Read gen Èlododowo 16 Bible Online

Èlododowo 16 - gen bible

Èlododowo 16

¹Àgbètɔ wɔ̀nà ɖoɖo co vɔ̀, Tɔhonɔ̀ ye nana ɖoɖo kèa kpɔna e mè vava.

²Àgbètɔ be susuwo kpata jènà ŋùmè na ɛ̀; vɔ̀a, Tɔhonɔ̀ ye jrònà èjìwo kpata mè kpɔ.

³Sɔ àpo ɖoɖowo sɔ do àsi na Tɔhonɔ̀ eye wo la kpɔ e mè vava.

⁴Tɔhonɔ̀ ɖo ènuwo keŋu kudo susu tɔ̀hɛ ɖe. E ɖo àmè bàɖàwo ne bèa teŋu va dɔ̃to na wo.

⁵Tɔhonɔ̀ crì ègòyitɔwo; lè vɔ̀vɔnua, wo la dɔ̃to na wo godoo.

⁶Wo la tutu àmè kè le wɔ̀ ènyuɛ̃ gbà le wɔ̀ ànùkua be àgɔ̀jèjewo jo. Àmè kè le vɔ̃ Tɔhonɔ̀a, la na àsà èvuɛ̃.

⁷Ne Tɔhonɔ̀ dà àsi ɖo àmè ɖe be wɔ̀na jia, e nana kaka be àmèa kudo yebe kɛ̃tɔwo trɔnazũ èxlɔ̃wo.

⁸Ènu viɖe kè sù àmè si lè nyàwo toto mèa, nyɔ wu àdɔ̀kùnu sùgbɔ kèwo wo tafu àmè sɔ ɖoa.

⁹Àgbètɔ jina yebe èmɔ̃; vɔ̀a, Tɔhonɔ̀ ye jɔ̀nà yebe àfɔ̀wo.

¹⁰Èfìɔ ɖona Mawu ŋutɔ be ègbè. Mu ɖànà àjè lè kòjoɖoɖo mè ò.

¹¹Tɔhonɔ̀ tɔ̀wo ye nyi sìkelì ku àgbã gbɛjɛ dànu kèwo sɔ̀gbèa. Eye ye ŋutɔ ye ɖo sìkelì be ènu dànuwo.

¹²Èfìɔwo crìnà ènu bàɖà wɔ̀wɔ. Nyàwo, ne wo le wɔ̀ ènu nyuɛ̃a, woabe èfìɔɖùɖu linakè.

¹³Èfìɔ lɔ̃nà àmè kè le pò nupo kudo kãkãɖoji a be ènyà gbɔ. Àmè kè tona nyàwoa, be ènu dona jìjɔɛ na ɛ̀.

¹⁴Èfìɔ kè le bijìa, teŋu do àmè èku. Àmè ènunyatɔa la teŋu fa ɛ̀.

¹⁵Ne èfìɔ lè jìjɔɛ mèa, àgbè nɔ̀nà ènu sia ènu mè. Yebe àdɔ̀mè nyuɛ̃a nɔ̀nà sìgbè àgbè be gbawɛ nène.

¹⁶Ènunya ɖoɖo nyɔ wu sìka ɖoɖo. Woa ɖo ènunyaa, ɖè àlè wu klòsalò ɖoɖo.

¹⁷Àmè kèwo wɔ̀nà jɔ̀jɔɛa, nana àsà ènu bàɖà. Àmè kè le le ŋùku ɖo yebe àgbè ŋutia, le hlùɛ̃ yebe àgbè.

¹⁸Ègòyiyi nana ènu bàɖà sùgbɔ, àmè cìcri nana ànyi jèje.

¹⁹E nyɔ be woa nɔ̀ àgbè lè ŋuti fàfa mè kudo wɔ̀amènɔ̀wo; sɔ wu be woa yì nɔ hlà àmɔ̀nyɔ̀nuwo kudo ègòyitɔwo.

²⁰Àmè kè dèŋùgblè so ènu ŋuti gbɔ̀xuea, ɖona àkɔ̃ŋùta nyuɛ̃. Àmè kè kãna ɖo Tɔhonɔ̀ jia, kpɔna sìtu.

²¹Àmè kè le ɖokòjo kudo ènunyaa, ɖo ènunya. Nupo nyapòpoa, bɔ̀nà àmèwo be susu wɔ̀ ɖèka.

²²Susu nyuɛ̃ ɖèɖe nyi àgbè sìdo na àmè kè le ɖèa. Sùkunɔ̀a, kpɔna ètodɔ̃ so yebe èlãnu wɔ̀wɔ mè.

²³Ènunyatɔ bùnà èta mè nyuɛ̃ ɖe gbɔ̀xue pònà nupo. Nène a, yebe ègbè la vivi àmèwo nu.

²⁴Ènyà vivi nɔ̀nà sìgbè ànyisì nène. E gbɔ̀nà àgbè èjì eye e nana ŋutilãa xayana.

²⁵Àmè ɖe teŋu susu be yebe wɔ̀naa nyɔ. Co, lè nyàwo toto mèa, wɔ̀na kèa bòhũ ye le kplɔ̀ ɛ̀ yì èku mè.

²⁶Pòdo ye nana èdɔwɔ̀tɔ jènà àgbàgba kpe è. Ɖo àdɔ̀wùàmè la nɔ tùtù ì.

²⁷Àmè kè mu ɖo àsìxɔ̀xɔ ɖekpe òa, ye ɖènà ènu bàɖà be susu. Yebe nupo nɔ̀nà sìgbè èzò kè le fiɔ̃ ènua nène.

²⁸Àjèɖàtɔ dona àjrè àmèwo dòmè. Àmè kè le gblɔ̃ àmè be ènyàa, hɛ̃nà mamã va èxlɔ̃wo dòmè.

²⁹Àmè jèagla blènà ye havi. E kplɔ̀nà ɛ̀ ɖo èmɔ̃ bùblu ji.

³⁰Àmè kè le jràɖo na ènu bàɖà ɖe be wɔ̀wɔ eye e miɔ̃ ŋùkuviwo, kpe àɖuwoa, àmèa wɔ̀ nène be ènu bàɖàa xoxo vɔ̀.

³¹Àgbè dìdì ye nyi àjɔ̀ àdodoea. Àmè kè wɔ̀nà nyuɛ̃a, ye xɔ̀nà ɛ̀.

³²Àmè kè mu dona àdòmèze òa, nyɔ wu kãlìsu. Àmè kè ɖù ye ɖokoe jia, nyɔ wu àhùaga.

³³Ne wo gbà dà èxòci sɔ biɔ ènu gɔ̃mè sè cã a, Tɔhonɔ̀ ɖèka kpò ye nana ènu sia ènu.