Read gen Èlododowo 17 Bible Online

Èlododowo 17 - gen bible

Èlododowo 17

¹Ètomè fàfa tèpe kè kpɔ̃nɔ pupu kpò ye lèa, nyɔ wu àjrè be àxue kè mè ènuɖùɖu bɔ lèa.

²Sumɔvi kè ɖo ènunyaa xɔ̀nà èvi kè le do ŋùkpɛ̃ àmèa be tèpe. Eye lè xòmè mèa, sumɔ̃via la xɔ̀ ècrɔ̃nu.

³Wo sɔna èzò sɔ dona sìka kudo klòsalò be àsìxɔ̀xɔ kpɔ; vɔ̀a, Tɔhonɔ̀ ye jrònà àgbètɔ be èjì mè kpɔ.

⁴Àmè kè le wɔ̀ ènu bàɖàa, ènyà kpòtoe sèse jɔ̀nàjì na ɛ̀. Eye àjèɖàtɔ ɖona èto ènyà gbegble.

⁵Àmè kè le kò wɔ̀amènɔ̀a, le zũ Ɖotɔ a. Ètodɔ̃ la va àmè kè le kpɔ jìjɔɛ ɖo àmèwo be gbledo ŋutia ji.

⁶Tɔgbe kpɔna jìjɔɛ so tɔgbeyɔvia ŋuti, eye èvi kpɔna jìjɔɛ so yebe àjìtