Read gen Èlododowo 12 Bible Online

Èlododowo 12 - gen bible

Èlododowo 12

¹Àmè kè lɔ̃nà ètopòɖoa jina la kpla ènu. Vɔ̀a, àmè kè crì ŋùmèkãkãa nyi sùkunɔ̀.

²Tɔhonɔ̀ dànàsi ɖo àmè nyuɛ̃ be wɔ̀nawo ji. Vɔ̀a, e gblenahùɛ do àmè kè le blè nɔ̀via.

³Àmè nyrãku mu linakè ò. Vɔ̀a, àmè nyuɛ̃ ɖona èkè sìgbè àti-su nène.

⁴Nyɔ̃nù kè ɖo àsìxɔ̀xɔa nyina jìjɔɛ na èsrɔ̃a. Vɔ̀a, nyɔ̃nù kè dona ŋùkpɛ̃ àmèa, lè sìgbè èdɔ̀ kè vovo ŋutilã kaka yì kè ɖo èpuwo ŋutia nène.

⁵Àmè nyuɛ̃ mu bùnà ènu bu sɔ wu be yèa wɔ̀ ɖo èse ji ò. Vɔ̀a, àmè kè ɖènà èvuɛ̃ be susua, blènà nɔ̀via.

⁶Àmè nyrãku be nupo pòpo nyi èmɔ̃tetre kèwo wùnà àmè. Vɔ̀a, àmè jɔ̀jɔɛwo be nupo ɖènà ègà àmè.

⁷Ne àmè nyrãku jè ànyi a mu gbà teŋu fɔ̃na ò. Vɔ̀a, àmè nyuɛ̃ be àxue linakè goŋu-goŋu.

⁸Wo pònà nupo nyuɛ̃ so àmè nyuɛ̃ ŋuti, vɔ̀a, wo crìnà susu kpòtoe ɖètɔwo.

⁹E nyɔ be woa nɔ̀ àgbè kudo sumɔ̃vi ɖèka lè ènu kè sù àmè sia be zãzã mè, sɔ wu be woa nɔ wɔ̀ gãglo vɔ̀ ne ènuɖùɖu bèa hiã lè àxomè.

¹⁰Àmè nyuɛ̃ nyana yebe èlãwo ŋutɔ cã be hiãhiãwo. Vɔ̀a, àmè nyrãkuwo mu kuna ŋuzĩzĩ ò.

¹¹Ènuɖùɖu bɔna lè àgblèdàtɔ be nɔ̀pe. Vɔ̀a, sùkunɔ̀ ye punadù kplɔ̀ ènu màɖè àlèwo do.

¹²Àmè nyrãkuwo jina àlè kpòtoe ɖùɖu, àmè nyuɛ̃ be vevedonu ye nana ɛ̀ àdɔ̀kùnu àdodoe.

¹³Àmè bàɖà ŋutɔ be ènyà mè ye wo gbà le na ɛ̀ lè. Vɔ̀a, àmè nyuɛ̃ tona lè èvuɛ̃ mè godo.

¹⁴Ènyà nana nyɔna sìgbè lekè èdɔwɔ̀wɔ nana fɛ̃tua nène.

¹⁵Sukunɔ̀a susuna be yè le wɔ̀ ènunyuɛ̃. Vɔ̀a, ènunyatɔa ɖona èto ètopòɖowo.

¹⁶Sùkunɔ̀ binajì kaba. Vɔ̀a, àmè ɖù ye ɖokoe ji wlana ŋùkpɛ̃nuwo.

¹⁷Àmè kè le to nyàwoa, le na ŋusɛ̃ jɔ̀jɔɛ sòso, vɔ̀a, àjèɖàtɔ le dɔ̃ ènu gbegble ji.

¹⁸Àmè kè gblɔ̃nà ènyà ɖekpekpe kpòa, dona àbì àmè ŋuti. Vɔ̀a, ènunya be nupo dànà èdɔ̀.

¹⁹Nyàwo mu gblena ò, àjèɖàɖa mu nɔ̀nà ànyi àɖàbà pòpo ɖèka ò.

²⁰Àmè kè jina la wɔ̀ èvuɛ̃a be èjìmè ɖɔ kudo èkunyànyrã. Vɔ̀a, àmè kèwo fiɔna ènu nyuɛ̃awo ɖɔna kudo jìjɔɛ.

²¹Ènu bàɖà ɖekpe mu jɔ̀nà ɖo ènu nyuɛ̃wɔ̀tɔ ji ò. Vɔ̀a, tùkaɖawo ye nɔ̀nà vuɛ̃wɔ̀tɔwo be nɔ̀pe.

²²Tɔhonɔ̀ crìnà àjèɖàtɔwo, vɔ̀a, e lɔ̃nà àmè kèwo tona nyàwoa.

²³Ènunyatɔ nyana àlekè wo lena ènu ɖoa. Vɔ̀a, hɔ̃via ɖènà yebe ŋùkpɛ̃a fiɔna.

²⁴Àmè kè le hlɔ̃ le èdɔwɔ̀wɔ mèa, la va trɔ zũ àmè gã bɔ̀bɔɛɖe, vɔ̀a kuviɔ̃tɔ la trɔ zũ sumɔ̃vi.

²⁵Tamèbùbuwo gbɔjɔna àmè, vɔ̀a, ènyà nyuɛ̃ nana jìjɔɛ.

²⁶Àmè nyuɛ̃ nyi èmɔ̃fiɔtɔ àdodoe, vɔ̀a, àmè nyrãkuwo buna èmɔ̃.

²⁷Kuviɔ̃tɔ kè yì àdègbea mu kpɔna èlã ɖekpe la mè ò. Vɔ̀a, èdɔwɔ̀tɔwo ɖona àdɔ̀kùnu.

²⁸Àgbèa lè jɔ̀jɔɛ sòso be èmɔ̃ ji. Àmè kè lè èmɔ̃ kèa jia, mu kuna ò.