Read gen Èhàwo 73 Bible Online

Èhàwo 73 - gen bible

Èhàwo 73

¹Àsaf be Èhà Ɛ̃ɛ, Mawu kɔ̀nà àdɔ̀mè ɖo Izràɛlviwo ŋuti nyàwo! Ɛ̃ɛ, e kɔ̀nà àdɔ̀mè ɖo àmè kèwo be èjì mè kɔ̀a ŋuti!

²Gãkea, ènyè yaa, àfɔ̀ nyèwo ɖiɖi kloe! Kpɔ̀tɔ̀ viɖe kpò, ne ma trã èmɔ̃ keŋu-keŋu!

³Ɖoa, mù hùãŋu do àdègbèpòtɔwo, wàlɛbɛ kè mù kpɔ be ènu le nyɔ na àmè vuɛ̃woa.

⁴Wo mu sènà vève ɖekpe, kaka va sɛ̃ èku mè ò. Woabe pòdowo do àmì.

⁵Wo mu kpena èfũ sìgbè àmè buwo nène ò, eye àyàɖùɖuwo tona woa ŋuti va yì.

⁶Ekèa na be jajra zũ jònu lè èkɔ̀ na wo, Eye èhũnyànyrã trɔ zũ àwù wo dona.

⁷Woabe ŋùkuviwo hɔ̃ lè àkpà do àmìwo mè, Eye èvuɛ̃ mà-ɖo sɛ̃pe kè lè woabe èjìwo mèa, le klɛ̃ lè woa mè.

⁸Wo sɔ vivisèse le ɖè àlɔmè so èvuɛ̃ wɔ̀wɔ ŋuti, Eye wo sɔ ègòyiyi le kã àtãŋu be yèwo la zĩ àmè ɖo ànyi.

⁹Wo sɔ ènu le dovlo Mawu lè jiŋùkusi, Wo sɔ àɖe le gble xixea.

¹⁰Ekèa ŋuti ye woabe àmèwo trɔ ɖoɖa woa gbɔ ɖo, Eye wo kè èvemè, le nù èsì glùglùglù.

¹¹Wo gblɔ̃nà be: “Àleke ye Mawu la wɔ̀, nya ò? Àleke Èji hũitɔa la nya ɖo ò?”

¹²Kpɔɖa, lekea ye àmè vuɛ̃wo lè, wo vò, bɔ̀ àdɔ̀kùnu ɖo àdɔ̀kùnu ji!

¹³Vɔ̀a, ènyè yaa, nyàwo be nyi be mù le èjì nyè ɖɛ kɔ̀kɔ̀ɛɖe gbalo gbalo, eye mù klɔ àlɔ̀ nyèwo ɖɛ, èvuɛ̃ mà-ɖo.

¹⁴Gãkea, mù kpenafũ gbè sia gbè, eye ètodɔ̃ lè na mù, ŋùdekɛ̃nyɛ sia ŋùdekɛ̃nyɛ.

¹⁵Ne mù gblɔ̃ be: “Nyè cã, mù la pò nupo sìgbè woawo ke nènea”, kpɔɖa, e la kè nyi àgɔ̀jèje na mù, lè èvi wòwo be jìjimèviwo dòmè.

¹⁶Wàlɛbɛ kè mù jè àgbàgba be ma sè ekèawo keŋu gɔ̃mèa, e jo nyi tamèbùbu gã ɖe na mù,

¹⁷Kaka na gà kè mè mù la gɛ̃ ɖo Tɔhonɔ̀ be Nɔ̀pe Kɔ̀kɔ̀ɛ, gbɔ̀xue mù la va mɔ̀nu jè woabe ènuwuwu ŋuti.

¹⁸Nyàwo be nyi be tèpe kè le ɖiɖia, ye wò dà wo ɖo. Wò sɔ wo xla ɖo ànyi, ne woa crɔ̃.

¹⁹Leke ye àvò pò wo, eye, zè ɖèka kpòa, wo crɔ̃! Vɔ̃vɔ̃ na wo crɔ̃ gbidi-gbidi!

²⁰Wàlɛbɛ kè wò sitèa, Oò, Tɔhonɔ̀! Wo bu keŋu-keŋu, sìgbè èdrɔ̃ kè àmè ku, eye èŋù kèa nène.

²¹Wàlɛbɛ kè vevesèse ɖɔ èjì nyè mè, eye èkla nyèa ɖɔ ku àkpɔ̃a;

²²ènyè, àmètia, mù titɔ, eye, sìgbè ègbemèlã lè àpo ŋùku mè nènea, nyè mu le sè ènu ɖekpe gɔ̃mè ò!

²³Gãkea, ŋuti wò kpò mù gbà kù ɖo, eye wò le ɖùsi-lɔ nyè ɖo àsi.

²⁴Wò sɔ ètopòɖo le fiɔ mù àfɔ̀ɖope, eye, memlɛ̃nua, wò la xɔ̀ mù ku gogo.

²⁵Àmè kɛ ye lè àsi nyè lè jiŋùkusi, tovò lè ŋuti wò ò? Wàlɛbɛ kè mù lè ku wòa, nyè mu le ji ènu ɖekpe lè ànyigbã ji ò.

²⁶Àpe ŋutilã ku àpe susu teŋu gbɔjɔ, gãkea Mawu ye nyi àpe èjì be ŋusɛ̃, Mawu ye nyi àpe ècrɔ̃nu kòkòɖàbì.

²⁷Ɖo kpɔɖa, àmè kèwo gble wò ɖɛawo be dòmè la gble, eye wò la crɔ̃ àmè kèwo keŋu trɔ lè yo wò mèa.

²⁸Vɔ̀a, ènyè yaa, àpe nyɔna ye nyi be ma nɔ̀ àpe Mawu gbɔ. Tɔhonɔ̀ Mawu ye mù sɔ wɔ̀ àpe bèbèpe, àleke be, ma ɖè yebe èdɔwɔ̀wɔ kpata fiɔ.