Read gen Èhàwo 7 Bible Online

Èhàwo 7 - gen bible

Èhàwo 7

¹David be èfũlòha. E jì ì na Tɔhonɔ̀ ɖo hɛ̃nu kè so Bɛnyamìn be kɔ̀ta mèa ta.

²Tɔhonɔ̀ Mawu nyè, èwò ye nyi àpe ètabèpe. Hlùɛ̃ mù gã, ɖè mù to lè àmè kèwo le tĩ yo nyè mèawo si.

³Mu nyi nène òa, wo la trɛ̃ mù sìgbè àlekè jãŋùta trɛ̃na ènu nène. Ne wo sɔ mù yìa, àmè ɖekpe mu la teŋu va hlùɛ̃ mù ò.

⁴Tɔhonɔ̀ Mawu nyè, mù wɔ̀ ènu bàɖà ɖe a? Mù wɔ̀ màjɔ̀ màjɔ ɖe ɖo àmèwo ŋutia?

⁵Mù sɔ àlɔ̀ ŋùgbe sɔ do àkpe na àmè kèwo wɔ̀ ènyuɛ̃ na mù a? Mù tĩ yomè na àmè kè do àyà na mù àgɔ̀ ɖe màjea?

⁶Ne mù wɔ̀ ekèawoa, eŋuã na ne kɛ̃tɔ ne tĩ yo nyè mè, gbà le mù. Ne bèa ɖiki àgbè nyèa eye bèa dɔ̃ bùbu nyèa lè ɖiɖɔɛ mè.

⁷Tɔhonɔ̀ sitè, ne wòa ɖè àdɔ̀mèze wòa fiɔ. Sitè ɖo kɛ̃tɔ nyèwo be jìbi ŋuti. Èwò kè ɖo jɔ̀jɔɛ ànyi a, fɔ̃ ne wòa xɔ̀ na mù.

⁸Dùkɔ̃wo ne bɔ̀ trɔ do wò gòdò. Eye so èjia, ɖè àpo ŋusɛ̃ fiɔ wo lè èdò.

⁹Tɔhonɔ̀ èwò kè ɖona kòjo na dùkɔ̃woa, sò ènyà na mù. Mù wɔ̀ ànùkua na wò eye mù nyi ɖemànyatɔ.

¹⁰Nɔ̀tè ènu bàɖà kè àmè nyrãhũwo le wɔ̀a. Èwò ye jrònà àmè be susu kudo èjrowo mè kpɔ, èwò ànùkua Mawu, do ŋusɛ̃ àmè kè le sè ètonu na wòa.

¹¹Mawu ye nyi àkpoxɔ̀nu kè cɔ̃ èji nyèa. E hlùɛ̃nà àmè kè ɖo èjìmè kɔ̀kɔ̀ɛ.

¹²Mawu ɖona kòjo lè ànùkua mè, vɔ̀a, e teŋu do àdɔ̀mèze gbè sia gbè.

¹³Ne kɛ̃tɔa mu trɔ yebe àgbè nɔ̀nɔ òa, e le ɖa yebe èwuia, e le xa yebe àŋùdàtia eye e jɔ̀ ɛ̀ ɖotè.

¹⁴E le jrà èlãnu kèwo wùnà àmèawo ɖo ɖɛ, e le do èzò àŋùti kèwo la yì ɖè èzò do ènuwo mèawo nu.

¹⁵Kpɔɖa, ènu bàɖà wɔ̀wɔ be èfu le ɖù ì, e fɔ bùsu be èfu, eye e la jì àjèɖàɖa.

¹⁶E le kù èdo wɔ̀ ègũ ɖe, vɔ̀ e la jè èmɔ̃ kè ye ŋutɔ tre dà ɖɛa mè.

¹⁷Ènu bàɖà kè e jràɖo ɖɛa, la trɔ jè ye ŋutɔ be èta ji, yebe èkunyànyrã la trɔ kɔ̀ ɖo ye ŋutɔ be ètatrè ji.

¹⁸Mù la do àkpe na Tɔhonɔ̀, ɖo e nyi ànùkuamè, mù la mlã Tɔhonɔ̀, èji hũitɔa be nyikɔ.