Read gen Èhàwo 41 Bible Online

Èhàwo 41 - gen bible

Èhàwo 41

¹David be Èhà kè wo ɖè lè hàsìnɔ̀ gãa be xoma mè.

²Sìtuɖèɖe ye nyi[8] na àmè kè dènà ŋùgblè so ènuwɔ̀donɔ̀wo ŋutia. Lè gbledo be gàmèa, Tɔhonɔ̀ la hlùɛ̃ ɛ̀ gã.

³Tɔhonɔ̀ la le è ɖo àgbè, e la tu sì na ɛ̀ lè ànyigbã ji. Mu la ɖè àsi lè e ŋuti na yebe kɛ̃tɔwo ò.

⁴Tɔhonɔ̀ la do è ŋusɛ̃ lè èdɔ̀-ba ji. E la lebè na ɛ̀ lè èdɔ̀ lele be hùenu.

⁵Mù gblɔ̃ be: “Tɔhonɔ̀, ku ŋuzĩzĩ na mù, dà èdɔ̀ na mù, ɖo mù jè àgɔ̀ do wò.”

⁶Kɛ̃tɔ nyèwo le pò nupo vuɛ̃ so ŋuti nyè gblɔ̃ be: “Gà kɛ mè ŋutɔ e la ku ne mia ŋlɔ̀be è gbidi ò?”

⁷Ne àmè ɖe va be yèa va ji mù kpɔa, e gblɔ̃nà àjèɖànyàwo. Eye e jrànà ènu gbegblewo ɖo yebe èjì mè. Ne e gbe trɔjo kpòa, e tɔna ɛ̀ jàjra na àmèwo.

⁸Àmè kèwo crì mù a, wo gblɔ̃nà àpe ènyà lè bèbe mè. Wo susuna ènu bàɖà ɖo ŋuti nyè be:

⁹“Èdɔ̀ vuɛ̃ ɖe ŋutɔ ye be yì lɔ! Fifì kè be ci tèpe ɖèkaa, mu la gbà teŋu sitè ke ò.”

¹⁰Nyàwo, èxlɔ̃ nyè veve ŋutɔ-ŋutɔ kè ŋuti mù dojì ɖo, kè ɖùnà ènu kudo mù a cã trɔ zũ àpe kɛ̃tɔ.

¹¹Vɔ̀ èwò, Tɔhonɔ̀, ku ŋuzĩzĩ na mù, ne wòa kɔ mù sitè. Nène a, mù la tu èfɛ̃ kè jèa na wo.

¹²Ne kɛ̃tɔ nyè be jiɖùɖu-paa, mu gbà le ɖì ɖo ŋuti nyè òa, eŋuã, mù la nya be wò mu ɖè ɖèka lè ji nyè ò.

¹³Lè gbɔ nyèa, wò le mù ɖotè, gbà na mù lãmèsɛ̃. Wò li mù màhuã-màhuã lè àpo ŋùkumè tɛ̀gbɛ̀.

¹⁴Jɛ̀jrɛ̀ na Tɔhonɔ̀, Izràɛl be Mawu so mà-vɔ yì mà-vɔ. Àmèn! Àmèn!