Read gen Èhàwo 80 Bible Online

Èhàwo 80 - gen bible

Èhàwo 80

¹Hàsìnɔ̀ gã be Èhà. Àsaf be Èhà ɖo “Sepòpo ɣe” be ègbè ɖìɖi ji.

²Aò, Izràɛlviwo be àlɛ̃kplɔ̀tɔ, ɖo èto mi. Èwò kè le kplɔ̀ Yosɛ̀f be jìjimèviwo, sìgbè àlɛ̃ha nènea. Èwò kè le ɖùfìɔ lè Kèrubimwo nua, ɖè ɖokoe wò fiɔ.

³Lè Efràyim, Bɛnyamìn ku Manasè be jìjimèviwo be ŋùkɔ̀a, ɖè àpo ŋusɛ̃ fiɔ, ne wòa va hlùɛ̃ mi gã!

⁴Aò, Mawu, gbìgbɔ̀ na mi mɔnukpɔkpɔ yeye. Na àpo ŋùmè ne klɛ̃ ɖo mia ji, ne wòa hlùɛ̃ mi gã.

⁵Tɔhonɔ̀ Mawu, ŋusɛ̃kpatatɔ, Kaka na hùe kɛ nu ye wò la bijì do dùkɔ̃ wòa, eye wò la gbe be yè mu la sè yebe kuefã ò?

⁶Wò sɔ vève sèse wɔ̀ ènuɖùɖu, sɔ nyì wo, eye wò kpe àɖàsì be ètre ɖɔɖɔ na wo, wo nù.

⁷Wò na mi trɔ zũ ènu nyɔŋu na miabe àxuekɔ̀tɔwo, ekèa na be miabe kɛ̃tɔwo le kò mi.

⁸Aò Mawu ŋusɛ̃kpatatɔ, gbìgbɔ̀ na mi mɔnukpɔkpɔ yeye. Na àpo ŋùmè ne klɛ̃ ɖo mia ji, ne wòa hlùɛ̃ mi gã.

⁹Vɛ̃ka kè wo hɔ̃ so Ejiptè be ànyigbã jia, wò nyà dùkɔ̃wo jo, eye wò gbìgbɔ̀ sɔ ɛ̀ dogũ.

¹⁰Wò jrà ànyigbã a ɖo, lè ŋùkɔ̀ na ɛ̀, àleke be ne bèa ɖo èkè, ne bèa xɔ̀ ànyigbã a ji keŋu.

¹¹Yebe fàfa cɔ̃ ètowo ji eye yebe àlɔ̀zɛ̃wo cɔ̃ Mawu be sedàtiwo ji.

¹²E vlũ àlɔ̀ ɖoɖa kaka àpùa[9] Eye yebe èsìa ɖɔ kaka yì ètɔ̀a to.

¹³Aò, nukɛ ŋuti wò mù yebe èkpaa pu ànyi ɖo ò? Ne àmè kèwo keŋu va le yìa wo ne nɔ kɛ̃ yebe èku sɛ̃sɛ̃woa?

¹⁴Ègbehã to so àvemè va le gbìdì ì. Ègbemèlãwo va le ɖù ì.

¹⁵Aò, Mawu ŋusɛ̃kpatatɔ, trɔgbɔ̀ va na mi jro! Ɖè èkɔ̀ so jiŋùkusi, ne wòa kpɔ. Wò ŋutɔ kpɔ vɛ̃-gble kèa ji.

¹⁶Kpɔ ènu kè wò ŋutɔ wò do a ji, èvi kè wò likè goŋu-goŋu na ɖokoe wòa.

¹⁷Wo so è pu ànyi, eye wo fiɔ̃ ɛ̀. Àdɔ̀mèze be ŋùkumè kè wò hlɔ̃a, na wo crɔ̃.

¹⁸Dà àlɔ̀ ɖo èfìɔ kè lè ɖùsimè na wòa ji. Ɖo àgbètɔ be èvi kè wò likè na ɖokoe wòa ji.

¹⁹Eye mi mu la trɔ lè yo wò mè ò. Gbɔ̀ mi àgbè, ne mia nɔ yɔ nyikɔ wò.

²⁰Tɔhonɔ̀ Mawu, ŋusɛ̃kpatatɔ, gbìgbɔ̀ na mi mɔnukpɔkpɔ yeye. Na àpo ŋùmè ne klɛ̃ ɖo mia ji, ne wòa hlùɛ̃ mi gã.