Read gen Èhàwo 51 Bible Online

Èhàwo 51 - gen bible

Èhàwo 51

¹Na hàsìnɔ̀ gã, David be Èhà.

²Wàlɛbɛ kè gblɔ̃ɖɛtɔ Natàn yì kpɔ ɛ̀, ekè David dɔ̃ ku Bat-Cebà, Urì be èsrɔ̃ vɔ̀a.

³Aò Mawu, ku ŋuzĩzĩ na mù, lè àpo àdɔ̀mè nyuɛ̃ wɔ̀wɔ mè, eye, zɔ̃ ɖo àpo xòmèfa gãa jia, tutu àpe àgɔ̀jèjewo keŋu jo.

⁴Lè èsì na mù keŋu-keŋu lè àpe èkunyànyrã mè, eye kɔ̀ ŋuti nyè so àpe èvuɛ̃ mè.

⁵Ɖoa, mù jèsi àgɔ̀jèje nyèwo, eye àpe nuvuɛ̃ gbà lè ŋùmè na mù gãa, wè sia wè.

⁶Èwò kpò, èwò ɖèka kpò ye mù jè àgɔ̀ do, eye ènu kè nyi ènu màɣe lè àpo ŋùmèa, ye mù wɔ̀. Ne wò yì nupo pò gbea, tɔ̀ wò la jɔ̀. Eye ŋùmèkãkã mu lè àpo ènyà sòso ŋuti ò.

⁷Kpɔɖa! Àgɔ̀jèje mè ye wo jì mù ɖo, eye nuvuɛ̃ mè ye ènɔ̀ nyè fɔ àpe èfu lè.

⁸Kpɔɖa! Nyàwo kè lè èjì mèa, ye wò jina. Ekèa ŋutia, fiɔ mù ènunya lè èjì mè!

⁹Sɔ kpatima lè mù keŋu-keŋu, ne ma ɖì. Lè èsì na mù, ne ma ɣe wu ɖètifu.

¹⁰Na ma sè jìjɔɛ ku àyosòso be ènyà, ne èpu kèwo wò ŋɛ̃awo ne ɖɔ ku jìjɔɛ.

¹¹Ɖè èkɔ̀ lè èvuɛ̃ nyèwo ŋuti, ne wòa tutu àgɔ̀jèje nyèwo keŋu!

¹²Aò Mawu! Wɔ̀ èjì kɔ̀kɔ̀ɛ ɖo mè nyè! Gbìgbɔ̀ sɔ èjro nyuɛ̃ be gbɔ̃gbɔ̃ yeye ɖo mè nyè!

¹³Mù gbà sɔ mù dãŋùgbe lè ŋùku wò mè ò! Mù gbà xɔ̀ Gbɔ̃gbɔ̃ Kɔ̀kɔ̀ɛ wòa lè àsì nyè ò!

¹⁴Gbà na, ma kpɔ jìjɔɛ be wò hlùɛ̃ mù gã, eye sɔ èjro nyuɛ̃ be gbɔ̃gbɔ̃ le mù ɖotè.

¹⁵Nène a, mù la teŋu fiɔ èmɔ̃ wòwo àgɔ̀jètɔwo, eye èvuɛ̃ wɔ̀tɔwo la trɔ èdɛ̃, la gbɔ̀ va gbɔ wò.

¹⁶Aò Mawu, àpe hlùɛ̃gã be Mawu! Jo mù lè èhlɔ̃dãdã si mè, eye àɖe nyè la jì èhà sɛ̃sɛ̃ɖe, sɔ ɖè àpo jɔ̀jɔɛwɔ̀wɔ fiɔ.

¹⁷Tɔhonɔ̀, hũ ènu na mù, eye ènu nyè la kafu wò.

¹⁸Ɖoa, wò mu jina àkpedo be vɔsa ò. Ne mu nyi nène òa, mù la kè hɛ̃ ɛ̀ va. Ènumème be vɔsa cã mu jènà ŋùmè na wò ò.

¹⁹Aò Mawu, vɔsa kè jènà ŋùmè na wòa, ye nyi vevesèse be èjì kè do jèsìdo yebe vuɛ̃ a. Aò, Mawu! Wò mu la gbe èjì kè gbã, ekè sè vève ɖo yebe èvuɛ̃wo taa ò.

²⁰Lè àpo màje mèa, aò Mawu, wɔ̀ ɖàgbè na Ziɔ̀n. Gbìgbɔ̀ li Yèruzàlɛm be èglìawo.

²¹Ekèa yomè ye wò la lɔ̃ jɔ̀jɔɛwɔ̀wɔ be vɔ̀sawo, ènumème vɔ̀sawo ku vɔsa blibowo la jè ŋùmè na wò. Ekèa yomè ye wo la sɔ ènyì-suwo savɔ lè vɔsakpe wòa ji.