Read gen Èhàwo 55 Bible Online

Èhàwo 55 - gen bible

Èhàwo 55

¹David be Èhàlo kè wo ɖè lè Hàsìnɔ̀ gã be xoma mèa. Wo la pò èkàsãŋùgu ɖo e ŋuti. Ɖo David be ègbè do àsi ji.

²Aò, Mawu! Ɖo èto àpe kuefã! Mù gbà ɖè èkɔ̀ le àpe kuefã màtɔtèa ŋuti ò!

³Trɔ kpɔ gbɔ nyè, ne wòa tɔ̀ na mù. Susu nyè titɔ, mù le na àle, eye mù le dã pòxla,

⁴Ɖoa, àpe kɛ̃tɔ be àdã le do vɔ̃vɔ̃ na mù. Wo ɖo ènu vuɛ̃ ɖo ŋuti nyè, eye wo sɔ àdɔ̀mèze le dohùɛ do mù.

⁵Èjì nyè ɖɔ ku àkpɔ̃ lè ètù mè na mù. Èku be àdìka le sò mù.

⁶Àdìka le sò mù, eye mù le pò tìtìtì. Mù ɖɔ ku vɔ̃vɔ̃ gã ɖe.

⁷Ekèa ŋuti mù gblɔ̃ be: “Aò ne àwàda lè àsi nyè, sìgbè àhɔ̃ne nènea, mù la kè zrò jo, la yì gbɔ̃jɛ̃.

⁸Ɛ̃ɛ, mù la kè si jo yì dìdìpe, eye mù la yì ci zògbè ji. Ènu bɔ̀ kpoo

⁹Mù la ɖèbla yì àpe bèbèpe, boo lè àya gble ènu ku yebe àdã wɔ̀wɔ nu”

¹⁰Aò, Tɔhonɔ̀, titɔ kɛ̃tɔ nyèwo, Caka woabe ènyà gbɔ̃gblɔ̃wo. Ɖo, mù kpɔ tùkaɖa ku àjrèwɔ̀wɔ lè èdùa mè.

¹¹Èzã ku kedèa, wo le trɔ do è, lè yebe èglìawo ji. Àhovì ku èhũnyànyrãwo ye lè e mè.

¹²Ènugbegble kpò ye lè e mè. Zigìdi ku àmè bèble mu dɛ̃na lè yebe èmɔ̃wo ji ò.

¹³Ne kɛ̃tɔ nyè ɖe ye le zũ mù a, mù la kè dojì la xɔ̀ ɛ̀. Ne àmè kè crì mù a ye sitè ɖo ŋuti nyèa, mù la kè bè do è.

¹⁴Vɔ̀a, èwò, àgbètɔ, sìgbè ènyè ke nène ye, èhavi nyè, èxlɔ̃ nyè veve.

¹⁵Mia ku àmè kè dòmè ènyà viviwo nɔ̀ kpɔ, wàlɛbɛ kè mi zɔ̃nà ku àmèhaa, lè Mawu be àxuea mèa ye!

¹⁶Èku kpàtà ne sò kɛ̃tɔ nyèwo! Wo ne yì àvlì mè àgbè-àgbe! Ɖoa, èhũnyànyrã sò àxue ɖo woabe èjì mè.

¹⁷Vɔ̀a, ènyè yaa, mù fã yɔ Mawu, eye Tɔhonɔ̀ hlùɛ̃ mù gã.

¹⁸Mù sɔ àkpɔ̃ na àle, fìɛ̃si, ŋùdekɛ̃nyɛ ku dɔ̃ŋùkusu, eye be ɖo èto àpe ègbè.

¹⁹E jo mù blibo, lebè na mù kɛɖɛ, so àmè kèwo kpe àhùa ku mù a si. Ɖoa, àmè kèwo xa mù a, wo sùgbɔ ŋutɔ.

²⁰Mawu ne sè è, ne bèa ɖiɖi wo ɖo ànyi. E ye kè nyi Mawu lè, le ɖùfìɔ so kaka gɔ̃mèjèje kea! Ènu bɔ̀ kpoo Wo mu la trɔ èdɛ̃ gbèɖe ò, ɖo wo mu sina Mawu ò.

²¹Èhavi do àlɔ̀ ɖoɖa yebe èxlɔ̃ kèwo be lè ŋuti fàfa mè kudo woa gbɔ. E gble èkɔ̀do na yebe èzòɖùɖua.

²²Yebe ènyàgbɔ̃gblɔ̃ fa sìgbè èsì nène, vɔ̀a, àhùa ye lè èjì mè na ɛ̀. Yebe ènu mè be ènyàwo vivi sìgbè ànyisì nène, vɔ̀a, èwui ɖaɖa ye wo nyi.

²³Dro àgbã wòa ɖo Tɔhonɔ̀ ji, eye e la le wò ɖotè. Mu la ɖè àsi lè àmè jɔ̀jɔɛ ŋuti, ne bèa jè ànyi ò.

²⁴Vɔ̀a, èwò Mawu! Wò la ɖiɖi àmè vuɛ̃ a ɖo kaka gbegble be ègũ mè ke! Àmè nyrãku ku àmè flùtɔwo mu la nɔ̀ àgbè, lè woabe àgbè-zãwo be mamã mè ò. Gãkea, ènyè ya, mù dojì ɖo ŋuti wò.