Read gen Èhàwo 77 Bible Online

Èhàwo 77 - gen bible

Èhàwo 77

¹Àsaf be Èhà, na hàsìnɔ̀ gãa. Wo la jì ì ɖo Yedutùn be ègbè ɖìɖi ji.

²Mù do àpa fã yɔ Mawu, be ne sè àpe ègbè. Mù do àpa, fã yɔ Mawu, be ne xɔ̀ na mù.

³Wàlɛbɛ kè àgbɔ̃ ciji na mù a, mù ji èmɔ̃ na Tɔhonɔ̀. Ne èzã do a mù kɔna àbɔ yì ji, èjɛ̃ màgbɔ̃, eye èkla nyè gbena be wo mu gbà fa àkɔ na yè ò.

⁴Mù bùnà àpo èta mè, aò Mawu! Eye mù ŋɛ̃nà. Ne mù le dèŋùgblèa, sùsu nyè gbà titɔna kpe è. Ènu bɔ̀ kpoo

⁵Wo le ŋùku nyèwo ɖotè. Mù titɔ àleke be ènu pòpo glo mù.

⁶Mù bù gbèɖegbè ŋuti kpɔ, mù bù blèmà be èpèwo ŋuti kpɔ.

⁷Ne èzã do a, mù ɖonaŋù àpo èhà, èjì nyè yìnà ye ɖokoe mè kpɔ. Eye sùsu nyè biɔna ye ɖokoe sè be:

⁸Eŋuã Tɔhonɔ̀ la sɔ mi dãŋùgbe godoa? Mu la gbà ɖè yebe àdɔ̀mè nyuɛ̃ fiɔ gbèɖe òa?

⁹Eŋuã yebe ànùkua wɔ̀wɔ màgũa bu gbidia? Yebe àjɔ̀gbèa gũ kaka sɔ yìa?

¹⁰Eŋuã Mawu ŋlɔ̀be be yè la ku ŋuzĩzĩa. Àlo àdɔ̀mèze be sɔ tu àgbo do yebe èjìa? Ènu bɔ̀ kpoo

¹¹Ɛ̃ɛ, mù le gblɔ̃ ɛ̀ be: ekèa mè ye vevesèse nyèa so, ɖoa, Èji hũitɔa be àlɔ̀ trɔ lè yo nyè mè!

¹²Gãkea, mù la gbà nɔ ɖoŋù Tɔhonɔ̀ be wɔ̀na gãwo! Ɛ̃ɛ, mù la nɔ ɖoŋù àpo gbèɖegbè be wɔ̀na gãwo!

¹³Mù la nɔ dèŋùgblè so àpo kãlĩdɔwo keŋu ŋuti, eye mù la nɔ hlɛ̃ wo kpɔ ɖèka-ɖèka.

¹⁴Aò Mawu, èmɔ̃ wòwo lè kɔ̀kɔ̀ɛ loò! Vòdu kɛ ye lòlò, la teŋu sɔ̀ ku miabe Mawu ò?

¹⁵Èwò ye nyi Mawu kè wɔ̀ nùdãnuwoa. Wò ɖè ŋusɛ̃ wò fiɔ lè dùkɔ̃wo dòmè.

¹⁶Wò sɔ àpo àlɔ̀ sɛ̃sɛ̃a jo dùkɔ̃ wò, kè nyi Yakɔb ku Yosɛ̀f be jìjimè viwoa. Ènu bɔ̀ kpoo

¹⁷Aò Mawu, ètɔ̀wo kpɔ wò. Ɛ̃ɛ, ekè ètɔ̀awo kpɔ wòa, Mawu, vɔ̃vɔ̃ jè woa ji eye wo titɔ gbà hũhũ! Ègũ cicri kèwo lè gɔ̃mè na woa ŋutɔ cã titɔ!

¹⁸Liliwo ɖùɖù èsì kplòkplòkplò kɔ̀ ɖo ànyi. Èji ɖè ègbè lè lilikpowo mè, eye àpo àŋùtiwo le kè èzò kãkã ɖo ègbe.

¹⁹Ekè èji wòa ɖè ègbèa, bìɖàwo kè èzò lè xixea mè, àdìka sò ànyigbã a eye e hũhũ!

²⁰Àpo àfɔ̀wo ɖè èmɔ̃ to àpùa mè. Àpo àfɔ̀topewo zɛ̃ èsì gãawo, gãkea, àmè ɖekpe mu teŋu jèsi àpo àfɔ̀ɖope ò.

²¹Mosè ku Arɔ̀n ji wò to, eye wò ŋutɔ wò kplɔ̀ àmèha wòa sìgbè àleke wo kplɔ̀nà èlãha nène.