Read gen Èhàwo 49 Bible Online

Èhàwo 49 - gen bible

Èhàwo 49

¹Hàsìnɔ̀ gãa be Èhà. Koreà be èviwo be kafu-hà.

²Dùkɔ̃wo, mìa kpata mì ɖoto! Mì, ànyigbã ji tɔwo keŋu, mì sè ènyà kèa!

³Mìa, èdùmèviwo ku àmègãwo keŋu, àdɔ̀kùnɔ̀wo ku wɔ̀amènɔ̀wo keŋu.

⁴Ènyà kè la to so ènu mè na mù a, la fiɔ ènunya. Eye ènugɔ̃mèsèse la to so èjì nyè mè.

⁵Mù la kè èto, la sè èlododo; eye, mù la pò èkàsãŋùgu, la sɔ ɖè àjò nyèa gɔ̃mè.

⁶Nukɛ ŋuti ye, lè jɔ̀gbèvuɛ̃ gbèa, mù la vɔ̃ àmè gbegble kèwo ye trɔdo mù a be èvuɛ̃wɔ̀wɔwo?

⁷Àmè kèawo ye kãna ɖo woabe àdɔ̀kùnuwo ji, sɔna woabe ècikpɔkpɔ gã kãna àdã.

⁸Àmè ɖekpe mu la teŋu ɖè ye havi be àgbè, àlo, la tu èhlɔ̃fɛ̃ ɖo ye ɖokoe ta na Mawu ò.

⁹Èkla be hlùɛ̃gã xɔ̀asì ŋutɔ, yebe àjɔ̀ mu la sù gbèɖe,

¹⁰ne àmè ne nɔ̀ àgbè tɛ̀gbɛ̀, ne mu gbà kpɔ èyɔ̀ mè ò.

¹¹Ɖoa, àmè sia àmè kpɔ be ènunyatɔwo kuna, nènea ke ye ènumànyatɔwo ku èvuɛ̃wɔ̀tɔwo nu va yìnà, eye wo gblena woabe àdɔ̀kùnuwo ɖɛ na àmè buwo.

¹²To e gbɔ be woabe nyikɔwo lè woabe ànyigbãwo ŋuti cã a, woabe èyɔ̀dowo ye la nyi woabe àxue kaka sɔ yì. Èyɔ̀dowo ye la nyi woabe nɔ̀pewo, so jìjimè, yì jìjimè.

¹³Eye àgbètɔ be àdɔ̀kùnuwo be kɛ̃klɛ̃ mu la teŋu le è ɖo àgbè klɔ̀lɔ̀ ò. Yebe èkua lè sìgbè àlekè èlã cã kunaa nène.

¹⁴Ènu kèa ye le tɔtè kpɔ àmè kèwo kãna ɖo woa ɖokoe ji, ku àmè kèwo woabe ènyàwo jèna ŋùmè na a. Ènu bɔ̀ kpoo

¹⁵Wo ɖota èkuwode, sìgbè àlɛ̃wo nène, eye wo trɔ zũ ènu kuku. Ne èŋù kèa, àmè jɔ̀jɔɛwo ye la ɖo àfɔ̀ woa ji. Woabe àmètiawo la nyìnyɔ̀ lè èyɔ̀do mè, eye wo la nɔ̀ dìdìpe boo na woabe èfìɔsawo.

¹⁶Vɔ̀a, Mawu la hlùɛ̃ èkla nyè gã lè èzòmà-vɔa be ŋusɛ̃ si. Ɛ̃ɛ, mù kãɖoji be Mawu la sɔ mù yì ɖo ye ɖokoe gbɔ. Ènubɔ̀ kpoo

¹⁷Vɔ̃vɔ̃ mu gbà ɖo wò, ne àmè ɖe ɖo ènunɔ̀amèsi, eye yebe àxuea be gogo le jì ɖo ji ò.

¹⁸Ɖoa, ne e kua, mu la sɔ ènu ɖekpe jo ò. Yebe gogoa mu la ɖo ègũ kudo è, yì èyɔ̀mè ò.

¹⁹To e gbɔ be, wàlɛbɛ kè be lè àgbèa, e kpɔna ye ɖokoe be yè nyi sìtume, eye àmèwo kafuna ɛ̀ be ènu sia ènu le nyɔ na ɛ̀ cã a,

²⁰e la trɔ yì tɔgbeawo be èha mè. Tɔgbea kèwo mu la gbà kpɔ àgbè be kɛ̃klɛ̃ gbèɖe òa.

²¹Ɖoa, àgbètɔ kè kpɔ èci, vɔ̀ mu ɖo ènugɔ̃mèsèse òa, Sɔ̀ ku èlã kè le kua.