Read gen Èhàwo 88 Bible Online

Èhàwo 88 - gen bible

Èhàwo 88

¹Koreà be èviwo be Èhà na hàsìnɔ̀ gãa. Almàhalat Lè-Anɔ̀t. Hemàn, Ezràtɔa be ènufiɔfiɔ.

²Aò, Tɔhonɔ̀, Mawu, hlùɛ̃tɔ nyè! Èzã ku kedèa, mù le fã yɔ wò.

³Àpe kuefã ne va ɖo kaka gbɔ wò. Pu èto ànyi na àlenana nyèa jro!

⁴Ɖoa, èkla nyè titɔ keŋu-keŋu, eye àpe àgbèa yì ɖo èkudonu.

⁵Wo bù mù ɖo àmè kèwo be àgbèa ɖo vɔ̀vɔnua mè. Mù jo lè sìgbè àmè kè mu ɖo ŋusɛ̃ òa nène.

⁶Wo gble mù ɖo àmèkukuwo dòmè, sìgbè àmè kèwo wo wù sɔ mlɔ̃ èyɔ̀domèa nène. Àmè kèwo ma jo lè ŋuti wò, kèwo wò ŋlɔ̀be vɔ̀a nène.

⁷Wò dà mù ɖo èdo yìgũa mè. Ègũ kè gòglò, do vìvìtia mè.

⁸Àpo àdãwɔ̀wɔ be kpɛ̃kpɛ̃ jè e ji nyè. Àdɔ̀mèze be àsrɔ̀kewo keŋu cɔ̃ ji nyè. Ènu bɔ̀ kpoo

⁹Wò nyà èxlɔ̃ nyè veveawo jo lè ŋuti nyè. Eye wò sɔ mù wɔ̀ ènunyɔŋu na wo. Wò tu èhɔ̃ do mù, eye tòto mu lè na mù ò.

¹⁰Vevesèse gbɔjɔ ŋùku nyèwo, Tɔhonɔ̀, mù kè àlɔ̀ ɖoɖa gbɔ wò, eye mù fã yɔ wò gbè sia gbè.

¹¹Àmèkukuwo ye wò la wɔ̀ ŋùdãnu na fifìa? Àmèkukuwo la fɔ̃ va kafu wòa? Ènu bɔ̀ kpoo

¹²Èyɔ̀dòmè wo la ɖè àpo àdɔ̀mè nyuɛ̃ wɔ̀wɔ fiɔ lèa? Èyɔ̀mè ye wo la teŋu kafu àpo ànùkua wɔ̀wɔ lèa?

¹³Vìvìti mè ye wo la jèsi àpo ŋùdãnuwo lèa? Eye lè ènu-ŋlɔ̀be be èdù mèa, wo la kpɔ jɔ̀jɔɛsòso wòa jèsia?

¹⁴Vɔ̀a ènyè yaa, mù le fã yɔ wò, Tɔhonɔ̀! So fɔ̃fɔ̃mè kea, mù sɔ kuefã nyè ɖo ŋùku wò mè.

¹⁵Aò, Tɔhonɔ̀, nukɛ ŋuti wò tù àsi èkla nyè dãŋùgbe ɖo, eye wò trɔ ŋùgbe do mù ò?

¹⁶So ɖèvimè ke, mù lè àyàɖùɖu mè, kaka lili èku. Àpo vɔ̃vɔ̃dodo na àmè titɔ mù kaka mù gbɔjɔ.

¹⁷Àpo àdɔ̀mèze veku-vekua to ji nyè, àpo vɔ̃vɔ̃dodo na àmè crɔ̃ mù keŋu-keŋu.

¹⁸Gbè sia gbèa, wo cɔ̃na mù sìgbè èsì nène. Wo pòxla mù keŋu-keŋu kpedo.

¹⁹Wò kãkã àmè nyanyawo ku èxlɔ̃wo keŋu jo lè ŋuti nyè. Vìvìti ye mù gblɔ̃nà àpe àdɔ̀mè be ènyà na fifì.