Read gen Èhàwo 89 Bible Online

Èhàwo 89 - gen bible

Èhàwo 89

²Mù la sɔ Tɔhonɔ̀ be lɔ̃lɔ̃ gãa nɔ jì èhà tɛ̀gbɛ̀. Ènu nyè la nɔ ɖè àpo ànùkua wɔ̀wɔ sia, so jìjimè yì jìjimè.

³Ɛ̃ɛ, mù la gblɔ̃ ɛ̀ be àpo màjea likè tɛ̀gbɛ̀, eye wo li àpo ànùkua wɔ̀wɔa ɖo jiŋùkusi ke.

⁴Wò gblɔ̃ be: “Mù ɖùzò ku àpe àmè cãcã, mù tà ènu na David, sumɔ̃vi nyèa be:

⁵'Mù le ɖo wò ɖo hɛ̃nu wò be èfìɔzìkpea ji kaka sɔ yì. Mù li èfìɔzìkpe wòa ɖotè, so jìjimè yì jìjimè'”. Ènu bɔ̀ kpoo

⁶Tɔhonɔ̀, jiŋùkusi le kafu àpo ŋùdãdɔwo, ku àpo ànùkua wɔ̀wɔ lè àmè kɔ̀kɔ̀ɛwo be èhabɔ̀bɔ mè.

⁷Ɖoa, àmè kɛ ye, lè jiŋùkusi, la teŋu sɔ ye ɖokoe, sɔ̀ ku Tɔhonɔ̀ ò? Àmè kɛ ye lè jiŋùkusi be ènusɛ̃sɛ̃wo dòmè, kè ɖì Tɔhonɔ̀ ò?

⁸Lè àmè kɔ̀kɔ̀ɛwo be èhabɔ̀bɔ mèa, vɔ̃vɔ̃ gã ɖe lè Mawu ŋuti. Yebe vɔ̃vɔ̃a sɛ̃ŋu wu àmè kèwo keŋu trɔdo èa tɔ̀.

⁹Oò Tɔhonɔ̀, Mawu Ŋusɛ̃kpatatɔ! Àmè kɛ ye ɖo ŋusɛ̃ sɔ̀ ku wò ò? Wò sɛ̃ŋu, eye èfìɔɖùɖu ku ànùkua ye pòxla wò.

¹⁰Èwò ye ɖo àcɛ̀ ɖo àpù be ègòyiyi ji. Ne yebe àsrɔ̀kewo hɔ̃a, èwò ye fana wo.

¹¹Èwò ye gbã èta na Ràhab[14] kè lè sìgbè àmè kè xɔ̀ èkubi nènea, èwò ye sɔ àlɔ̀ sɛ̃sɛ̃ wòa kãkã kɛ̃tɔ wòwo hlɛ̃.

¹²Tɔ̀wò ye nyi jiŋùkusi, eye tɔ̀wò ke ye nyi ànyigbã cã. Xixea ku ènu kèwo keŋu lè e mèa, èwò ye ɖo woa kpata.

¹³Èwò ye ɖo èvègo, èwò ye ɖo àpùgo. Tabɔ̀r ku Hɛrmɔ̀n be ètowo sònà àyo ɖo nyikɔ wòa ŋuti.

¹⁴Èwò si ye àlɔ̀ sɛ̃sɛ̃ lè, àbɔ wò tɔ̀ ye nyi ŋusɛ̃. Ɖusi-lɔ sɛ̃ŋu wòa ye yì ji!

¹⁵Jɔ̀jɔɛwɔ̀wɔ ku jɔ̀jɔɛsòso ye nyi èfìɔzìkpe wò be dodoe. Màje ku ànùkua lè ŋùkɔ̀ na wò.

¹⁶Sìtu ɖèɖe ye e nyi na dùkɔ̃ kè nya àleke be ɖo la nɔ mlã wò ɖoa. Tɔhonɔ̀, wo la nɔ zɔ̃ lè àpo ŋùmè be kɛ̃klɛ̃ nu!

¹⁷Wo la nɔ sò àyo, lè àpo nyikɔ mè, gbè sia gbè. Eye wo la nɔ kafu àpo ànùkua wɔ̀wɔ.

¹⁸Ɖoa, èwò ye nyi woabe gogo ku woabe ŋusɛ̃. Èwò ye kɔna miabe àzò, miabe ŋusɛ̃a yì ji.

¹⁹Miabe àkpoxɔ̀nua, Tɔhonɔ̀ tɔ̀ ye. Eye miabe èfìɔ ye nyi Izràɛl be kɔ̀kɔ̀ɛtɔa.

²⁰Gbè ɖèkaa, wò gblɔ̃ na àpo ànùkuamèwo be: “Mù na àlɔ̀do nyè kãlìwɔ̀tɔ ɖe, ɖo, mù do ɖèkajɛ ɖe ɖo ji, lè dùkɔ̃ nyèa mè.

²¹Mù kpɔ David, sumɔ̃vi nyèa eye mù sì àmì kɔ̀kɔ̀ɛ nyèa na ɛ̀.

²²Àlɔ̀ sɛ̃sɛ̃ nyèa la likè è, eye àbɔ sɛ̃ŋu nyèa la do è ŋusɛ̃.

²³Kɛ̃tɔ ɖekpe mu la teŋu xixa ɛ̀ ò. Nène a ke ye àmè nyrãku ɖe mu la teŋu tɛ ɛ̀ ɖo èto ò.

²⁴Ɖoa mù la gbã yebe kɛ̃tɔwo le ŋùkɔ̀ na ɛ̀. Eye mù la pò àmè kèwo crìa pu ànyi.

