Read gen Èhàwo 99 Bible Online

Èhàwo 99 - gen bible

Èhàwo 99

¹Tɔhonɔ̀ ɖùfìɔ, dùkɔ̃wo mì pò tìtìtì. E ɖo yebe àzìkpea ɖo Kèrubimwo ji, ànyigbã hũhũ.

²Lè Ziɔ̀n, Tɔhonɔ̀ lòlò. E gbà wugã dùkɔ̃wo kpata.

³Na ne woa kafu àpo ŋɔji nyikɔ gã, ɖo Tɔhonɔ̀ kɔ̀.

⁴Nɔ kafu èfìɔ kè lɔ̃nà jɔ̀jɔɛsòsoa be ŋusɛ̃. Wò li kunùmàwu ɖɛ. Wò lè ànùkua kudo jɔ̀jɔɛsòso ji lè Yakɔb mè.

⁵Mì lòlò Tɔhonɔ̀ miabe Mawu a, ne mìa jèɖɛ̀ lè yebe àfɔ̀ɖojinua gbɔ. Tɔhonɔ̀ lè kɔ̀kɔ̀ɛ.

⁶Mosè ku Arɔ̀n wo lè yebe hũbonɔwo dòmè, Samuɛl cã fã yɔ ɛ̀. Wo yɔ Tɔhonɔ̀ eye e tɔ̀ na wo.

⁷Mawu pò nupo na wo so lilikpowo dòmè. Wo kpɔ yebe èse kudo ɖoɖo kèwo e sɔ na woa ji.

⁸Tɔhonɔ̀ miabe Mawu, wò tɔ̀ na wo. Wò hɛ̃ àdòdò ku wo, vɔ̀a wò biɔ wo woabe àgɔ̀jèjewo be èhlɔ̃.

⁹Mì lòlò Tɔhonɔ̀, mìabe Mawu a, mì jèɖɛ̀ na ɛ̀ lè yebe èto kɔ̀kɔ̀ɛa be ŋùkɔ̀. Ɖo Tɔhonɔ̀ miabe Mawu a lè kɔ̀kɔ̀ɛ.