Read gen Èhàwo 96 Bible Online

Èhàwo 96 - gen bible

Èhàwo 96

¹Mì jì èhà yeye na Tɔhonɔ̀, mì ànyigbã jitɔwo kpata mì jì èhà na Tɔhonɔ̀.

²Mì jì èhà na Tɔhonɔ̀, mì do àkpe be e nyi mìabe Mawu. Mì nɔ gblɔ̃ gbè sia gbè be e ye nyi mìabe hlùɛ̃tɔ.

³Mì ɖè yebe gogoa fiɔ dùkɔ̃wo kpata, mì gblɔ̃ yebe ŋùdãnu gãgãwo lè xixea keŋu mè.

⁴Ɛ̃ɛ, Tɔhonɔ̀ lòlò eye e sù ne woa kafu ì ŋutɔ-ŋutɔ. Sisi lè e ŋuti wu vòduwo kpata.

⁵Ɖo dùkɔ̃wo be vòduwo kpata nyi ènu gbalo. Vɔ̀, Tɔhonɔ̀ ye ɖo jiŋùkusi.

⁶Yebe ŋùkumè le klɛ̃ ku bùbu kudo nyiɖìɖi. Ŋusɛ̃ ku àcɔ lè yebe àdoa mè.

⁷Oò mìa dùkɔ̃wo kpata, mì sɔ gogo kudo bùbu na Tɔhonɔ̀.

⁸Mì na gogo Tɔhonɔ̀ ɖo yebe nyikɔ ŋuti. Mì hɛ̃ ènunanawo ɖo àsi va yebe àgbàsa mè.

⁹Mì sɛ̃ Tɔhonɔ̀ lè àdo ɖìnyi mè; mìa ànyigbãwo kpata, vɔ̃vɔ̃ ne ɖo mì lè ŋùkɔ̀ na ɛ̀.

¹⁰Mì gblɔ̃ lè dùkɔ̃wo dòmè be: “Tɔhonɔ̀ ɖùfìɔ, ɛ̃ɛ xixea cã likè eye mu la teŋu hùã ò. Tɔhonɔ̀ mu la do vòvòtoto dùkɔ̃wo dòmè ò.”

¹¹Na jiŋùkusi ne jɔ̀jì, na ànyigbã ne ɖu jìjɔɛ be èwè, na àpù ne ɖègbè kudo yebe ènu xɔ̀asì kèwo lè e mèa.

¹²Na àgblè ne nɔ̀ jìjɔɛ mè kudo ènu kèwo keŋu lè e mèa. Eye àvemètiwo kpata ne mlã,

¹³lè ŋùkɔ̀ na Tɔhonɔ̀, ɖo e gbãnà. Ɛ̃ɛ, e gbãnà la va ɖokòjo ku ànyigbã a. E la ɖokòjo ku xixea lè jɔ̀jɔɛ mè, e la ɖokòjo ku dùkɔ̃wo lè nyàwo mè.