Read gen Èhàwo 76 Bible Online

Èhàwo 76 - gen bible

Èhàwo 76

¹Àsaf be Èhà, Na hàsìnɔ̀ gãa. Wo la jì ì ku èkàsãŋùgu.

²Yudà nyigbã ji ye wo jèsi Mawu lè. Yebe nyikɔ lòlò lè Izràɛl nyigbã ji.

³Yebe sɛ̃pe likè ɖo Salɛ̀m, eye Ziɔ̀n ye nyi yebe nɔ̀pe.

⁴Funua ye be ŋɛ̃ àŋùti kè wo sɔ dà èzòa lè. Funua ye be gbã kɛ̃tɔa be àkpoxɔ̀nu lè. Funua ye be flì kɛ̃tɔa be èwui lè, eye be ci àhùawɔ̀nuwo keŋu be èzò. Ènu bɔ̀ kpoo

⁵Wò le klɛ̃ ku gogo, eye wò ɖìnyi wu èfìɔwo keŋu wàlɛbɛ kè wò ɖì so kɛ̃tɔwo be cɔ̃crɔ̃ toa jia.

⁶Wò hlà ènu lè ŋusù kãlìwɔ̀tɔ kèawo si, wo ci àgba eye wo dɔ̃ woabe èku-lɔ̃. Àhùawɔ̀tɔ kèawo dòmètɔ ɖekpe mu gbà nya àlekè e la zã yebe àlɔ̀a cã ò.

⁷Ekè wò klɛ̃ ŋùkua, oò Yakɔb be Mawu, èsɔawo cã, àhùa kèkeawo cã ci tèpe ɖèka.

⁸Èwò ɖèka kpò ŋuti vɔ̃vɔ̃ lè. Ne wò do àdɔ̀mèzea, àmè kɛ ye la teŋu nɔ̀tè lè àpo ŋùku mè ò?

⁹Ekè wò na wo sè àpo jɔ̀jɔɛsòso so jiŋùkusia, Àdìka sò ànyigbã jitɔwo, eye èɖa ɖo see.

¹⁰Wàlɛbɛ kè èwò, Mawu, wò sitè, la sò jɔ̀jɔɛ, la hlùɛ̃ ànyigbã jitɔ kèwo keŋu wo le tɛ ɖo ètoa. Ènu bɔ̀ kpoo

¹¹Ɛ̃ɛ, àgbètɔwo be àdɔ̀mèze dodo ŋutɔ cã, nana wò gogo. Eye àmè kèwo ci àdɔ̀mèze dodo mèa, wo la tà èfũlòvɔ.

¹²Ne mì fìã àjɔ̀gbè na Tɔhonɔ̀, mìabe Mawu a mì wɔ̀ ɖo e ji. Àmè kèwo keŋu trɔ do è gòdòa, mì hɛ̃ ènu nana va na àmè kè jè na sisia.

¹³Ɖoa, e ɖiɖina èfìɔviwo be gòyiyi, eye be dona vɔ̃vɔ̃ na ànyigbã ji be èfìɔwo.