Read gen Èhàwo 57 Bible Online

Èhàwo 57 - gen bible

Èhàwo 57

¹David be Èhàlo kè wo ɖè lè Hàsìnɔ̀ gã be xoma mèa. Ɖo 'Mù gbà gble ènu ò!' Be ègbè ɖìɖi ji. Wàlɛbɛ kè David si lè Saolò nu, yì wla ɖo àkpã-do ɖe mèa.

²Ku ŋuzĩzĩ na mù! Aò Mawu, ku ŋuzĩzĩ na mù jro! Ɖo gbɔ wò ye èkla nyè bè ɖo, àpo àwà bè vɔ̃vɔ̃lì gɔ̃mè ye mù wla ɖo, kaka na àfɔ̀ku kèa be ènuwuwu.

³Mù le fã yɔ èjihũi be Mawu a, mù le fã yɔ Mawu kè wɔ̀nà ènuwo keŋu na mù a.

⁴E la ɖo hlùɛ̃gã so jiŋùkusi ɖoɖa mù! E la do ŋùkpɛ̃ àmè kèwo lè yo nyè mè ku àdãa. Ènu bɔ̀ kpoo Mawu la ɖo yebe lɔ̃lɔ̃ ku ànùkuawɔ̀wɔ ɖoɖa.

⁵Mù lè jãŋùtawo dòmè. Mù mlɔ̃ èlãwɔ̀adãwo dòmè, àgbètɔ be èvi kèwo be àɖuwo dìdì, sìgbè èhuãwo nène, kèwo be àɖewo wu èwui ɖaɖawo dòmè.

⁶Aò, Mawu! Gogo wò ne yì e ji lè jiŋùkusiwo keŋu! Gogo wòa ne ɖù ànyigbã a keŋu ji!

⁷Wo ɖo èɖɔ ɖo èmɔ̃ ji na mù. Wo zĩ èkla nyè ɖo ànyi, wo kù èdo ɖo èmɔ̃ ji na mù. Vɔ̀a, woa ŋutɔwo gɛ̃ jè e mè. Ènu bɔ̀ kpoo

⁸Kè èjì nyè jè e mèa, Aò Mawu! Kè èjì nyè jè e mèa, mù la jì kafu be èhà eye mù la pò sãŋùgu!

⁹Fɔ̃! Èkla nyè, fɔ̃! Mì fɔ̃, sãŋùgu ku èhɛ, mì fɔ̃! Ènyè ye la fɔ̃ ŋùkèkèa!

¹⁰Aò, Tɔhonɔ̀! Mù la kafu wò, lè dùkɔ̃wo dòmè! Mù la jì èhà sɔ mlã wò, lè dùkɔ̃ pòpuwo dòmè!

¹¹Ɖo, àpo ànùkuawɔ̀wɔ yì tɔ kaka jiŋùkusi, eye àpo nyàwototo yì kɔ̀ ɖo kaka lilikpowo mè!

¹²Aò Mawu! Ɖè gogo wòa fiɔ lè jiŋùkusiwo keŋu! Gogo wòa ne ɖù ànyigbã a keŋu ji!