Read gen Èhàwo 72 Bible Online

Èhàwo 72 - gen bible

Èhàwo 72

¹Salomɔ̀n be Èhà. Aò Mawu, sɔ àpo jɔ̀jɔɛsòso do àsi na èfìɔa, eye sɔ àpo jɔ̀jɔɛwɔ̀wɔ do àsi na èfìɔvia.

²Ne bea sɔ jɔ̀jɔɛwɔ̀wɔ kplɔ̀ dùkɔ̃ wòa, eye bea le àpo àyàɖùviwo, àleke e jèa.

³Ètowo ne hɛ̃ ɖàgbè va na dùkɔ̃ wòa, eye ètokɔ̃ɛwo ne hɛ̃ jɔ̀jɔɛwɔ̀wɔ be nuku va na ɛ̀.

⁴Ne xɔ̀ ènyà ɖo dùkɔ̃a mè be àyàɖùviwo nu, eye ne hlùɛ̃ èhiãtɔnɔ̀wo be èviwo gã. Ne tùkù àyàdonamètɔa hãnyà hãnyà!

⁵Kaka kè èwè ku wètri la gbe nɔ klɛ̃ kpòa, wo la nɔ si wò, so jìjimè yì jìjimè!

⁶Èfìɔa ne nɔ̀ ɖiɖi sìgbè èji kè jà kɔ̀ ɖo ègbe wɛwlɛ jia nène, sìgbè àhũ kè le wusì ànyigbã a nène.

⁷Lè yebe èfìɔ ɖùɖu zãwo mèa, àmè jɔ̀jɔɛwo la jì ɖo ji, Kaka na hùenu kè wètri mu la gbà nɔ̀ ànyi òa!

⁸Ne ɖùfìɔ, so àpù ɖe gbɔ, yì àpù bu gbɔ! Ne ɖùfìɔ, so Efratà be ètɔ̀a gbɔ, yì ànyigbã be nukpòpewo!

⁹Zògbè ji nɔ̀tɔwo la jèɖɛ̀ na ɛ̀, yebe kɛ̃tɔwo la sɔ ŋùmè tù èkɔ mè.

¹⁰Tarsìs be èfìɔwo ku èfìɔ kèwo lè dìdìpe be ètɔ̀dòmèkɔ̃ɛ̃wo jia, la hɛ̃ nunanawo va na ɛ̀. Sabà ku Sebà be èfìɔwo la hɛ̃ ènunanawo va na ɛ̀.

¹¹Èfìɔwo kpata la va bɔ̀bɔ̀ lè ŋùkɔ̀ na ɛ̀, dùkɔ̃wo kpata la va sumɔ ɛ̀.

¹²Ɖo, e la xɔ̀ na èhìãtɔ kè le na àlea. Ɛ̃ɛ, e la xɔ̀ na àmè kè lè vevesèse mè, vɔ̀a, mu ɖo xɔ̀namètɔ òa.

¹³E la ku ŋuzĩzĩ na èhìãtɔ ku àmè kè mu ɖo ŋusɛ̃ òa. E la hlùɛ̃ èhiãtɔwo ku wɔ̀amènɔ̀wo be àgbè gã.

¹⁴E la hlùɛ̃ èta na wo, lè àmè kèwo zĩna àmè ɖoto ku àmè kèwo sɛ̃natamèawo si. Ɖoa, woabe èhũ xɔ̀ àsì na ɛ̀.

¹⁵Èfìɔa ne nɔ̀ àgbè dìdi! Wo ne sɔ Sebà be sìka va na ɛ̀! Àmèwo ne nɔ fãkue ɖo e ta tɛ̀gbɛ̀, eye woa nɔ tu sì na ɛ̀ gbè sia gbè!

¹⁶Èlù ne gbã ble èdùa be ànyigbã a keŋu ji! Èlùgbleawo ne ɖɔ ètowo tamè, ne woa nɔ hizi! Woabe ènukuwo be èsepòpowo ne jè, ne woa hũ. Woa ɖo àcɔ, sìgbè àlekè Libàn be ànyigbã a nya kpɔkpɔa nène! Ènukuawo ne ɖɔ lè èdùawo mè, sìgbè ègbe lè ànyigbã ji nène!

¹⁷Yebe nyikɔ ne nɔ ɖì tɛ̀gbɛ̀, eye kaka kè èwè gbe le hũ kpòa, ne nɔ sĩ ɖo ji. Dùkɔ̃wo keŋu la xɔ̀ sìtu to e ji, eye woa keŋu, wo la nɔ yɔ ɛ̀ be sìtume.

¹⁸Woa kafu Tɔhonɔ̀ Mawu, Izràɛl be Mawu a! Mawu ɖèka kè wɔ̀nà ŋùdãnuwoa!

¹⁹Sìtu ɖèɖe ye nyi yebe gogo be nyikɔa tɛ̀gbɛ̀! Ànyigbã bliboa ne ɖɔ ku yebe gogo! Àmèn, Ɛ̃ɛ ne va e mè!

²⁰David, Jesè be èvia be kuefãawo vɔ̀ ɖo fikèa.