Read gen Èhàwo 86 Bible Online

Èhàwo 86 - gen bible

Èhàwo 86

¹David be kuefã. Tɔhonɔ̀, pu èto ànyi, ne wòa ɖo e ŋuti na mù. Ɖoa, wɔ̀amènɔ̀ ku èhìãnɔ̀ ye mù nyi.

²Lebè na àpe àgbè, ɖoa ànùkuamè mù nyi na wò. Èwò ye nyi àpe Mawu, hlùɛ̃ sumɔ̃vi wò kè dojì ɖo ŋuti wòa gã.

³Aò, Tɔhonɔ̀, ku ŋuzĩzĩ na mù, èwò, ye mù le fã yɔ gbè sia gbè.

⁴Do jìjɔɛ èjìmè na sumɔ̃vi wòa. Ɖoa, Tɔhonɔ̀, èwò mù kɔkɔ èkla nyè ɖoɖa.

⁵Tɔhonɔ̀, èwò kè be àdɔ̀mè nyɔ, eye wò sɔna èvuɛ̃ kènà àmè fàa. Èwò kè si màje bɔ lè fuua, na àmè kèwo keŋu fãnà yɔ wòa.

⁶Pu èto ànyi na kuefã nyèa jro, Tɔhonɔ̀! Ɖo èto, ègbè kè mù sɔ le fã yɔ wòa!

⁷Lè ènuhàha mèa, èwò ye mù la yɔ. Ɖoa, wò la xɔ̀ na mù.

⁸Lè vòduwo dòmèa, ɖekpe mu sɔ̀ ku wò ò, Tɔhonɔ̀! Eye woabe ènuwɔ̀na ɖekpe mu sɔ̀ ku tɔ̀wò ò!

⁹Dùkɔ̃ kèwo kpata wò ɖoa la va jè èɖɛ̀ na wò, Tɔhonɔ̀! Eye wo la na gogo àpo nyikɔ!

¹⁰Ɖoa, wò lòlò, eye wò wɔ̀nà ŋùdãnuwo. Èwò ɖèka kpò ye nyi Mawu!

¹¹Tɔhonɔ̀, fiɔ mù àpo èmɔ̃, àleke be ma zɔ̃ lè àpo nyàwototoa mè. Bla èjì nyèa wɔ̀ ɖèka. Àleke be ma si àpo nyikɔ.

¹²Tɔhonɔ̀ Mawu nyè, mù jro la kafu wò ku èjì blibo. Ne ma nɔ na gogo àpo nyikɔa tɛ̀gbɛ̀.

¹³Ɖo àpo màje sùgbɔ lè ji nyè, eye wò ɖè àpe èkla to lè èyɔ̀mè ke.

¹⁴Mawu! Ègòyitɔwo sitè ɖo ŋuti nyè. Ènyàsɛ̃sɛ̃-hɛ̃tɔwo be èha jro la ɖè àgbè nyè jo. Eye wo mu kpɔ wò ɖo èmɔ̃ ɖekpe nu ò.

¹⁵Vɔ̀a, èwò, Tɔhonɔ̀ yaa, Mawu kè kuna ŋuzĩzĩ na àmè, kè ɖɔ ku màje ɖèɖea ye wò nyi. Wò gbɔ̃nà èjì ɖɛ blɛ̀wù, wò ɖɔ ku ànùkua wɔ̀wɔ, eye nyàwototo sù àsi wò.

¹⁶Aò Mawu, trɔ èkɔ̀ kpɔ mù jro! Ne wòa ku ŋuzĩzĩ na mù. Na ŋusɛ̃ àpo sumɔ̃via jro! Ne wòa hlùɛ̃ sumɔ̃vi wò nyɔ̃nùa be èvia gã.

¹⁷Ɖè jèsi ɖe fiɔ be mù kpɔ ɖàgbè so gbɔ wò. Àleke be kɛ̃tɔ nyèwo ne ɖù ŋùkpɛ̃. Be èwò Tɔhonɔ̀ ye xɔ̀nà na mù, gbà fana àkɔ na mù.