Read gen Èlododowo 15 Bible Online

Èlododowo 15 - gen bible

Èlododowo 15

¹Ènyà ŋuti ɖoɖo nyuɛ̃ nyànà àdɔ̀mèze jo, vɔ̀a, ègbè dà àmè hɛ̃nà àdɔ̀mèze va.

²Ènunyatɔ be ègbè dona àmè ŋusɛ̃ na ènukpakpla. Vɔ̀a, sùkunɔ̀ be nupòpo nyina èlãnu wɔ̀wɔ ɖèɖe.

³Tɔhonɔ̀ le kpɔ àmè sia àmè: àmè nyuɛ̃ kudo àmè vuɛ̃wo kpata.

⁴Ŋusɛ̃ doàmènya lè sìgbè àgbè be àti nène, vɔ̀a, ègejinyaa gbãnà èjì.

⁵Àmè mànyanu mu lɔ̃nà ètɔa be kpakpla ò. Vɔ̀a, àmè kè ɖonato ètɔa, ɖènà yebe ènunya fiɔ.

⁶Jìjɔɛ ku nyɔna nɔ̀nà àmè jɔ̀jɔɛ be àxomè, vɔ̀a, veve sèse ku kpɛ̃sɛ̃ ye nɔ̀nà àmè vuɛ̃ be àxomè.

⁷Ènunyatɔ be àɖe fiɔna ènu, vɔ̀a, mu lè nène lè sùkunɔ̀a gbɔ ò.

⁸Tɔhonɔ̀ ɖènàkɔ̀ lè àmè kè wɔ̀nà ènu bàɖàa be vɔsa ŋuti, vɔ̀a, e xɔ̀nà àmè kè wɔ̀nà ènu jɔ̀jɔɛa be kuefã.

⁹Tɔhonɔ̀ crìnà àmè kèwo nɔ̀nà àgbè kpòtoewo be ènyà gbɔ. Vɔ̀a, e lɔ̃nà àmè kè jina la wɔ̀ ènyuɛ̃a.

¹⁰Wo la dɔ̃to na àmè kè gbe nyàwo be èmɔ̃a sùsuiɖe. Àmè kè crìnà ŋùmèkãkãa, la ku.

¹¹Sìgbè àlekè Tɔhonɔ̀ nya èkuwode be gòglòpewoa, nènea ke e nya àgbètɔ be èjì mè cã yeŋu.

¹²Àmè kè kɔna ye ɖokoe yì jia, mu lɔ̃nà ŋùmèkãkã ò. Mu dona èha ku ènunyatɔwo ò.

¹³Àmè kè le kpɔ jìjɔɛa be ŋùmè vlũna, vɔ̀a, ŋuzĩzĩ nana àmè cina kpɔ̃.

¹⁴Àmè kè dènà ŋùgblèa, jina ènunya; vɔ̀a, sùkunɔ̀a lenabè na èlãnu wɔ̀wɔ.

¹⁵Ènuwɔ̀donɔ̀ be ŋùkèkèwo kpata nyina àɖukluiɖùɖu; vɔ̀a, ŋùkèkèwo kpata nyina jìjɔɛ be ŋùkèkèwo na àmè kè fɔ̀ ɖàgbèa.

¹⁶E la nyɔ be àmè bèa ɖo ènu kè jè na ɛ̀a eye bèa ɖo bùbu na Tɔhonɔ̀ sɔ wu be bèa nyi ècitɔ, co vɔ̀a, gbà nɔ sè veve.

¹⁷Ègbekui kè wo nyà nyuɛ̃ ɖe ku lɔ̃lɔ̃ a, vivi wu nyìlãdesi kè wo ɖà ku àdɔ̀mèzea.

¹⁸Àmè kè dona àdɔ̀mèze kabaa, wɔ̀nà àjrè; vɔ̀a, àmè kè hɛ̃nà àdòdòa, gbena ènyà.

¹⁹Kuviɔ̃tɔ be àfɔ̀tope ɖɔna kudo àŋùja. Àmè jɔ̀jɔɛwo be èmɔ̃wo zìɔ̃nà.

²⁰Èvi kè nyana ènua, dona jìjɔɛ na ètɔa. Vɔ̀a, sùkunɔ̀a, crìnà ènɔa.

²¹Àmè kè ènunya xùedoa, kpɔna jìjɔɛ lè yebe èlãnu wɔ̀wɔ mè. Vɔ̀a, àmè kè bùnà èta mèa, zɔ̃nà èmɔ̃ jɔ̀jɔɛ ji.

²²Ènu kè wo mu ɖo ègbè èdu sɔ wɔ̀ òa, mu nyɔna ò; vɔ̀a, ènu kè be wɔ̀wɔ mè ye ètopòɖo sùgbɔ lèa, zɔ̃nà sùu.

²³Ènyà-ɖoŋuti nyuɛ̃ nana jìjɔɛ; ènyà nyuɛ̃ kè wo gblɔ̃ ɖo àmè hùenua, jrànà ènu ɖo.

²⁴Ènunyatɔ nɔ̀nà àgbè be èmɔ̃ ji kpò. Mu jina la trã yì èmɔ̃ kè kplɔ̀nà àmè yì èku mèa ji ò.

²⁵Tɔhonɔ̀ crɔ̃na àmè kè yinagòa be àxue; vɔ̀a, e ɖiana àhòsì be àgblè.

²⁶Tɔhonɔ̀ crìnà susu bàɖà; vɔ̀a, susu nyuɛ̃ ɖèɖe jɔ̀nàjì na ɛ̀.

²⁷Àmè kè ègà jɔ̀nàjì na a, le hɛ̃ gbledo va yebe àgbè mè. Vɔ̀a, àmè kè mu lɔ̃nà àɖùflui-nu ɖùɖu òa, la nɔ̀ àgbè dìdì.

²⁸Àmè kè le nɔ̀ àgbè nyuɛ̃a, bùnà èta mè gbɔ̀xue pònà nupo. Vɔ̀a, àmè kè le nɔ̀ àgbè kpòtoea, pònà nupo mà-ɖo kɔpe.

²⁹Tɔhonɔ̀ ɖènàkɔ̀ lè àmè bàɖà ŋuti. Vɔ̀a, e ɖona èto àmè kè le wɔ̀ ènu nyuɛ̃a be kuefã.

³⁰Ŋùkumè kè vlũa, dona jìjɔɛ na àmè; àŋɛ̀ kè nyɔa, dona àmè ŋusɛ̃.

³¹Àmè kè ɖona èto àgbèa be ènufiɔfiɔwoa, kpɔna èmɔ̃ lè ènunyatɔwo dòmè.

³²Àmè kè gbe kpakpla xɔ̀xɔa, le ɖèkɔ̀ lè yebe àgbè ŋuti. Vɔ̀a, àmè kè lɔ̃nà ènyà gbegbe na àmèa, le jrà yebe èdɛ̃ ɖo.

³³Àmè kè le vɔ̃ Tɔhonɔ̀a, ɖo ènunya be kpakpla. Bɔ̀bɔɛ nyinyi mè ye gogo tona lè.