Read gen Èhàwo 52 Bible Online

Èhàwo 52 - gen bible

Èhàwo 52

¹Hàsìnɔ̀ gã be Èhà. Ɖo David be ègbè do àsi ji.

²Wàlɛbɛ kè Doɛg, Edɔ̀mvi ŋusùa va gblɔ̃ na Saolò be: “David va ɖo Ahimèlɛk be àxomè”.

³Àmè nyrãku, nukɛ ŋuti wò le kã àdã ɖo àpo èvuɛ̃wɔ̀wɔ ŋuti ɖo? Mawu be ànùkuawɔ̀wɔ a lè tɛ̀gbɛ̀!

⁴Àpo àɖea, èhlɔ̃dãdã ŋuti kpò be le bù, sìgbè èwui ɖaɖa nène, eye wò sɔ̀gbè la flù àmè

⁵Wò lɔ̃nà èvuɛ̃wɔ̀wɔ wu ènyuɛ̃wɔ̀wɔ, eye, àjèɖàɖa jɔ̀nàjì na wò wu nyàwototo. Ènu bɔ̀ kpoo

⁶Èwò àjèɖàtɔ! Ènugbegble be ènyàwo sɔ̃ŋu kpò wò lɔ̃nà.

⁷Ekèa ŋutia, Mawu cã la xla wò ɖo ànyi gbidi! E la le wò, la dɔ̃ wò to so àpo nɔ̀pe. E la hɔ̃ wò jo lè àgbè-àgbèawo dòmè! Ènu bɔ̀ kpoo

⁸Ènu la ku na àmè jɔ̀jɔɛ kèwo la kpɔ ɛ̀a. Wo la kò è, eye wo la gblɔ̃ be:

⁹“Kpɔɖa, ŋusù kè le wɔ̀ kãlì, eye mu sɔ Mawu wɔ̀ yebe àgbògbò òa, ye nyi ekèa! Ekè be kã ɖo yebe àdɔ̀kùnu gbogbowo jia, e sɔ èkunyànyrã gla ye ɖokoe bòhũ!”

¹⁰Gãke, ènyè yàa, mù lè sìgbè àmìti kè le jè, lè Mawu be àxomèa nène. Mù dojì ɖo Mawu be lɔ̃lɔ̃ màgblea ŋuti, so mà-vɔ, sɔ yì mà-vɔ mè!

¹¹Mawu gã! Mù la nɔ kafu wò tɛ̀gbɛ̀, ɖo ènu kèwo keŋu wò wɔ̀a ŋuti! Nyikɔ wò ŋuti ye mù la ɖoŋù ɖo. Ɖoa, e nyɔ! Ekèa ŋuti mù la ɖè è gblɔ̃, lè àmè kɔ̀kɔ̀ɛ wòwo be ŋùmè be: Wò nyɔ!