Read gen Èhàwo 59 Bible Online

Èhàwo 59 - gen bible

Èhàwo 59

¹David be Èhà na hàsìnɔ̀ gãa. Ɖo 'Mù gbà gble ènu ò' be ègbèdìɖi ji. Wàlɛbɛ kè Saolò dɔ̃ àmèwo ne woa yì nɔ ɖia David be àxue, ne woa wù ìa.

²Aò, Mawu, hlùɛ̃ mù gã so kɛ̃tɔ nyèwo si! Cɔ̃ ji nyè ɖo àmè kèwo sitè ɖo ŋuti nyèa, wo ŋuti!

³Hlùɛ̃ mù gã so èvuɛ̃wɔ̀tɔwo si! Xɔ̀ mù lè èhlɔ̃dãtɔwo si!

⁴Kpɔ leke wo le doxa na mù ɖa! Àmè nyrãkuwo le blase, la wɔ̀ èvuɛ̃ ku mù. Vɔ̀a, nyè mu jè àgɔ̀ ɖe, àlo, wɔ̀ èvuɛ̃ ɖe do wo ò. Aò, Tɔhonɔ̀!

⁵Nyè mu wɔ̀ ènu bàɖà ɖekpe, gbɔ̀xue wo lè èdù ji, le sò èmɔ̃ na mù ò. Fɔ̃, Tɔhonɔ̀! Sitè, va xɔ̀ na mù, ne wò ŋutɔ wòa kpɔ!

⁶Èwò ye nyi Àhùadù Tɔhonɔ̀ Mawu, Izràɛlviwo be Mawu! Fɔ̃, ne wòa dɔ̃ èto na dùkɔ̃ kèawo keŋu! Mù gbà ku ŋuzĩzĩ na àmèsàtɔ kèawo ò! Ènu bɔ̀ kpoo

⁷Fìɛ̃si mèa, wo trɔvana, ku àbòbo, ku àdã, sìgbè àvũwo nène, Eye wo sãnà lè èdùa keŋu mè.

⁸Kpɔ ènyà kèwo le gɛ̃ lè ènu na woa ɖa! Àɖi be ènyàwo le to sìgbè èwui ɖaɖawo nène. Wo le gblɔ̃ be: “Àmè kɛ ye le sè mia nyikɔ ò?”

⁹Gãkea, èwò Tɔhonɔ̀ yaa, wò le kò wo. Wò le kò dùkɔ̃ ŋuawo kpata.

¹⁰Èwò kè nyi àpe ŋusɛ̃a, gbɔ wò ye mù trɔ ŋùmè ɖoɖa, Tɔhonɔ̀! Èwò, Mawu ye nyi àpe àgbògbò.

¹¹Ànùkua be Mawu nyè! Mawu la nɔ zɔ̃ lè ŋùkɔ̀ na mù, eye be la na, mù la nɔ go ɖo àmè kèwo crì mù a, wo ji.

¹²Gãkea, Tɔhonɔ̀, miabe àkpoxɔ̀nu, mù gbà crɔ̃ wo ò. Ne mu nyi nène òa, dùkɔ̃ nyèa la va ŋlɔ̀be àpo jiɖùɖu ɖo kɛ̃tɔwo ji. Vɔ̀a, sɔ àpo ŋusɛ̃ kã wo hlɛ̃, ne woa nɔ dã. Wòa ɖiɖi wo, ne wòa do wo ŋùkpɛ̃.

¹³Ɖo woabe ènuyuwo be èvuɛ̃wo ŋuti, na woa ci woa ŋutɔwo be jajra be gàmɔ mè. Ɖo kpɛ̃sɛ̃ ku àjèɖàɖa kè tona so woabe ènu mèa ŋuti.

¹⁴Àpo àdɔ̀mèze ne fiɔ̃ wo! Ne fiɔ̃ wo, kaka woa crɔ̃ gbidi-gbidi! Ne woa nya be Mawu ye ɖùfìɔ lè Yakɔb be jìjimèa nu, kaka sɔ yì ànyigbã be nukpòpewo! Ènu bɔ̀ kpoo

¹⁵Fìɛ̃si mèa, wo trɔvana, ku àbòbo, ku àdã, sìgbè àvũwo nène. Eye wo dãna lè èdùa keŋu mè.

¹⁶Wo dãna, la nɔ ji ènuɖùɖu. Eye, ne wo mu ɖɔpò òa, wo wɔ̀nà àdã, nana àle, èzã bliboa.

¹⁷Vɔ̀a, ènyè yaa, mù la jì èhà, sɔ mlã àpo ŋusɛ̃. Ŋùdekɛ̃nyɛ mèa, mù la jì èhà, sɔ kafu àpo ànùkua wɔ̀wɔa.

¹⁸Aò, Mawu kè nyi àpe ŋusɛ̃a, mù le jì èhà, sɔ kafu wò! Èwò, Mawu ye nyi àpe àgbògbò, Èwò Mawu kè lɔ̃ mù ku ànùkua a!