Read gen Èhàwo 79 Bible Online

Èhàwo 79 - gen bible

Èhàwo 79

¹Àsaf be Èhà. Aò Mawu, àgblìnɔ̀wo va bɔ̀ cɔ̃ àpo ècrɔ̃nua. Wo dovlo àpo mawuxɔ kɔ̀kɔ̀ɛa eye wo gbã Yèruzàlɛm be èdùa.

²Wo sɔ sumɔ̃vi wòwo be ŋutilã kukuwo na jiŋùkusi be xèviwo ne woa ɖù. Wo sɔ ànùkuamè wòwo be àmèkpòtiwo na ànyigbã ji-lãwo ne woa ɖù.

³Eye wo kɔ̀ woabe èhũ ɖɛ sìgbè èsì nène trɔ do Yèruzàlɛm be èdùa. Eye àmè ɖekpe mu lè, la ɖì wo ò.

⁴Mi ɖìgbɔ lè miabe àxuekɔ̀tɔwo be ŋùmè. Eye mi ɖì kòkoe na àmè kèwo trɔ do mia.

⁵Aò, Tɔhonɔ̀, kaka na gà kɛ mè ò? Àdɔ̀mèze dodo ji kpò ye wò la nɔ̀a? Kaka na hùe kɛ nu, àdɔ̀mèze kaɖi kaɖi wòa la kpɔ̀tɔ̀ nɔ bì, sìgbè èzò nène ò?

⁶Kɔ̀ àdɔ̀mèze wòa ɖo àgblìnɔ̀ kèwo mu jèsi wò òa ji. Kɔ̀ ɛ̀ ɖo vòdusɛ̃tɔwo be èfìɔɖùpe kèwo mu yɔna nyikɔ wò òa ji.

⁷Ɖoa, wo crɔ̃ Yakɔb be jìjimèviwo, eye wo gbã woabe èdùa.

⁸Aò, mù gbà sɔ mia tɔgbewo be èvuɛ̃wo be èba, pò mi ò. Aò ɖèbla ne wòa ɖè ŋuzĩzĩkuku wòa fiɔ mi! Ɖoa, mi gbɔjɔ keŋu-keŋu, eye wɔ̀na vɔ̀ lè mia ŋuti.

⁹Aò, Mawu, miabe hlùɛ̃tɔ! Na àpo nyikɔ be gogoa, va xɔ̀ na mi! Hlùɛ̃ mi gã, ne wòa tutu miabe èvuɛ̃wo jo, Ɖo àpo nyikɔa be bùbu ŋuti.

¹⁰Nukɛ ŋuti àgblìnɔ̀wo la nɔ gblɔ̃ be: “Fikɛ ye woabe Mawu a lè ò?” Na ne dùkɔ̃wo ne nya lè miabe ŋùmè be, wò biɔna sumɔ̃vi wò kèwo be èhũ wo kɔ̀ ɖɛa, be èhlɔ̃.

¹¹Ègàmènɔ̀tɔwo be àlenanawo ne ɖo gbɔ wò jro! Sɔ àpo àlɔ̀ sɛ̃sɛ̃a hlùɛ̃, àmè kèwo wo sò èku kòjo na a, ɖo àgbè jro!

¹²Tɔhonɔ̀, ɖo èvlo kè miabe àxuekɔ̀tɔwo do wòa, tèpe zè adrɛ̃, na wo!

¹³Ekèa yomè a, mi, àmè kèwo nyi àpo dùkɔ̃a, mi, àmè kèwo nyi èlãha lè àpo èlãkpamèa, mi la nɔ mlã wò tɛ̀gbɛ̀, eye mi la jì àpo kafu-ha, so jìjimè yì jìjimè.