Read gen Èhàwo 5 Bible Online

Èhàwo 5 - gen bible

Èhàwo 5

¹David be Èhà, kè wo ɖè lè èhàsìnɔ̀ gã be xoma mè. Wo jìnà ɛ̀ kudo èkpɛ̃viwo.

²Tɔhonɔ̀, ɖo èto àpe ègbè, dèŋùgblè so àpe àlenanawo ŋuti.

³Èfìɔ Mawu nyè, ɖo èto àpe àpa dodowo. Tɔhonɔ̀, èwò ye mù le fã yɔ.

⁴So ŋùdekɛ̃nyɛ̃a, sè àpe ègbè. Kaka ŋùdekɛ̃nyɛ fùtù ye mù jrà ɖokoe nyè ɖo na wò, eye mù nɔ̀tè le kpɔ àpo àsinu.

⁵Wò mu nyi Mawu kè dona vìvi ɖo ènu bàɖà wɔ̀wɔ ŋuti ò. Nuvuɛ̃wɔ̀tɔ mu kpɔna tèpe lè gbɔ wò ò.

⁶Gbèɖe, ègòyitɔ ɖekpe mu la nɔ̀tè lè ŋùkɔ̀ na wò ò. Wò crì àmè nyrãkuwo keŋu.

⁷Wò crɔ̃na àjèɖàtɔwo. Tɔhonɔ̀, wò crì fìãfì ku èhlɔ̃dãtɔwo.

⁸Vɔ̀ lè gbɔ nyèa, mù la teŋu gɛ̃ ɖo àpo àxuea mè to àpo lɔ̃lɔ̃ mè. Kudo bùbu tɔ̀xɛ ye mù la do ènugũ lè àpo gòxɔ kɔ̀kɔ̀ɛa be ŋùkɔ̀.

⁹Tɔhonɔ̀, wò lè jɔ̀jɔɛ, jɔ̀ àpe àfɔ̀tope ɖo àmè kèwo lè àjòha mè na mù a ŋuti. Ɖè àfɔ̀klɛ̃nu kèwo lè èmɔ̃ kè wò le fiɔ mù a jiawo jo.

¹⁰Ɖo nyàwo ɖekpe mu lè ènu na wo ò: Èhlɔ̃dãdãwo ye ɖɔ woabe èjì mè. Woabe ènyàwo crɔ̃na àmè, eye àmè bèble ɖèɖe ye lè woabe àɖewo ji.

¹¹Mawu, ɖè è fiɔ be wo nyi àgɔ̀jètɔwo! Woabe ɖoɖowo ne na be woa jè ànyi! Ɖè wo to! Wo wɔ̀ ènu bàɖà sùgbɔ ɖo wo sitè ɖo ŋuti wò.

¹²Vɔ̀ àmè kè dojì ɖo ŋuti wòa, la nɔ̀ jìjɔɛ mè. Yebe jìjɔɛa la nɔ̀ ànyi tɛ̀gbɛ̀, ɖo wò le cɔ̃ àsi e ji. Àmè kè lɔ̃ wòa, la nɔ ɖu jìjɔɛ be èwè.

¹³Ɛ̃ɛ èwò Tɔhonɔ̀a, wò tuna èsì na àmè jɔ̀jɔɛ. Àpo àdɔ̀mè nyuɛ̃ ye tɔ̃nàkpa do è sìgbè àkpoxɔ̀nu nène.