Read gen Èhàwo 91 Bible Online

Èhàwo 91 - gen bible

Èhàwo 91

¹Àmè kè bɔ̀bɔ̀ nɔ̀ ànyi lè Mawu èjihũitɔ, ŋusɛ̃kpatatɔa be wlapea, la nɔ̀ yebe vɔ̃vɔ̃lì gɔ̃mè.

²E gblɔ̃nà na Tɔhonɔ̀ be: “Wò nyi àpe ètabèpe kudo àgbògbò. Mawu kè ŋuti mù ɖona ŋù ɖoa.”

³Ɛ̃ɛ, dodo Mawu la ɖè wò to lè xèviletɔa be èmɔ̃ mè, la gbà hlùɛ̃ wò lè èdɔ̀ vuɛ̃ si mè.

⁴E la sɔ yebe àwà cɔ̃ ji wò, eye wò la ɖè èjì ɖɛ lè yebe àwàdawo gɔ̃mè. Yebe nyàwototo ku ànùkua la nyi àkpoxɔ̀nu na wò.

⁵Nène a, wò mu la gbà vɔ̃ ènu ɖe lè èzã mè kaka la vɔ̃ àŋùti kèwo le zrò lè ŋùkèkè mèa ò.

⁶Nène a ke èdɔ̀ vuɛ̃ crɔ̃-àmè kè le ɖìsà lè vìvìti mè àlo èdɔ̀ cage-àmè kè gblena ènu dɔ̃ŋùkusu jàsea, mu la do vɔ̃vɔ̃ na wò ò.

⁷Àgbètɔ sìgbè àkpe ɖèka nène la nɔ jè ànyi lè àpo àhàdamè, eye àkpe èwo la jè ànyi lè àpo ɖùsi mè. Vɔ̀a ènu ɖekpe mu la kãfɛ̃ wò ya ò.

⁸Ŋùkuvi kpò wò la sɔ ɖɛ, la kpɔ àlekè wo la dɔ̃ èto na àmè bàɖàwo ɖoa.

⁹Ɖo wò sɔ Tɔhonɔ̀, Mawu gã, kè le nyi àpo ètabèpea, wɔ̀ nɔ̀pe.

¹⁰Sukpa ɖekpe ma kpe wò ò, nènea ke èdɔ̀ vuɛ̃ ɖekpe ma gogo àpo nɔ̀pe ò.

¹¹Ɖo Tɔhonɔ̀ la do ègbè àsi na yebe àtikplɔtɔwo ɖo ŋuti wò ne woa kpɔ èji wò lè àpo èmɔ̃wo kpata ji.

¹²Wo la kɔkɔ wò ɖo àlɔ̀ mè, ne àpo àfɔ̀ mu gbà tɔ èkpe ò.

¹³Wò la zɔ̃ jãŋùta ku flìbo ji, wò la nyàmà jãŋùtavi kudo èdã.

¹⁴Eye Mawu gblɔ̃ be: “Kè e tɔ̀ be e lɔ̃nà mù a, mù la na ɛ̀ vòvo, mù la lebè na ɛ̀ ɖo e nya àmè kè ŋùkumè mù nyia.

¹⁵Ne e yɔ mù a, mù la tɔ̀ na ɛ̀. Mù la nɔ̀ kudo è lè gbledo hùenu. Mù la tu èkà na ɛ̀ eye mù la do bùbu e ŋuti.

¹⁶Mù la na ɛ̀ àgbè dìdì, be la sù ì, eye mù la ɖèfiɔ ɛ̀ be mù nyi yebe hlùɛ̃tɔ.