Read gen Èlododowo 13 Bible Online

Èlododowo 13 - gen bible

Èlododowo 13

¹Èvi kè bùnà àmèa, ɖona èto ètɔa be ègbè. Vɔ̀a, èvi kè mu bùnà àmè òa, mu lɔ̃nà be woa gbe ènyà na yè ò.

²Àmè ɖekpekpe àmè teŋu kpɔ àlè so ye ŋutɔ be nupo pòpowo mè. Vɔ̀ ènudrãwɔ̀wɔ ye nɔ̀nà àmè bàɖàa be susu mè.

³Àmè kè lena ŋùku ɖo yebe nupo pòpowo ŋutia, hlùɛ̃nà yebe àgbè. Vɔ̀a, àmè kè pònà nupo vlàvlàvlàa, le crɔ̃ ye ɖokoe.

⁴Ènu jrona kuviɔ̃tɔ, vɔ̀a, mu jènà àgbàgba ɖekpe sɔ kènà ɖo ènua ŋuti ò. Vɔ̀a, àmè kèwo le xlɔ̃, le jè àgbàgbaa ye kènà ɖo ènuwo ŋuti.

⁵Àmè kè le wɔ̀ jɔ̀jɔɛa, crìnà àjèɖàɖa. Vɔ̀a, àmè kè le wɔ̀ ènu bàɖàa, dona ŋùkpɛ̃ àmèwo, zũnà wo.

⁶Ànùkua wɔ̀wɔ hlùɛ̃nà àmè kè le wɔ̀ ànùkua a. Vɔ̀a, ènu bàɖàwɔ̀wɔ crɔ̃na àmè kèwo le wɔ̀ ènu bàɖàawo.

⁷Àmè ɖewo kpɔna woa ɖokoe sìgbè àdɔ̀kùnɔ̀wo nène, vɔ̀a, wo mu ɖo ènu ɖekpe ò. Àmè buwo sɔ woa ɖokoe sɔ wɔ̀ wɔ̀amènɔ̀wo eye wo ɖo àdɔ̀kùnuwo drì.

⁸Gà ɖewo mèa, àdɔ̀kùnɔ̀ tuna èfɛ̃ sɔ nɔ̀nà àgbè. Vɔ̀a, wɔ̀amènɔ̀ ya mu hiã ɛ̀ ò.

⁹Àmè jɔ̀jɔɛ be wɔ̀nawo klɛ̃na sìgbè kãligbɛ̃ kè wo sũa nène. Vɔ̀a, àmè bàɖàwo lè sìgbè kãligbɛ̃ kè cia nène.

¹⁰Àjrè kpò ye àmè kèwo kɔna woa ɖokoe yì jia, wɔ̀nà. Vɔ̀a, àmè kèwo lɔ̃nà ètopòɖowoa, ɖona ènunya.

¹¹Àdɔ̀kùnu kè sù àmè si kpàtàa, mu nɔ̀nà ànyi ò. Àdɔ̀kùnu kè to so èpè sùgbɔ be àgbàgba jèje mèa, jìnà ɖo ji.

¹²Àmè kè lè ŋùɖo mè na ènu ɖe kè le ci ŋùgbea, gbɔjɔna. Vɔ̀a, ènujroàmè kè ŋuti wo kè ɖoa, nɔ̀nà sìgbè àti kè nana àgbèa nène.

¹³Àmè kè gbe ètopòɖoa kpɔna àfɔ̀ku. Vɔ̀a, àmè kè wɔ̀nà ɖo ègbè do àsi jia, fɔ̀nà màje.

¹⁴Ènunyatɔ be ènufiɔfiɔ nyi àgbè sìdo. Ènufiɔfiɔ kèa xena èmɔ̃ na ànyi jèje kèwo kplɔ̀nà àmè yì èku mèa.

¹⁵Àmè kè jina àmèwo be nyɔnaa, be ènu jɔ̀nàjì na àmè sia àmè. Vɔ̀a, àmèwo crìnà àmè bàɖàwo.

¹⁶Ènunyatɔ mu wɔ̀nà yebe ènuwo kpò ò. Vɔ̀a, àmè mànyanua, wɔ̀nà yebe ènuwo mà bù woa ŋuti kpɔ.

¹⁷Àŋɛ̀dotɔ bàɖà hɛ̃nà gbledo vana. Vɔ̀ àŋɛ̀dotɔ wɔ̀ ànùkua hɛ̃nà èdɔ̀dàdàa vana.

¹⁸Àmè kèwo gbe àfɔ̀ ɖo àfɔ̀ jia, la nyi wɔ̀amènɔ̀wo eye wo la crì wo. Vɔ̀a, àmè kèwo lɔ̃nà ŋùmèkãkãa, la kpɔ nyɔna.

¹⁹Jìjɔɛ tɔ̀hɛ ɖe nɔ̀nà èjro kè kpɔ e mè vavaa mè. Ye ŋuti àmè mànyanua, mu gbena ènu lè ènu bàɖàwɔ̀wɔ ŋuti ò.

²⁰Ne wò le zɔ̃ kudo ènunyatɔa, wò la ɖo ènunya. Ne wò le yì kudo ènu mànyatɔa, wò la kpɔ àfɔ̀ku.

²¹Gbledo kplɔ̀nà èvuɛ̃wɔ̀tɔ do. Vɔ̀a, nyɔna ye jènà àmè kèwo le wɔ̀ ènu nyuɛ̃a yomè.

²²Ènu nyuɛ̃wɔ̀tɔ jrànà ècrɔ̃nu ɖo ɖɛ na yebe jìjimèviwo, vɔ̀a, èvuɛ̃wɔ̀tɔ be àdɔ̀kùnuwo trɔna àmè jɔ̀jɔɛa tɔ̀.

²³Wɔ̀amènɔ̀ be àgblè kè wo lebè na nyuɛ̃ ɖe a, nana ènuɖùɖu sùgbɔ. Vɔ̀a, àmè mà-wɔ̀ ànùkua buna yebe ŋusɛ̃a vivivi.

²⁴Àmè kè mu gbena ènyà na èvia òa, mu ɖo lɔ̃lɔ̃ na ɖèvia ò. Vɔ̀a, àmè kè lɔ̃ èvia, gbena ènyà na ɛ̀.

²⁵Àmè kè le wɔ̀ ènyuɛ̃a, ɖona ènuɖùɖu lè gbɔsùsu mè. Vɔ̀a, àmè bàɖà be àxomè cina gbalo.