Read gen Èhàwo 81 Bible Online

Èhàwo 81 - gen bible

Èhàwo 81

¹Hàsìnɔ̀ gãa be Èhà. Àsaf be Èhà. Wo la jì ì ɖo Gatviwo be kafu-ha be ègbè ɖìɖi ji.

²Mì sò àyo sɔ kafu Mawu kè nyi miabe ŋusɛ̃a, mì do jìjɔɛ be àpa sɔ mlã Yakɔb be Mawu a.

³Mì tɔ èhũ ku àsihũviwo pòpo, èhɛ ku kàsãŋùguwo ne ɖì kudo èhàgbè viviwo.

⁴Mì ku èzè lè wètri yeyea ji, wàlɛbɛ kè wètri jè àve ji, lè mìabe jìjɔɛ-zã gbèa.

⁵Ɖoa, ekèa nyi èse na Izràɛlviwo, Èse kè Yakɔb be Mawu a do a yeŋu.

⁶Ɖoɖo kè be do àsi na Yosɛ̀f be jìjimèviwo, wàlɛbɛ kè be to, kpã ŋùkɔ̀ Ejiptè be dùkɔ̃a: Wàlɛbɛ kè mi sè ègbè kè gɔ̃mè mi mu sè òa be:

⁷“Mù ɖiɖi àgbãa jo lè yebe àbɔta, eye yebe àlɔ̀wo vò, jo lè àjàfi kpɛ̃kpɛ̃a ŋuti.

⁸Ekè wò fã yɔ mù, lè tùkaɖa mèa, mù xɔ̀ na wò. Mù ɖo e ŋuti lè èji ɖè ègbè mè, eye mù do wò kpɔ lè Meribà be èsìa to. Ènu bɔ̀ kpoo

⁹Dùkɔ̃ nyè, ɖo èto ne wòa sè: Mù la sìa wò, Izràɛl. Ne wò lɔ̃ be yèa ɖo èto mù a.

¹⁰Vòdu bu ɖe mu la nɔ̀ dùkɔ̃ wòa dòmè ò. Wò mu la do èta ègũ na àmèjro be vòdu ò.

¹¹Ènyè ye nyi Tɔhonɔ̀, àpo Mawu, kè kplɔ̀ wò to so Ejiptè be ànyigbã ji. Biɔ mù ènu kè hiã wòa, ne ma na wò[10]

¹²Gãkea, dùkɔ̃ nyè mu ɖo èto àpe ègbè ò. Izràɛlviwo mu lɔ̃ la bɔ̀bɔ̀ woa ɖokoe na mù ò.

¹³Ekèa ŋutia, mù gble wo ɖɛ ku woabe èjì tìtria. Ne woa zɔ̃ ɖo woa ŋutɔwo be àɖàŋùɖèɖe ji.

¹⁴Ne dùkɔ̃ nyèa lɔ̃, ɖo èto mù a, ne Izràɛlviwo lɔ̃, zɔ̃ ɖo àpe ègbè jia,

¹⁵mù kè zĩ àmè kèwo crì woa ɖo ànyi kaba ŋutɔ! Mù la trɔ àlɔ̀ nyèwo kpã ŋùkɔ̀ woabe kɛ̃tɔwo.

¹⁶Àmè kèwo crì Tɔhonɔ̀a, la bɔ̀bɔ̀ woa ɖokoe, la nɔ kafu ì. Eye Izràɛl la nɔ̀ ètomè fàfa mè kaka sɔ yì.

¹⁷Mù la nyì Izràɛlviwo ku èlù kè nyɔ wua, eye be la nù àkpã-tomè be ànyisì, la ɖɔpò.