Read gen Èhàwo 71 Bible Online

Èhàwo 71 - gen bible

Èhàwo 71

¹Aò, Tɔhonɔ̀, èwò ye mù sɔ wɔ̀ bèbèpe. Mù gbà na èŋù ne kpɛ̃ mù, kaka sɔ yì ò!

²Xɔ̀ na mù, ne wòa sɔ jɔ̀jɔɛwɔ̀wɔ wòa hlùɛ̃ mù! Bɔ̀bɔ̀ èto ɖoɖa gbɔ nyè, ne wòa hlùɛ̃ mù gã.

³Nyi àkpã kè la nɔ wla mù, kè gbɔ mù la nɔ si yì wè sia wèa. Ɖè ègbè, ne wòa hlùɛ̃ mù gã, ɖoa, èwò ye nyi àkpã ku àgbògbò na mù.

⁴Aò, Mawu nyè, xɔ̀ mù lè àmè vuɛ̃wo si. Ɖè mù lè àmè nyrãkuwo simè. Hlùɛ̃ mù so àmè kpòtoewo si.

⁵Ɖo Tɔhonɔ̀, èwò Mawu ye nyi àpe ŋùɖo, so kaka àpe ɖèvi mèa, èwò ɖèka ŋuti kpò ye mù donajì ɖo.

⁶So kaka ènɔ̀ nyè be àdɔ̀mè kea, èwò ye mù sɔ àpe jìdo na. Èwò kè ɖè mù to lè ènɔ̀ nyè be àdɔ̀ mèa, mù la nɔ̀ kafu wò tɛ̀gbɛ̀!

⁷Àmè sùgbɔ sɔ mù wɔ̀ àhovì be kpɔwɛ, vɔ̀a, èwò ye nyi àpe bèbèpe àdodoe.

⁸Ènu nyè mè ɖɔ ku àpo kafu, eye mù la nɔ mlã àpo gogo gbè sia gbè.

⁹Mù gbà gble mù ɖɛ, fifì kè mù sĩa ò. Wàlɛbɛ kè ŋusɛ̃ nyèwo le gble mù ɖɛa, èwò yaa, mù gbà gble mù ɖɛ ò.

¹⁰Ɖo, kɛ̃tɔ nyèwo le gblɔ̃ àpe ènyà. Àmè kèwo le ɖia hùenu kè wo la ɖè àpe àgbè joa, wo le blase ɖo ŋuti nyè.

¹¹Wo le gblɔ̃ be: “Mawu gble è ɖɛ! Mì doxa na ɛ̀, ne mìa le è! Àmè ɖekpe mu la yì xɔ̀ na ɛ̀ ò!”

¹²Aò Mawu, mù gbà dɔ̃ yì àzɔ̀ge lè ŋuti nyè ò! Aò Mawu nyè, ɖèbla va xɔ̀ na mù!

¹³Àmè kèwo jro la crɔ̃ àgbè nyèa nu ne ci, ɖo ŋùkpɛ̃ mè. Àmè kèwo le ji èvuɛ̃ na mù a ne ci èvlododo ku ègbɔɖìɖi mè.

¹⁴Ènyè yaa, èmɔ̃kpɔkpɔ lè àsi nyè kòkòkò! Eye mù la gbà nɔ mlã àpo kàfù kafu ɖo ji kpe è!

¹⁵Ènu nyè la nɔ ɖè àpo jɔ̀jɔɛwɔ̀wɔ fiɔ, to e gbɔ be nyè mu nya woabe ègbɔsùsu ò cã a, ènu nyè la nɔ kãkã àpo hlùɛ̃gã, ŋùkèkèwo kpata!

¹⁶Mù la kpɔ gomè lè Tɔhonɔ̀ be wɔ̀na gãwo mè, mù la ɖè gbèfã àpo jɔ̀jɔɛwɔ̀wɔ ɖèka pɛɛ kpò.

¹⁷Aò Mawu, so kaka àpe ɖèvimè kea, wò kpla mù. Eye, kaka va na egbèa, mù la ɖè àpo ŋùdãnu wɔ̀wɔwo fiɔ.

¹⁸To e gbɔ be mù sĩ, eye mù fũ èwà cã a, aò Mawu, mù gbà gble mù ɖɛ, kaka na hùenu kè, mù la ɖè àpo ŋusɛ̃ fiɔ jìjimè kèwo la vaa, kaka na hùenu kè, mù la ɖè àpo èdɔ gãgãwo fiɔ jìjimè kèwo keŋu la jè woa yomè a ò.

¹⁹Oò Mawu, èwò kè wɔ̀ ènu gãwoa, àpo jɔ̀jɔɛwɔ̀wɔ lòlò kaka tɔ jiŋùkusi boo. Oò Mawu, àmè kɛ ye la teŋu sɔ̀ ku wò?

²⁰To e gbɔ be wò na mù kpefũ veveɖe, eye mù ɖù àyà sùgbɔ cã a, èwò ŋutɔ kpò ye la gbà gbɔ̀ mù àgbè, eye wò la gbà ɖè mù to va ji, so ànyigbãa be ètùmè ke.

²¹Wò la gbà do bùbu, bùbu ji na mù, eye wò la gbà fa àkɔ na mù.

²²Eye mù la sɔ sãŋùgu, la jìhà, sɔ kafu àpo ànùkuawɔ̀wɔ. Oò Mawu nyè, mù la jìhà, sɔ mlã àpo ànùkuawɔ̀wɔ. Oò èwò, Izràɛl be kɔ̀kɔ̀ɛtɔa!

²³Ènyè kè be àgbè wò hlùɛ̃a, ènuyu nyèwo la sò àyo, la do àpa, sɔ jì jìjɔɛ-ha, sɔ kafu wò!

²⁴Ɛ̃ɛ, àɖe nyè la nɔ pò nupo gbè sia gbè, so àpo jɔ̀jɔɛwɔ̀wɔ ŋuti. Ɖoa, àmè kèwo ye le ji èvuɛ̃ na mù a wo titɔ, eye wo ɖù ŋùkpɛ̃.