Read gen Èhàwo 92 Bible Online

Èhàwo 92 - gen bible

Èhàwo 92

¹Èhà. Jɛ̃gbɔ̃ zãgbè be Èhà.

²Ènu nyuɛ̃ ɖe be nyi be woa lòlò Tɔhonɔ̀, woa jì èhà sɔ kafu àpo nyikɔ, Oò Mawu gã!

³Woa ɖè àpo àdɔ̀mè nyuɛ̃ wɔ̀wɔ fiɔ ŋùdekɛ̃nyɛ, gbà nɔ ɖè àpo ànùkua wɔ̀wɔ sia lè èzãwo mè.

⁴Lè kàsãŋùgu ku kàsãŋùgu ŋùku èwo, èhɛ be ègbè ɖìɖi zĩse ɖe mè.

⁵Tɔhonɔ̀, àpo èdɔwo do jìjɔɛ na mù, eye mù le do jìjɔɛ be àpa lè àpo àlɔ̀nudɔwo be ŋùkɔ̀.

⁶Àpo wɔ̀wɔwo lòlò ŋutɔ, Tɔhonɔ̀; àpo tamè be susuwo tito ŋutɔ.

⁷Yɛ̀yìnɔ̀a mu nya ekèa ò, àmè kè àyè ku na a, mu la sè e gɔ̃mè ò.

⁸Ne àmè bàɖàwo le vlũ vlàvlà sìgbè àlekè ègbe vuɛ̃wo tona vlɔ̀vlɔ̀ nènea, ne ènumàɣewɔ̀tɔwo le pò èse a, ekèa gɔ̃mè ye nyi be wo gbãnà cɔ̃crɔ̃ gbe ɖobaa.

⁹Vɔ̀a, èwò Tɔhonɔ̀, wò sù kaka yì.

¹⁰Kpɔɖa Tɔhonɔ̀, àpo kɛ̃tɔwo la ku godoo. Wò kãkã ènu bàɖàwɔ̀tɔwo keŋu.

¹¹Vɔ̀, wò la kɔ àzò nyèwo yì ji sìgbè ètò nène, eye wò la do àmì èta na mù.

¹²Ŋùku nyè jro la kpɔ àpe kɛ̃tɔwo be ànyi jèpe. Eye àpe èto la sè ènyà ɖe so àmè bàɖà kèwo sitè ɖo ŋuti nyèa ŋuti.

¹³Àmè kè lè ègbèji na Mawu a, la sĩ sìgbè dèti nène, e la mìɔ̃ sìgbè sedàti nène lè Libàn.

¹⁴E nyi àti kè wo do ɖo Tɔhonɔ̀ be àxuea mè, eye e la pò èse lè miabe Mawu be àgbàsa mè.

¹⁵E la kpɔ̀tɔ̀ nɔ sɛ̃ku lè yebe sĩsĩ mè cã. E la sĩ do àmà tɛ̀gbɛ̀.

¹⁶Ekèa la ɖèfiɔ be Tɔhonɔ̀ lè jɔ̀jɔɛ. E ye le nyi àpe àkpã sɛ̃sɛ̃. Dàda ɖekpe mu lè e mè ò.