²⁵Àpe ànùkua ku àpe màje la kplɔ̀ ɛ̀. Eye àpe nyikɔ la kɔ ɛ̀ yì ji.

²⁶Yebe àlɔ̀ la sù àpù ji, eye yebe ɖùsi-lɔ la sù ètɔ̀ sàsrawo ji.

²⁷E ya la fã yɔ mù be: “Àta, Mawu nyè! Àkpã ke nyi àpe hlùɛ̃tɔa!”

²⁸Eye ènyè ya, mù la ɖo è, ŋùkɔ̀gbevi nyè, èfìɔ kè la wugã ànyigbã ji be èfìɔwo keŋuã.

²⁹Ànùkua be màje nyèa la kplɔ̀ ɛ̀ kaka sɔ yì. Àpe zòɖùɖua la nɔ ku ì, màgble màgble.

³⁰Mù la li yebe hɛ̃nu ɖo èfìɔzìkpea ji, sɔ yì mà-vɔ mè, eye yebe èfìɔɖùɖu ku jiŋùkusi be ŋùkèkèwo la sɔ̀.

³¹Ne èviawo trɔ ŋùgbe do èse nyèwo, eye wo mu zɔ̃ ɖo ɖoɖo nyèwo ji òa,

³²ne wo gble kɔ̀do nyèwo eye wo gbe ègbè sèse na mù a,

³³mù la sɔ èkpò dɔ̃ èto na wo, ɖo woabe àglajèjea ŋuti. Eye mù la do èba na wo, ɖo woabe àgɔ̀jèjea ŋuti.

³⁴Gãkea, nyè mu la xɔ̀ màje nyèa lè woa si ò. Nyè mu la gbe ènu lè ànùkua nyèa ŋuti ò.

³⁵Nyè mu la dà zòɖùɖu nyèa ji, àlo, la trɔ ènyà kè to lè ènu mè na mù a ò.

³⁶Zè ɖèka kpò, mù tà àpe kɔ̀kɔ̀ɛnyinyia. Gbèɖe! Nyè mu la ɖàjè na David ò!

³⁷Yebe hɛ̃nu la nɔ̀ ànyi tɛ̀gbɛ̀, eye yebe èfìɔɖùɖua la nɔ̀ ŋùkɔ̀ na mù, sìgbè èwè nène.

³⁸E la likè, kaka sɔ yì, sìgbè wètri kè nyi ànùkua be ɖàsèfo lè lilikpowo mèa nène. Ènu bɔ̀ kpoo

³⁹Vɔ̀a, èwò ya, wò gbe, eye wo crɔ̃ àpo àmè sìamìnaa. Èwò ye do àdɔ̀mèze hɛlĩ do è.

⁴⁰Wò gbã èzò kè wò ɖù ku sumɔ̃vi wòa. Wò dà yebe èfìɔkukua ɖo ànyigbã, eye wò dovlo è.

⁴¹Wò gbã yebe èglìkpawo keŋu, eye wò kãkã yebe àgbògbòawo.

⁴²Àmè kèwo zɔ̃ va le yìa, va hlà ɛ̀ keŋu. Eye be trɔ zũ ènu kòkò na yebe àxuekɔ̀tɔwo.

⁴³Wò na ŋusɛ̃ yebe kɛ̃tɔwo be àbɔ. Wò na àmè kèwo keŋu crìa, wo kpɔ jìjɔɛ.

⁴⁴Wò na yebe èwuia nu kpò, eye wò mu do è àlɔ̀ lè àhùagbe ji ò.

⁴⁵Wò na yebe kɛ̃klɛ̃a nu ci, eye wò sɔ yebe èfìɔzìkpea xla ɖo ànyi.

⁴⁶Wò ɖè yebe ɖèkajɛmè ŋùkèkèwo ji kpɔ̀tɔ̀, eye wò sɔ ŋùkpɛ̃ cɔ̃ èta na ɛ̀. Ènu bɔ̀ kpoo

⁴⁷Aò, Tɔhonɔ̀! Kaka na hùe kɛ nu ò? Wò la kpɔ̀tɔ̀ nɔ wla ɖokoe wò kòkòkòa? Aò, kaka na hùe kɛ nu ye wò la na àdɔ̀mèze wòa la kpɔ̀tɔ̀ nɔ bì sìgbè èzò nène ò?

⁴⁸Ɖoŋù àlekè àgbè nyèa kpòkpòe ɖoa, kù àlekè wò ɖo àgbètɔ be èviwo, ènu gbalo ɖoa!

⁴⁹Àmè kɛ ye la nɔ̀ àgbè, eye mu la ku ò? Eye be la teŋu hlùɛ̃ yebe èkla lè èkuwode ò? Ènu bɔ̀ kpoo

⁵⁰Aò, Tɔhonɔ̀! Fikɛ àpo sã xoxo be àdɔ̀mè nyuɛ̃ wɔ̀wɔ, kè wò sɔ tà àpo ànùkua wɔ̀wɔ na David, sumɔ̃vi wòa lè ò?

⁵¹Tɔhonɔ̀, ɖoŋùku àlekè wo pòɖi wò ɖoa, ɖoŋùku àlekè mù xɔ̀ dùkɔ̃wo keŋu be èvlo dodo ɖo àkɔa!

⁵²Tɔhonɔ̀, ɖoŋùku àlekè kɛ̃tɔ wòwo dovlo wo ɖoa! Ɖoŋùku àlekè kɛ̃tɔ wòwo dovlo àpo àmè sìamìna be àfɔ̀ɖèɖe ɖe sia ɖe.

⁵³Woa kafu Tɔhonɔ̀ tɛ̀gbɛ̀, kaka sɔ yì. Àmèn! Ɛ̃ɛ, Àmèn!