Read gen Èhàwo 60 Bible Online

Èhàwo 60 - gen bible

Èhàwo 60

¹David be èhà, na hàsìnɔ̀ gãa. Ɖo 'Èzòɖùɖu be èsepòpo ɣe' be ègbè ɖìɖi ji sɔ na ènufiɔfiɔ.

²Wàlɛbɛ kè wo le wɔ̀ àhùa ku Aràmvi kèwo so Mèzòpòtamìa kudo kèwo so Sobàa, Yoab trɔva, eye be ɖù Edɔ̀mviwo ji. Wàlɛbɛ ŋua, e wù àgbètɔ hotu àdɛ̃ lè èjè be bàlìa mè.

³Aò, Mawu! Wò gbe mi, wò kã mi hlɛ̃! Wò do àdɔ̀mèze ɖo mia ŋuti! Tɔ̀ wò jɔ̀: gbà trɔ kpɔ mi jro!

⁴Wò hũhũ ànyigbã a, eye be fɛ̃! Aò, bla yebe àbìwo jro! Ɖo, e le hũhũ keɖe keɖe, la mù!

⁵Wò na dùkɔ̃ wòa to hùenu sɛ̃sɛ̃wo mè. Wò na mi àhà kè ve kpàa, mi nù.

⁶Vɔ̀a, wò na jèsìdo àmè kèwo vɔ̃na wòa, àleke be woa teŋu si, lè àmè kè le dà àŋùtua nu. Ènu bɔ̀ kpoo

⁷Xɔ̀ na mi, ne wòa kpe ɖo mia ŋuti ku àpo ɖùsi-lɔ sɛ̃sɛ̃a, àleke be wòa hlùɛ̃ àmè kèwo wò lɔ̃a gã!

⁸Mawu le gblɔ̃ so yebe kɔ̀kɔ̀ɛpea be: “Mù la sɔ jiɖùɖu ma Sikɛ̀m be èdùa, eye mù la jije Sukɔ̀t be Bàlìa.

⁹Tɔ̀ nyè ye nyi Gilead be ànyigbã a, eye tɔ̀ nyè ke nyi Manasè be ànyigbã cã. Efràyim be ànyigbã a nyi ègà-kuku lè èta na mù. Eye Yudà be ànyigbã nyi àpe àtikplɔ.

¹⁰Mòab be ànyigbã nyi àpe èsì lèle be àdàwa. Mù ɖo àfɔ̀ èta ji na Edɔ̀m be dùkɔ̃a. Eye mù do jiɖùɖu be àpa lè Filistì be ànyigbã ji.”

¹¹Àmè kɛ ye la kplɔ̀ mù yì àgbògbò be èdùa mè? Àmè kɛ ye la kplɔ̀ mù kaka yì Edɔ̀m be ànyigbã ji?

¹²Aò, Mawu! Mu nyi èwò ye òa? Mu nyi èwò Mawu kè gbe mi, eye wò mu gbà kplɔ̀nà miabe àhùakɔ̃wo to òa ye à?

¹³Va xɔ̀ na mi jro! Kpã ŋùkɔ̀ miabe kɛ̃tɔwo. Ɖoa, àgbètɔ be àlɔ̀doa, ènu gbalo be nyi!

¹⁴Mawu ye mi la sɔ ɖùji, eye Mawu ye la ɖo àfɔ̀ miabe kɛ̃tɔwo ji!