Read gen Èlododowo 1 Bible Online

Èlododowo 1 - gen bible

Èlododowo 1

¹Izràɛl be èfìɔ Salomɔ̀n kè nyi èfìɔ David be èvia be èlododowo.

²Wo ŋlɔ̀ èlododo kèawo na àmèwo ne woa sɔ zɔ̃ kudo ènunya. Ne woa na ènufiɔfiɔ kudo kpàkpla àdodoe, eye woa gbà sè ènyàwo be gɔ̃mè kito-kito.

³Èlododo kèawo le fiɔ àlekè wo la wɔ̀ sɔ nɔ̀ àgbè kudo ènunya, la nɔ̀ jɔ̀jɔɛ, la wɔ̀ ɖo èse ji, la wɔ̀ ànùkua a.

⁴Wo la na àmè kèwo mu ɖo ènunya òa, la hɛ̃ àdòdò. Wo la fiɔ ènunya ɖèkajɛ ku tùgbɛ̀jɛwo eye wo la kpe ɖo woa ŋuti sɔ ɖèsusu.

⁵Ènunyatɔwo ŋutɔ cã la hlɛ̃ sɔ kpla ènu ɖe kòkòkò eye àmè ŋɔjè-ènumè kabawo cã la kpɔ ètopòɖo-nyawo.

⁶Wo la teŋu ŋɔjè èlododo ɖewo be gɔ̃mè sèse wawlawo mè, gbà nya ènu kè sɛ̃ŋu lè ènunyatɔwo be ènufiɔfiɔ mèa.

⁷Ènunya be gɔ̃mè jèje ye nyi Tɔhonɔ̀ be vɔ̃vɔ̃. Àmè kèwo mu sɔ ɖe lè ènunyatɔwo be ènufiɔfiɔ ku ètopòɖowo mè òa, nyi sùkunɔ̀wo.

⁸Èvi nyè, ɖoto ètɔ wò be àfɔ̀ ɖo àfɔ̀ ji na àmè be ènyàwo; mù gbà gbe ènɔ̀ wò be ènufiɔfiɔwo ò.

⁹Ɖo wo lè sìgbè jègbà lè àpo èta nène, àlo sìgbè èwlɔ lè èkɔ̀ na wò nène.

¹⁰Èvi nyè, ne àmè bàɖàwo le ji la kplɔ̀ wò ɖo èvuɛ̃ mèa, mù gbà lɔ̃ ò.

¹¹Wo la teŋu gblɔ̃ na wò be: “Va kplɔ̀ mi yì àfi kè, mia yì sò èmɔ̃ na àmèwo ne mia wù wo. Mì na mia yì xa àmè mà-nyã ɖewo lè àvò mè sɔ do jìjɔɛ na miabe èklawo.

¹²Mia sò wo lè àvò mè sìgbè èku nène. Mia mì wo àgbligbà sìgbè èyɔ̀ nène.

¹³Mi la kè ɖo àdɔ̀kùnu vòvòvòwo ŋuti eye mi la sɔ wo kɔ̀ ɖo miabe àxuewo mè.

¹⁴Va ne wò cã wòa kpɔ gomè lè ekèa mè. Ɖo ekèa la nyi mia kpata tɔ̀.”

¹⁵Èvi nyè, mù gbà kplɔ̀ wo do ò, si lè woabe èmɔ̃ ji.

¹⁶Ɖo ènu bàɖà wɔ̀wɔ gbe ye wo yì. Wo le pu dù la yì do àmè èku mè.

¹⁷Ne xèvi kpɔ xèviletɔa, mu la gbà teŋu jè yebe èmɔ̃ tetrea mè ò.

¹⁸Vɔ̀, àmè kèawo le tre èmɔ̃ na woa ŋutɔwo, eye woa ŋutɔ be àgbè ye wo le do ŋùklɛ̃ na.

¹⁹Nyàwo, àmè kèwo hlànà àmèwo be ènuwoa, wo hlànà woa ŋutɔ be àgbè.

²⁰Ènunya ŋutɔ to yì do àpa lè èmɔ̃wo to. E yì pò nupo ku ègbè lelele lè bɔ̀bɔ̀pewo.

²¹Àfikè àmè sùgbɔ lèa ye be ɖènà èxa ènyà lè. E dona àpa sɔ ɖènà gbèta yebe ènyà lè èdù be àgbowonu be:

²²“Mì àmè kèwo mu nyana ènu òa, kaka fikɛ ye mìabe ènu mànyaa la va sɛ̃tè ɖo ò? Mìa àmè kòtɔwo, mì la nɔ kò mù kaka va na gà kɛ mè ò? Mìa àmè kèwo mu sènà ènu gɔ̃mè òa, mìa gbe ènu gɔ̃mè sèse kaka va ɖo gà kɛ mè ò?

²³Mì ɖoto àpe ŋùmèkãnyawo. Nène a ye mù la ɖùɖù àpe gbɔ̃gbɔ̃a ɖo mìa ji eye mù la na mìa nya àpe ènyà.

²⁴Mù le yɔ mì eye mì ɖo e ŋuti be: “Ào, mi gbe”. Mù le biɔ ènu, vɔ̀ àmè ɖe mu kpɔ gbɔ nyè tètè ò.

²⁵Mì gbe àpe ètopòɖowo kpata eye àpe ŋùmèkãkãwo cã mu jɔ̀jì na mì ò.

²⁶Ekèa ŋuti ye ne mì lè jɔ̀gbèvuɛ̃ mèa, mù la kònu. Ne vɔ̃vɔ̃ jè mìa ji ye mì le pò tìtìtìa, mù la kò mì.

²⁷Ɛ̃ɛ, gbè ɖèkaa, vɔ̃vɔ̃ la jè mìa ji sìgbè àlekè èji-ya sɛ̃sɛ̃ pònàa nène. Jɔ̀gbèvuɛ̃ la kplɔ̀ mì yì sìgbè èjijàja sɛ̃sɛ̃ nène, àkpɔ̃ kudo ènuxàxa la jè mìa ji.

²⁸Nène a ye mì la do àpa yɔ mù, vɔ̀ nyè mu la ɖo e ŋuti na mì ò; Mì la ji mù, vɔ̀a, mì mu la kpɔ mù ò.

²⁹Ekèa la jɔ̀, ɖo mì gbe be yèwo mu la kpla àlekè wo nɔ̀nà àgbè ò, eye mì mu ji la do bùbu Tɔhonɔ̀ ŋuti ò.

³⁰Mì mu ji àpe ètopòɖowo ò. Eye mì crì àpe ŋùmèkãkãwo.

³¹Eŋuã, mì la dojì xɔ̀ mìabe àgbè nɔ̀nɔ be emèsonuwo. Ɖoɖo kèwo mì wɔ̀a, la tì mì.

³²Nyàwoa, ènu mànyatɔwo be ètamè sɛ̃sɛ̃ ye wùnà wo. Sùkunɔ̀wo be ètamè mà bu ye kplɔ̀nà wo yì cɔ̃crɔ̃ mè.

³³Vɔ̀a, àmè kè le ɖoto mù a, la nɔ̀ àgbè lè ètomè fàfa mè eye mu la vɔ̃ jɔ̀gbèvuɛ̃ ɖekpe ò.”