Read gen Èhàwo 61 Bible Online

Èhàwo 61 - gen bible

Èhàwo 61

¹David be Èhà, na hàsìnɔ̀ gãa. Wo la jì ì ku kàsãŋùgu.

²Aò Mawu, sè àpe àlenana! Ɖo èto àpe kuefã!

³So kaka ànyigbã be nukpòpe ke ye mù le fã yɔ wò so, wàlɛbɛ kè èjì nyè gbɔjɔa. Kplɔ̀ mù yì àkpã kè yì ji, ye nyè mu la teŋu sù òa, ji.

⁴Ɖoa, èwò ye nyi àpe bèbèpe, àgbògbò sɛ̃sɛ̃ kè gla mù, kpã ŋùkɔ̀ kɛ̃tɔa.

⁵Mù jro la nɔ̀ àpo kɔ̀kɔ̀ɛpea, kaka sɔ yì, ne ma bè ɖo àpo àwàwo be wawlape. Ènu bɔ̀ kpoo

⁶Aò Mawu, ekè wò sè àpe àjɔ̀gbè fìãfiãa, wò sɔ ècrɔ̃nu kè wò nana àmè kèwo sina wòa, do àsi na mù.

⁷Dà àzã ɖo èfìɔ be àgbènɔ̀-zãwo ji, ne yebe àgbènɔ̀nɔ be èpèwo ne sùgbɔ ɖo ji.

⁸Ne ɖùfìɔ lè Mawu be ŋùmè kaka sɔ yì! Sɔ màje ku ànùkua li ì ɖotè

⁹Eye mù la nɔ jì kafu-ha na àpo nyikɔ tɛ̀gbɛ̀. Eye mù la nɔ na àjɔ̀gbè fìãfiã nyèa be ènu gbè sia gbè.