Read gen Èhàwo 40 Bible Online

Èhàwo 40 - gen bible

Èhàwo 40

¹David be Èhà kè wo ɖè lè hàsìnɔ̀ gãa be xoma mè.

²Mù sɔ ŋùɖo nyèa kpata dà ɖo Tɔhonɔ̀ ji: E bɔ̀bɔ̀ èto ɖo ji nyè, e sè àpe àvigbea.

³E ɖè mù to lè ègũ tito mè, so bàba kpɛ̃tɛ̃ mè. E li àpe àfɔ̀wo ɖo àkpã ji, gbà le àzɔ̃lì nyèa ɖotè.

⁴E sɔ èhà yeye do ènu mè na mù, na miabe Mawu ŋutɔ be kàfù kafu. Àmè fuu la kpɔ ekèa, wo la sɔ bùbu kè jèa na Tɔhonɔ̀ eye wo la dojì ɖo e ŋuti.

⁵Jɛ̀jrɛ̀ na àmè kè sɔ yebe ŋùɖo ɖo Tɔhonɔ̀ jia. Mu kplɔ̀nà ègòyitɔwo do, kaka la do èha kudo àjèɖàtɔwo ò.

⁶Tɔhonɔ̀ Mawu, wò ɖè sùsu àdodoe ku ŋùdãdɔ kèwo àmè ɖe mu la teŋu wɔ̀ òa, na mi. Mù jro la kɔ ègbè yì ji la gblɔ̃ ɛ̀, gbà gblɔ̃ ɛ̀ ke. Vɔ̀a, wo to gbɔ̃gblɔ̃ ŋuti.

⁷Wò na mù nya be wò mu ji vɔsa àlo ènunanawo ò. Wò mu biɔ ènumème vɔ̀sawo kaka jè èvuɛ̃ kèke vɔ̀sawo ji ò.

⁸Nène a ye mù gblɔ̃ be: “Kpɔɖa, mù gbãnà gbɔ wò. Mù kpɔ ènu kè mù ɖo la wɔ̀a, lè èse xoma a mè.”

⁹Mawu nyè, mù ji la wɔ̀ ènu kè jɔ̀nàjì na wòa. Èse wòa lè èjì mè ɖaa na mù.

¹⁰Àmèha gã dòmè, mù do àŋɛ̀ nyuɛ̃ kèa lè be: “Tɔhonɔ̀ ye nana vòvo.” Wò nya be nyè mu la gbe è gbɔ̃gblɔ̃ ò, Tɔhonɔ̀.

¹¹Wò na mù vò. Nyè mu la wla ɛ̀ ɖo àpe èjì mè ò. Eye mù gblɔ̃ be: “Ànùkua Tɔhonɔ̀ ye hlùɛ̃ mi gã”. Nyè mu la wla àpo lɔ̃lɔ̃ kudo àpo ànùkua lè àmèha gã be ŋùkɔ̀ ò.

¹²Tɔhonɔ̀, wò mu la gbe àpo àdɔ̀mè nyuɛ̃ wɔ̀wɔ na mù ò, àpo lɔ̃lɔ̃ kudo ànùkua la kpàsà mù do tɛ̀gbɛ̀.

¹³Ɛ̃ɛ, àhovì mà teŋu hlɛ̃wo pòhla do mù. Àgɔ̀jèje nyèwo cɔ̃ mù kaka nyè mu gbà teŋu le kpɔ ènu nyuɛ̃ ɖe ò. Wo sùgbɔ wu èɖà kè lè èta na mù a; eye mù gbɔjɔ keŋu-keŋu.

¹⁴Tɔ̀ wò jɔ̀ Tɔhonɔ̀, hlùɛ̃ mù gã. Tɔhonɔ̀ va xɔ̀ na mù kaba.

¹⁵Na ŋùkpɛ̃ ne le àmè kèwo le ji èvuɛ̃ na mù a. Nyà àmè kèwo le ji àpe èkua, ne bùbu ne dɛ̃ wo.

¹⁶Na ŋùkpɛ̃ ne bla ènu na àmè kèwo le ɖè àlɔmè lè ŋuti nyè be: “Ha! Ha! Ha!” Awo.

¹⁷Vɔ̀, àmè kèwo keŋu le ji wòa, wo ne ɖu jìjɔɛ be èwè ɖo àpo nyikɔ ŋuti. Àmè kèwo keŋu lɔ̃, èwò kè hlùɛ̃nà gãa, wo ne nɔ gblɔ̃ be: “Tɔhonɔ̀ lòlò”.

¹⁸Mù nyi ènuwɔ̀donɔ̀, gbà ci àgba co, Tɔhonɔ̀ ɖona ŋùku ji nyè. Wò nyi àpe àlɔ̀do, gbà nyi àpe hlùɛ̃gã. Mawu nyè, va kaba!