Read gen Èhàwo 44 Bible Online

Èhàwo 44 - gen bible

Èhàwo 44

¹Hàsìnɔ̀ gãa be Èhàlo. Koreà be èviwo be ènufiɔàmè-nya.

²Aò, Mawu, mia ŋutɔwo mi sè ku miabe ètowo. Mia tɔwo tùxo so ènu jɔ̀ àsu kè wò wɔ̀, lè woabe hùenu, lè blèmà hùenua, ŋuti na mi.

³Wò sɔ àpo àlɔ̀ nyà dùkɔ̃wo jo, eye wò sɔ mia tɔgbewo ɖo woa tèpe. Wò gbìdì dùkɔ̃wo, wò gbã wo, eye wò na dùkɔ̃ wòa vũvlũ.

⁴Mu nyi woabe èwuiwo ye wo sɔ ɖù ànyigbã ŋuawo ji ò. Mu nyi woabe àbɔwo ye wo sɔ wɔ̀ àhùa, xɔ̀ wo ò. Vɔ̀a, àpo ɖùsi-lɔ sɛ̃sɛ̃, àpo àbɔ, ku àpo ŋùmè be kɛ̃klɛ̃ lè woa dòmè ye, ɖo wò lɔ̃ wo.

⁵Oò, Mawu! Èwò kè nyi èfìɔ nyèa, gbe ɖè ègbè kpò! Yakɔb be jìjimèviwo la ɖùji.

⁶Èwò ye mi sɔ puna miabe kɛ̃tɔwo ànyi. Àpo nyikɔ ye mi sɔ ɖona àfɔ̀ àmè kèwo sɔ ènyà ɖo mia ŋutiawo ji.

⁷Mu nyi àŋùdàti nyèa ŋuti ye mù dojì ɖo ò. Mu nyi èwui nyèa ye nana mù èjiɖùɖu ò.

⁸Èwò, Mawu ye na mi ɖù miabe kɛ̃tɔwo ji, eye wò ɖìgbɔ àmè kèwo kpe ènyà ku mia.

⁹Mi jìnà èhà, kafuna Mawu, gbè sia gbè, eye mi dona àpo nyikɔ ɖoji, wè sia wè.

¹⁰Gãke fifìa, wò sɔ mi dàŋùgbe, eye wò do mi ŋùkpɛ̃. Wò mu gbà le kplɔ̀ miabe àhùakɔ̃wo yì àhùagbe ji ke ò.

¹¹Wò na mi tè yì ŋùgbe lè miabe kɛ̃tɔwo be ŋùkɔ̀, eye kɛ̃tɔawo hlà miabe ènunɔ̀amèsiwo.

¹²Wò do mi àsi, sìgbè àlɛ̃vi kèwo wo la yì wùa nène, eye wò kã mi hlɛ̃ ɖo dùkɔ̃wo dòmè.

¹³Wò sà dùkɔ̃ wò kpɔ̀kpɔ, eye wò mu kpɔ àlè ɖe lè e mè ò.

¹⁴Wò sɔ mi wɔ̀ èvlodonu na miabe àxuekɔ̀tɔwo, àlɔmèɖènu ku ènu ɖì kòkoe na àmè kèwo pòxla mia.

¹⁵Wò na mi trɔ zũ èhàkpànyà lè dùkɔ̃wo dòmè, eye àmèwo hũhũna èta, ne wo kpɔ mia.

¹⁶Àpe èvlododo lè ŋùmè na mù, gbè sia gbè, eye ŋùkpɛ̃ cɔ̃ ŋùmè na mù.

¹⁷Wàlɛbɛ kè mù le sè kɛ̃tɔ kèwo sɔ ènyà ɖo ŋuti nyèa be èzũwo, bùsunyawo, àmècrìnyawo, ku èhlɔ̃dãnyawo be nyikɔa.

¹⁸Ènu kèawo keŋu jɔ̀ ɖo mia ji, to e gbɔ be mi mu ŋlɔ̀be wò ò; Eye mi mu gble èzòɖùɖu wòa ò.

¹⁹Miabe èjìwo mu trɔ lè yo wò mè ò. Miabe àfɔ̀wo mu trã èmɔ̃, jo lè àpo àfɔ̀mɔ ji ò.

²⁰Gãkea, wò tùkù mi hãnyàhãnyà ɖɛ, ɖo gbètewo dòmè. Eye wò sɔ èku be vìvìti cricri cɔ̃ mia ji.

²¹Ne mi kè ŋlɔ̀be miabe Mawu be nyikɔ, eye mi vlũ àlɔ̀ ɖoɖa èdù bu mètɔwo be vòdua,

²²Mawu mu la nya ɛ̀ òa? Ɖoa, E nyana ènu kè wla ɖo èjì be gòglòpea.

²³Gãkea, èwò ŋuti mi xà ɖo, jè ŋùkɔ̀ èku, wè sia wè. Eye wo le kplɔ̀ mi, sìgbè àlɛ̃vi kèwo wo la yì wùawo nène.

²⁴Fɔ̃, Tɔhonɔ̀! Fɔ̃! Nukɛ ŋuti wò le dɔ̃ àlɔ̃ ɖo ò? Fɔ̃, eye mù gbà sɔ mi dàŋùgbe gbidi ò!

²⁵Nukɛ ŋuti wò le wla àpo ŋùmè do mi ɖo ò? Wò le ŋlɔ̀be miabe àyàɖùɖu ku àlekè wo le tɛ mi ɖo toa?

²⁶Ɖoa, wo zĩ miabe pòdo tɛ ɖo ànyigbã, eye gbɔ̃gbɔ̃ cipò na mi.

²⁷Sitè, ne wòa xɔ̀ na mi! Hlùɛ̃ mi gã, ɖo àpo lɔ̃lɔ̃ màgblàa ŋuti!