Read gen Èhàwo 84 Bible Online

Èhàwo 84 - gen bible

Èhàwo 84

¹Hàsìnɔ̀ gã be Èhà. Wo la jì ì ɖo Gatviwo be ègbè ɖìɖi ji. Korà be jìjimèviwo be èhà.

²Aò, àhùadù Tɔhonɔ̀, àleke àpo nɔ̀pea nyi lɔ̃lɔ̃ ɖèɖe tèpe ɖo ò!

³Tɔhonɔ̀ be àxomè le jro èkla nyè kakaka. Àmèti nyè ku èkla nyè le fã yɔ Mawu àgbèagbèa.

⁴Àfixèvi ŋutɔ cã kpɔ nɔ̀pe eye sàgbàdrɛ̃ cã ɖo àtɔ̃ na ye ku èviawo lè àpo vɔsakpea be àxàdamè, aò, àhùadù Tɔhonɔ̀, Èfìɔ nyè ku Mawu nyè!

⁵Sìtu ɖèɖe ye be nyi na àmè kèwo lè nɔ̀pe wòa, Ɖoa wo la nɔ kafu wò tɛ̀gbɛ̀. Ènu bɔ̀ kpoo

⁶Sìtu ɖèɖe ye be nyi na àmè kèwo kpɔ ŋusɛ̃ lè èwò mèa. Ɖoa, wo nɔ̀nà èmɔ̃ woa ji vana gbɔ wò ku èjì blibo.

⁷Ne wo le to bàlì kè pu kpakplaa mèa, wò nana e trɔnazũ èsìjɔ̀pe. Eye èsìjàja cucugbãawo sɔna sìtu ɖona àcɔ na ɛ̀.

⁸Ŋusɛ̃ jènà ŋusɛ̃ ji na wo, wàlɛbɛ kè wo le zɔ̃a. Kaka va na gà kè mè woa dòmètɔ ɖe sia ɖe la ɖo Mawu be ŋùkɔ̀ lè Ziɔ̀n be ètoa ji.

⁹Aò, Àhùadù Tɔhonɔ̀, sè àpe kuefã! Aò, Yakɔb be Mawu, ɖo èto àpe ègbè! Ènu bɔ̀ kpoo

¹⁰Aò, Mawu, miabe àkpoxɔ̀nu, ɖèkɔ̀ kpɔ mi jro! Ɖèkɔ̀ kpɔ ŋùmè na àmè kè wò sì àmì na a!

¹¹Ɖoa, àpo àgbàsa mè nɔ̀nɔ ŋùkèkè ɖèkaa nyɔ wu ŋùkèkè èkàwìvɔàtɔ̃ lè àfi ɖekpekpe. E nyɔ na mù be ma nyi àgbonuɖiatɔ na Mawu nyè wu be ma nɔ̀ àmè vuɛ̃wo dòmè.

¹²Ɖoa Tɔhonɔ̀ Mawu nyi èwè kɛ̃klɛ̃ ku àkpoxɔ̀nu. Tɔhonɔ̀ nana màje ku gogo, mu la tè ènu nyuɛ̃ ɖekpe, àmè kèwo zɔ̃nà àzɔ̃lì ŋùmè màkãtɔ̀ ò.

¹³Àhùadù Tɔhonɔ̀, sìtu ɖèɖe ye be nyi na àmè kè kãɖoji wòa.