Read gen Èhàwo 90 Bible Online

Èhàwo 90 - gen bible

Èhàwo 90

¹Mosè, Mawu be àmèdɔ̃dɔ̃a be kuefã. Tɔhonɔ̀, èwò ye nyi miabe tabèpe so jìjimè yì jìjimè.

²Gbɔ̀xue ètowo jɔ̀, gbɔ̀xue wò ɖo xixea, èwò ye nyi Mawu so gbèɖegbè kaka sɔ yì.

³Wò gblɔ̃ na àgbètɔwo be: “Mì trɔ yì fikè wo jɔ̀ mì soa”. Nène a ye wo kuna gbà trɔna ɖiɖɔɛ.

⁴Ɖo, lè gbɔ wòa, èpè kàwìvɔàtɔ̃ lè sìgbè èsɔ̀ kè va yìa nène, e gbà lè sìgbè èzã be gàpòpo ɖewo kpò nène.

⁵Wò kplɔ̀nà àgbètɔ be àgbèa srà yìnà, e yìnà sìgbè àlɔ̃ dɔ̃dɔ̃ nène. E gbà lè sìgbè ègbe kè le mìɔ̃ ŋùdekɛ̃nyɛ̃a nène.

⁶Lè fɔ̃fɔ̃ mèa, e mìɔ̃ nà gbà pònàse; wètrɔ mèa, e yrɔ̀nà gbà puna.

⁷Ɛ̃ɛ, mi crɔ̃na lè àpo àdɔ̀mèze mè, eye mi hũhũna lè àpo jìbibi be àdã mè.

⁸Miabe nuvuɛ̃wo lètè gã lè ŋùku mè na wò. Àpo kɔ̀kɔ̀ɛa kɔ̀nà miabe bèbemè be ènuwo.

⁹Ɖo, ne wò bijìa, miabe àgbèzãwo jo nɔ̀nà yì yìwɔ̀. Mi kpɔna miabe àgbèa vɔ̀nà sìgbè àseŋu kè wo kãa nène.

¹⁰Miabe Àgbènɔ̀zãwo le nyi èpè èkà takpo ciwo àlo èkà èvè na àmè kèwo ŋuti ŋusɛ̃ gbà lèa. Co àgbè dìdì mu nana ènu bu tovò lè èfũ ku dãgbã ŋuti ò. Èpèwo va yìnà kaba eye mi mu gbà la nɔ̀ ànyi ò.

¹¹Àmè kɛ ye jèsi àpo àdɔ̀mèzea be hɔ̃hlɔ̃? E xɔ̀asì pɛpɛ sìgbè bùbu kè mi ɖo na wòa ke nène.

¹²Na ne mia nya àlekè miabe àgbènɔ̀zãwo kpòkpòe ɖoa. Nène a miabe èjìwo la ɖɔ kudo ènunya.

¹³Tɔhonɔ̀, ne èjìbibi wòa gbà dìdì ɖekpekpe cã, gbìgbɔ̀ trɔ kpɔ àpo sumɔ̃viawo gbɔ.

¹⁴Ɖɔ mi kudo àpo àdɔ̀mè nyuɛ̃ gbè sia gbè, ne mia jɔ̀jì gbà haya lãmè miabe àgbèzãwo keŋu.

¹⁵Èpè fuwo ye wò dɔ̃ èto na mi eye gbledowo va mia ji. Fifìa, trɔ wo sɔ wɔ̀ nyɔna na mi.

¹⁶Na àpo èdɔ nyuɛ̃wo ne ze na àpo sumɔ̃viwo ne woabe èviwo la kpɔ àpo gogoa.

¹⁷Na Tɔhonɔ̀ miabe Mawu, àpo nyɔnaa ne nɔ̀ mia ji, ne wòa likè miabe àlɔ̀nudɔwo na mi. Ɛ̃ɛ, miabe àlɔ̀nudɔwo ne nɔ likè lè àlɔ̀mè na mi.