Read gen Èhàwo 46 Bible Online

Èhàwo 46 - gen bible

Èhàwo 46

¹Hàsìnɔ̀ gãa be Èhà kè Koreà be èviwo kpà ɖo 'nyɔ̃nùviwo' be ègbè ɖìɖi jia.

²Mawu ye nyi miabe bèbèpe ku miabe ŋusɛ̃, àlɔ̀do wè sia wè lè tùkaɖawo mè.

³Ekèa ŋuti, mi mu la vɔ̃ ènu ɖekpe, ne ànyigbã gli, eye ètowo hũhũ jè àpù be ègũ cicri mè cã ò.

⁴Àlo, ne àpù le wɔ̀ àdã, le sɔ èfu, eye e hɔ̃ ètowo lè ègũ nua ò. Ènu bɔ̀ kpoo

⁵Ètɔ̀ ɖe lè kè be sàsra dona jìjɔɛ na èdù kè mè wo sɛ̃nà Mawu lèa; tèpe kè Jihũitɔa sɔ wɔ̀ yebe Nɔ̀pe Kɔ̀kɔ̀ɛ.

⁶Mawu lè e mè, ekèa ŋuti, mu la hùã ò. Mawu la xɔ̀ na ɛ̀, ne èŋùa gbe kè kpòa.

⁷Dùkɔ̃wo jè àgla, èfìɔduwo le hũhũ, vɔ̀a, kè Mawu ɖè ègbèa, ànyigbã srè ku vɔ̃vɔ̃.

⁸Tɔhonɔ̀, àhùakɔ̃wo be Mawu a lè ku mi, Yakɔb be Mawu ye nyi miabe àgbògbò. Ènu bɔ̀ kpoo

⁹Mì va kpɔ Tɔhonɔ̀ be ènuwɔ̀wɔwo ɖa! Mì va kpɔ àlekè be ɖo ànyigbã a àgba ɖoa ɖa!

¹⁰E ɖo àhùawɔ̀wɔwo tè kaka yì ɖo ànyigbã be nukpòpe ke. E ŋɛ̃ àŋùdàti, eye be flì èhuã. E tɔzò àhùakèkeviawo.

¹¹E gblɔ̃ be: “Mì nɔ̀ ànyi kpoo! Eye mìa nya be ènyè ye nyi Mawu kè ɖo ŋusɛ̃ ɖo dùkɔ̃wo ji, ɖo ŋusɛ̃ ɖo ànyigbã keŋu jia!”

¹²Tɔhonɔ̀, àhùakɔ̃wo be Mawu a lè ku mi, Yakɔb be Mawu ye nyi miabe àgbògbò. Ènu bɔ̀ kpoo