Read gen Èhàwo 74 Bible Online

Èhàwo 74 - gen bible

Èhàwo 74

¹Àsaf be ènufiɔfiɔ be Èhàlo jìji. Aò Mawu, nukɛ ŋuti ye wò gbe mi, veveɖe lekea ɖo ò? Nukɛ ŋuti àpo àdɔ̀mèzea le sɛ̃ŋu, ɖo mia èlã kèwo lè àpo èlãnyìpea ŋuti ɖo ò?

²Ɖoŋù dùkɔ̃ ke wò xɔ̀ plè so blèmà kea, kɔ̀ta kè wò hlùɛ̃gã, sɔ wɔ̀ ècrɔ̃nua. Ɖoŋù Ziɔ̀n-to kè ji wò ɖo nɔ̀pe ɖoa.

³Zɔ̃ yì glìkpo gbãgbã mà-vɔ kèawo dòmè, kɛ̃tɔa va gbã ènuwo keŋu lè kɔ̀kɔ̀ɛpea.

⁴Àpo kɛ̃tɔwo lè xlɔ̃, lè tèpe kè tutu wò donagò mù lèa, eye wo sɔ woabe àplãŋuga do è jèsìdo.

⁵Wo le wɔ̀ sìgbè àmè kèwo le kɔ èfiɔ yì ji, la mù àti tìtriwo nène,

⁶wàlɛbɛ kè wo sɔ èfiɔ ku èkpòwo, le gbã àti-ɖàŋùdɔ̀wɔ̀wɔ ku hɔ̃truwo.

⁷Wo tɔ èzò kɔ̀kɔ̀ɛpe wòa. Wo dovlo eye wo gble èkɔ̀ na nɔ̀pe kè ŋuti nyikɔ wò lèa.

⁸Wo gblɔ̃ lè woabe èjìwo mè be: “Mi la nɔ̀ èdu, la gbã wo keŋu-keŋu.” Eye wo tɔ èzò tèpe kèwo wo sɛ̃nà Mawu lè, lè ànyigbã jia kpata.

⁹Mi mu gbà le kpɔ miabe jèsìdo ɖekpe ò. Gblɔ̃ɖɛtɔ ɖekpe mu gbà kpɔ̀tɔ̀ ò. Mia dòmètɔ ɖekpe mu nya kaka na gà kè mè, ekèa nu la va yì ò.

¹⁰Aò Mawu! Kaka na gà kɛ mè kɛ̃tɔ wòa la kpɔ̀tɔ̀ nɔ kò wò ò? Eŋuã kɛ̃tɔa la gbà nɔ dovlo nyikɔ wò kaka sɔ yìa?

¹¹Nukɛ ŋuti wò mu le gblɔ̃ ènyà ɖekpe ò. Wò bla àlɔ̀ wòwo ɖo ŋuti kpòa!

¹²Gãkea, èwò ŋutɔ, èwò Mawu ye nyi èfìɔ nyè, so kaka jɔ̀jɔmè ke. Èwò ye nana jiɖùɖu, hlùɛ̃gã lè ànyigbã ji.

¹³Èwò ye sɔ àpo ŋusɛ̃ fɛ̃ àpù, eye be ma ɖo èvè. Èwò ye gbã èta na blòsò ɖo vɔ̃vɔ̃wo lè àpùwo mè. Èwò ye kãkã èta na èlãgã jiŋɔa.

¹⁴Eye wò sɔ ɛ̀ wɔ̀ ènuɖùɖu na zògbè be èlãlenuwo.

¹⁵Èwò ye hũ ènu na èsì jɔ̀pewo ku èsì sopewo, vɔ̀a, wò gbà puna ètɔ̀ màpu gbèɖewo.

¹⁶Tɔ̀ wò ye nyi ŋùkèkè, eye tɔ̀ wò ke nyi èzãa. Èwò ye ɖo nɔ̀pe na wètri, èwò ke ɖo nɔ̀pe na èwè.

¹⁷Èwò ye ɖo lipòwo keŋu na ànyigbã a. Èwò ye ɖo zòzo hùenu, èwò ke ɖo àvìvɔ hùenu!

¹⁸Ɛ̃ɛ, Tɔhonɔ̀ ɖoŋù ì be, èwò ye kɛ̃tɔa dovlo, Tɔhonɔ̀ be nyikɔ ŋuti ye yɛ̀yìnɔ̀wo le ɖè àlɔ̀mè lè!

¹⁹Tɔhonɔ̀, mù gbà sɔ àhɔ̃ne wòa be àgbè do àsi na ègbemèlãwo ò! Tɔhonɔ̀, mù gbà ŋlɔ̀be dùkɔ̃ wò kè le ɖù àyàa be àgbè kaka sɔ yì ò!

²⁰Ɖo ŋùku zòɖùɖu wòa ji, ɖoa, tamèsɛ̃sɛ̃ ɖɔ ànyigbã be wawlapewo keŋu.

²¹Mù gbà bɔ̀nu ne woa nɔ do ŋùkpɛ̃ àmè kè wo le tɛ ɖo èto ò. Wɔ̀amènɔ̀wo ku èhiãnɔ̀wo keŋu ne nɔ kafu nyikɔ wò!

²²Aò Mawu sitè! Sitè ne wò ŋutɔ, wòa xɔ̀ ènyà ɖo ɖokoe wò ta! Ɖoŋù be yɛ̀yìnɔ̀wo le ɖè àlɔ̀mè lè ŋuti wò wè sia wè!

²³Mù gbà ŋɛ̃ ŋùku pu kɛ̃tɔ wòwo be àbòbowo ji ò! Mù gbà bɔ̀nu do kɛ̃tɔ wòwo be àpadodo kèwo le yì e jia, ji ò!