Read gen Èlododowo 11 Bible Online

Èlododowo 11 - gen bible

Èlododowo 11

¹Tɔhonɔ̀ crì àjè sìkelì, vɔ̀ e lɔ̃nà ènudànu jɔ̀jɔɛwo.

²Ègòyiyi hɛ̃nà cìcri vana, vɔ̀ ènunya nɔ̀nà àmè kè bɔ̀bɔ̀ ye ɖokoea si.

³Ànùkua kɔ̀nà àmè jɔ̀jɔɛ be wɔ̀nawo, eye ànùkua mà-wɔ̀ crɔ̃na àjèɖàtɔwo.

⁴Ne èku do ŋùmè ɖoɖaa, àdɔ̀kùnu mu gbà teŋu ɖona ŋusɛ̃ ɖekpe ò, vɔ̀ àgbè nɔ̀nɔ nyuɛ̃ ɖèka kpò ye teŋu hlùɛ̃ àmè lè èku si.

⁵Àgbènɔ̀nɔ nyuɛ̃ dànà àmè ɖo èmɔ̃ jɔ̀jɔɛ ji. Èkunyànyrã nana àmè bàɖàa jènà ànyi.

⁶Ànùkua be àgbènɔ̀nɔ nana vòvo àmè jɔ̀jɔɛwo. Vɔ̀ àjèɖàtɔwo jènà woabe èjro be èmɔ̃ tetrewo mè.

⁷Ne àmè bàɖàwo kua, woabe ŋùɖowo buna kudo wo, eye woabe jìdo ɖo àdɔ̀kùnuwo ji cã buna.

⁸Àmè kè le wɔ̀ nyuɛ̃a, àdìka mu sònà ɛ̀ ò. Vɔ̀ àmè kè le wɔ̀ èvuɛ̃a, ye àdìka sònà.

⁹Àmè bàɖàwo crɔ̃na àmèwo kudo woabe ènyàwo. Ènunyuɛ̃wɔ̀tɔwo kpɔna jiɖùɖu to woabe ènunyawo mè.

¹⁰Ne ènu le nyɔ na kplɔ̀tɔ nyuɛ̃woa, èdùa kpata nɔ̀nà jìjɔɛ mè. Eye ne kplɔ̀tɔ vuɛ̃ kua, wo dona jìjɔɛ be àpa.

¹¹To woabe ènyuɛ̃ wɔ̀wɔ jia, àmè jɔ̀jɔɛwo tùnà èdù. Vɔ̀ àmè bàɖà be nupo pòpo crɔ̃na èdù.

¹²Àmè kè crìnà àmèa mu ɖènà susu ò. Àmè nyanuwo lena woabe ènu.

¹³Àmè kè ɖànàjè ɖo àmè sia, mu wlana àmè bu be ènyà ò. Vɔ̀ àmè kè ŋuti ŋùmè kãkã ɖe mu lè òa, mu pònà nupo ò.

¹⁴Dùkɔ̃ kè wo mu le kplɔ̀ nyuɛ̃ ɖe òa, ɖota cɔ̃crɔ̃ mè. Topòɖotɔ sùgbɔ nana jiɖùɖu.

¹⁵Àmè kè lɔ̃nà dona ènu na àmèjroa, le dɔ̃ àhovì va ye ɖokoe ji. Eye àmè kè gbea, la nɔ̀ ètomè fàfa mè.

¹⁶Nyɔ̃nù kè jrànà ye ɖokoe ɖoa, xɔ̀nà bùbu; ŋusù kè jènà àgbàgba ŋutɔa, ɖona àdɔ̀kùnu.

¹⁷Àmè kèwo lɔ̃nà àmèa, wɔ̀nà nyuɛ̃ na woa nɔ̀nɔwo. Vɔ̀ àmè nyrãkua hɛ̃nà gbledo va na ye ɖokoe ji.

¹⁸Ènu bàɖàwɔ̀tɔ jènà àgbàgba gbalo. Vɔ̀ àmè kèwo wɔ̀nà ènyuɛ̃a, la xɔ̀ yebe àjɔ̀ godo.

¹⁹Àmè kè jro la wɔ̀ nyuɛ̃a, la nɔ̀ àgbè. Vɔ̀ àmè kè kplɔ̀ èvuɛ̃ wɔ̀wɔ do a, la crɔ̃ gbidi-gbidi.

²⁰Tɔhonɔ̀ crìnà àmè kè ɖo susu gɔ̃glɔ̃a, vɔ̀a e dànà àsi ɖo ànùkuamèwo be wɔ̀wɔ ji.

²¹Nyàwo be nyi be àmè kè le wɔ̀ èvuɛ̃a la xɔ̀ yebe ètodɔ̃, vɔ̀a àmè kè le wɔ̀ nyuɛ̃a mu la nya ènu kè nyi ètodɔ̃ ò.

²²Nyɔ̃nù sùkunɔ̀ be tùgbɛ̀jɛ jèje nɔ̀nà sìgbè èhã kè wo do sìka be àlɔ̀gàvi ŋɔ̀ti na a nène.

²³Nyuɛ̃wɔ̀tɔwo jina ènunyuɛ̃ gà sia gàmè. Eye àmè kè wɔ̀nà ènu bàɖà be fɛ̃tu ye nyi àdɔ̀mèze klìko.

²⁴Àmè ɖewo nana ènu sùgbɔ eye wo gbà ɖona àdɔ̀kùnu sùgbɔ ɖo e ji kpe è. Àmè kèwo zĩna àdɔ̀kùnu jia zũnà wɔ̀amènɔ̀wo.

²⁵Àdɔ̀mènyuɛ̃wɔ̀tɔ xɔ̀nà ènunana sùgbɔ. Àmè kè le na èsì àmèa cã kpɔna èsì nùnu so àmè gbɔ.

²⁶Dùkɔ̃a sɛ̃nakpɛ̃ na àmè kè le wla yebe nukuwoa. Vɔ̀a, àmè kè ɖè wo to le sàa, kpɔna sìtu xɔ̀nà.

²⁷Àmèwo lɔ̃nà àmè kè le ji la wɔ̀ ènyuɛ̃a, èvuɛ̃wɔ̀tɔ tɔ̀ ye nyi gbledo.

²⁸Àmè kè kãna ɖo yebe àdɔ̀kùnu jia, buna yebe ŋusɛ̃. Vɔ̀a àmè kè wɔ̀nà nyuɛ̃a, vũnà sìgbè àti do àmà nyuɛ̃ nène.

²⁹Àmè kè dona àjrè yebe xòmè mèa, le gbã xòmè kèa. Eye sùkunɔ̀wo la nyi ènunyatɔ be kluviwo.

³⁰Ènyuɛ̃wɔ̀tɔ lè sìgbè àti kè nana àgbèa nène. Àmè kè ɖo ènunyaa, bɔ̀nà àmè fuu.

³¹Ènyuɛ̃wɔ̀tɔ xɔ̀nà yebe àjɔ̀ lè ànyigbã ji. Nène a ke ye àmè vuɛ̃ kudo vuɛ̃wɔ̀tɔwo cã la xɔ̀ àjɔ̀ kè jè na woa yeŋu.