Read gen Èhàwo 9 Bible Online

Èhàwo 9 - gen bible

Èhàwo 9

¹David be Èhà kè wo ɖè lè hàsìnɔ̀ gã be xoma mè. Wo la pò èhàjìnuwo bɔ̀ ɖo e ŋuti.

²Tɔhonɔ̀, mù le do àkpe na wò so kaka èjì mè ke, mù la ɖègbèfã àpo ŋùdãdɔ jɔ̀ àsuawo kpata.

³Mu la ɖu jìjɔɛ be èwè ɖo ŋuti wò eye mù la pò mlã àpo nyikɔ, aò! Mawu èji hũitɔa.

⁴Àpe kɛ̃tɔwo le yì ŋùgbe, wo mu gbà ɖo èkèlili ò eye wo le crɔ̃ lè ŋùkɔ̀ na wò.

⁵Ɖo wò nɔ̀ ànyi ɖo fìɔzìkpe wòa ji le sò jɔ̀jɔɛ, wɔ̀ kpɔ be àpe ènyà jɔ̀ eye wò xɔ̀ ènyà ɖo èta nyè.

⁶Wò tùkù dùkɔ̃wo, wò crɔ̃ àmè bàɖàwo, eye wò tutu woabe nyikɔwo gbidi.

⁷Kɛ̃tɔawo crɔ̃ keŋu, woabe ŋùɖowo bu! Wò crɔ̃ woabe èdùwo, wo mu gbà nya woabe nyikɔ cã tètè ò.

⁸Vɔ̀, Tɔhonɔ̀ ɖùfìɔ kaka sɔyì. E li yebe èfìɔzìkpea na jɔ̀jɔɛsòso.

⁹E ye le kplɔ̀ xixea lè jɔ̀jɔɛsòso mè, mu dona vòvòtoto dùkɔ̃wo dòmè ò.

¹⁰Tɔhonɔ̀ nyi ètabèpe na àmè kèwo ji màjɔ̀ màjɔ sòso le ɖùawo, e cɔ̃na woa ji lè gbledo mè.

¹¹Àmè kèwo jèsi nyikɔ wòa, la dojì ɖo ŋuti wò. Tɔhonɔ̀, wò mu ɖènàkɔ̀ lè àmè kè le ji wòa ŋuti kpɔ ò.

¹²Mì jì kafu hàwo na Tɔhonɔ̀, e ɖo yebe fìɔɖùpe ɖo Ziɔ̀n. Mì ɖè yebe wɔ̀wɔwo fiɔ lè dùkɔ̃wo dòmè.

¹³E tĩna èhlɔ̃dãtɔwo yomè, e ɖona ŋùku àmè kèwo wo wùa. Mu ŋlɔ̀nàbe ènuwɔ̀donɔ̀wo be àpa dodo ò.

¹⁴Ku ŋuzĩzĩ na mù Tɔhonɔ̀! Kpɔɖa, àyà nyèa le so àmè kèwo crì mù a gbɔ. Xɔ̀ mù lè èku si.

¹⁵Nène a, mù la ɖè ènu kè ŋuti ye mù le jì kafu-hawo na wò ɖoa, fiɔ lè Yèruzàlɛmviwo dòmè.

¹⁶Dùkɔ̃wo gɛ̃ jè èdo kè wo kùa mè, woabe àfɔ̀wo jè èmɔ̃ kè wo trea mè.

¹⁷Tɔhonɔ̀ ɖè ye ɖokoe fiɔ, e le yebe jɔ̀jɔɛsòso ɖotè: E na be àmè bàɖàwo jè woa ŋutɔ be èmɔ̃ kè wo trea mè.

¹⁸Dùkɔ̃ kèwo ŋlɔ̀be Mawu a kudo àmè bàɖàwo ne kpɔ nɔ̀pe lè èkuwode.

¹⁹Aò, Mawu mu la ŋlɔ̀be ènuwɔ̀donɔ̀wo kpɔ ò, ŋùɖo mu la bu na wɔ̀amènɔ̀ ò.

²⁰Sitè, Tɔhonɔ̀, ne àgbètɔwo mu gbà nyi ŋusɛ̃tɔwo ò! Ne woa ɖokòjo na dùkɔ̃wo lè ŋùkɔ̀ na wò!

²¹Do vɔ̃vɔ̃ na wo, Tɔhonɔ̀! Nène a, wo la sè e mè be: “Àgbètɔ kpò yèwo nyi.”