Read gen Èhàwo 56 Bible Online

Èhàwo 56 - gen bible

Èhàwo 56

¹Na hàsìnɔ̀ gãa. Ɖo 'Àhɔ̃ne ɖe lè logòti ɖe ji lè dìdìpe' be ègbè ɖìɖi ji. David be Èhà. Wàlɛbɛ kè Filistìtɔawo le è lè Gat-nyigbã jia.

²Aò Mawu, ku ŋuzĩzĩ na mù! Ɖoa, àmèwo le tĩ yo nyè mè. Gbè sia gbèa, wo le pò àvũ ku mù àdãtɔ̀.

³Kɛ̃tɔ nyèwo lè yo nyè mè, wè sia wè. Wo sùgbɔ le doxa na mù, le kɔ woa ɖokoe yì ji.

⁴Ne vɔ̃vɔ̃ ɖo mù a, ŋuti wò ye mù la dojì ɖo.

⁵Mù le kafu Mawu na yebe ènyà kè e gblɔ̃a. Mawu ŋuti ye mù le dojì ɖo, nyè mu la vɔ̃ ò. Nukɛ ye àgbètɔ kè nyi ŋutilãa, la teŋu wɔ̀ ku mù ò?

⁶Wo le ɖèfũ na mù, gbè sia gbè, woabe susu kpò ye nyi be yèwoa wɔ̀ èvuɛ̃ ku mù.

⁷Wo blase, le doxa na mù, le le ŋùkuvi ɖo àfɔ̀tope nyèwo ŋuti, ne woa ɖè àpe àgbèa jo.

⁸Wo la teŋu si, kè wo wɔ̀ ènu kèawo keŋu vɔ̀a? Aò, Mawu! Lè àpo àdɔ̀mèze gã mèa, sɔ dùkɔ̃ kèa pu ànyi!

⁹Èwò yaa, wò hlɛ̃ àpe àlenanawo. Wò xɔ̀ àɖàsì nyèwo ɖo ègò wòa mè. Wò ŋlɔ̀ wo ɖo àpo xoma mè.

¹⁰Ekèa ŋuti, kɛ̃tɔ nyèwo la dɔ̃ yì ŋùgbe, wàlɛbɛ kè mù la fã yɔ wòa, eye mù nya be Mawu lè ji nyè.

¹¹Mù le kafu Mawu na yebe ènyà kè e gblɔ̃a. Ɛ̃ɛ, mù le mlã Tɔhonɔ̀ be ènyà.

¹²Mawu ŋuti ye mù le dojì ɖo, nyè mu la vɔ̃ ò. Nukɛ ye àgbètɔ la teŋu wɔ̀ na mù ò?

¹³Aò Mawu, mù ɖù àjɔ̀gbè be èfɛ̃ do wò. Mù la sɔ àkpedodo be vɔsa tu ì na wò.

¹⁴Ɖoa, wò hlùɛ̃ èkla nyè gã so èku mè. Wò ɖè àfɔ̀klɛ̃nuwo jo lè àfɔ̀nu na mù, àleke be mù la teŋu zɔ̃ lè Mawu be ŋùmè, lè àgbè be kɛ̃klɛ̃ nu.