Read gen Èhàwo 94 Bible Online

Èhàwo 94 - gen bible

Èhàwo 94

¹Tɔhonɔ̀, Mawu èhlɔ̃biɔtɔ; Oò Tɔhonɔ̀ Mawu èhlɔ̃biɔtɔ, ɖè ɖokoe wò fiɔ!

²Èwò xixea be kòjoɖotɔ, sitè ne wòa ɖo e tèpe na hɛ̀wùlɔwo ɖo woabe wɔ̀wɔwo ŋuti.

³Tɔhonɔ̀ kaka va na gà kɛ mè ye àmè bàɖàwo la kpɔ̀tɔ̀ nɔ mlã ò?

⁴Wo gblɔ̃nà ènyà tovòwo gbà jrana. Àmè drã kèawo kona ànya ŋutɔ.

⁵Tɔhonɔ̀, Oò! Wo le tùkù dùkɔ̃ wòa, wo le ɖèfũ na àpo àmè cãcãwo.

⁶Wo wù àhòsìwo, àmèjro kudo cɔɛviwo.

⁷Kòɖòa, wo gblɔ̃nà be: “Tɔhonɔ̀ mu le kpɔ ɛ̀ ò. Yakɔb be Mawu a mu le le ŋùku ɖo e ŋuti ò.”

⁸Mìa tamèsɛ̃tɔwo, mì bùtamè, mìa sùkunɔ̀wo, wàlɛbɛ kɛ ye mì la va nyanu ò?

⁹Àmè kè ŋutɔ ɖo èto ɖo èta ŋutia, mu la sènu òa? Àmè kè ɖo ŋùkuviwoa, mu le kpɔnu òa?

¹⁰Àmè kè gbena ènyà na dùkɔ̃woa, mu la gbe ètodɔ̃dɔ̃ na àmè ò. E ye ke nana ènunya àgbètɔwo.

¹¹Tɔhonɔ̀ jèsi àmè sia àmè be ètamèsusuwo. E nya be ènu gbalo ye wo nyi.

¹²Tɔhonɔ̀, sìtu be la nyi na àmè kè wò le gbe ènyà na eye wò le kpla ɛ̀ to àpo èsea jia.

¹³Ne wòa na ɛ̀ tùjèanyi lè àhovì be gàmè. Eye wò la na wo la kù èdo na àmè bàɖàwo.

¹⁴Kpao! Tɔhonɔ̀ mu la ɖèkɔ̀ lè yebe dùkɔ̃ ŋuti ò. Mu la gble yebe àmè cãcãwo ɖɛ gbèɖe ò.

¹⁵Eye jɔ̀jɔɛsòso la gbìgbɔ̀ va nɔ̀ ànùkuawɔ̀tɔ a ji. Funua, àmè kèwo ɖo èjìmè kɔ̀kɔ̀ɛa la nɔ̀ e yomè ɖaa.

¹⁶Àmè kɛ ye la sitè ɖo vuɛ̃wɔ̀tɔwo ŋuti na mù? Àmè kɛ la do mù àlɔ̀ lè ènumàɣewɔ̀tɔwo be ŋùkɔ̀?

¹⁷Ne mu nyi be Tɔhonɔ̀ ye kpe ɖo ŋuti nyè òa, èɖa kè ɖo lè èkla nyèa nu xoxo vɔ̀.

¹⁸Wàlɛbɛ kè mù le susu be àfɔ̀ nyèwo mu gbà ɖo kèlili ò a, Oò, Tɔhonɔ̀, àpo àdɔ̀mè nyuɛ̃ gbà linakè mù.

¹⁹Eye wàlɛbɛ kè èjì nyèa ɖɔ kudo bùkpɔ vòvòvòwoa, àpo àsi ɖo àkɔ na àmèa, dona jìjɔɛ na mù.

²⁰Ènyà ɖe mu lè èwò kudo kòjoɖotɔ nyrãku kèwo sɔ ènu gbegble dona èsea dòmè ò.

²¹Wo nɔ̀nà àjòha mè ɖo ànùkuamèwo ŋuti eye wo gblenahùɛ do àmè mà-nyã ɖewo.

²²Vɔ̀a, Tɔhonɔ̀ ye nyi àpe àgbògbò, Mawu nyè ye nyi àpe tabèpe be àkpã.

²³E la na woa ŋutɔwo be èhlɔ̃dãdãwo la trɔ va woa ji, eye e la crɔ̃ wo kudo woa ŋutɔ be kunyànyrãwo. Ɛ̃ɛ Tɔhonɔ̀, miabe Mawu la crɔ̃ wo godo!