi lè èvuɛ̃ ŋuti, ne wòa wɔ̀ nyuɛ̃. Eye wò la nɔ̀ àgbè kaka sɔyì.

²⁸Ɛ̃ɛ, Tɔhonɔ̀ lɔ̃nà àmè kè lè jɔ̀jɔɛa. Mu ɖènà èkɔ̀ lè yebe ànùkuamèwo ŋuti ò. E kpɔna woa ji tɛ̀gbɛ̀. Vɔ̀, e la ɖè àmè bàɖà be èviwo jo.

²⁹Àmè kèwo sènà ètonu na Mawu a tɔ̀ ye la nyi ànyigbã a, wo la ɖù yebe ècrɔ̃ tɛ̀gbɛ̀.

³⁰Àmè kè le sètonu na Mawu a, pònànu ènunyatɔ̀. Ènyà jɔ̀jɔɛ ye tona so yebe ènu mè.

³¹Yebe Mawu be èsea lè èjì mè na ɛ̀, mu la ɖiɖi lè yebe àfɔ̀ ɖèɖe ɖekpe mè ò.

³²Àmè bàɖà dona èxa na àmè kè le sètonu na Mawu a, sɔ nɔ ji yebe èku kpò.

³³Vɔ̀a, Tɔhonɔ̀ mu la ɖè àsi lè e ŋuti na ɛ̀ ò. Ne e yì kòjo mè cã a, mu la na wo la gblehùɛ do è ò.

³⁴Nɔ̀tè kpɔ Tɔhonɔ̀ sinu, le ŋùku ɖo yebe èmɔ̃a ŋuti. E la ɖo wò gã ɖe ne ànyigbã ji nɔ̀nɔ eye wò la kpɔ àlekè wo la crɔ̃ àmè bàɖàwo ɖoa.

³⁵Mù kpɔ àmè bàɖà trɔ zũ àmè ɖo ŋusɛ̃ gã ɖe. Àfɔ̀ sù ànyigbã na ɛ̀ eye e vũ sìgbè Libàn be sedàtiwo nène.

³⁶Co, e yì ɖiwa. Mu gbà lè ò. Mù ji ì, vɔ̀ nyè mu teŋu gbà kpɔ ɛ̀ ò.

³⁷Le ŋùku ɖo àmèjɔ̀jɔɛa ŋuti, ne wòa kpɔ ànùkuamè a ɖa! Àmè kè lɔ̃nà ŋuti fàfa la nɔ̀ àgbè tɛ̀gbɛ̀.

³⁸Co, wo la crɔ̃ vuɛ̃wɔ̀tɔwo kpata. Wo la gbà gũta na àmè bàɖà be èviwo keŋu.

³⁹Tɔhonɔ̀ hlùɛ̃nà àmè kè sènà ètonu na ɛ̀a gã. E cɔ̃na e ji kudo ŋusɛ̃ lè nyrãdo be gàmè.

⁴⁰Tɔhonɔ̀ la kpe ɖo e ŋuti, la gbà hlùɛ̃ ɛ̀ gã. E la xɔ̀ ɛ̀ lè àmè bàɖà simè, gbà la hlùɛ̃ ɛ̀ gã, ɖo e dojì ɖo Tɔhonɔ̀ ŋuti.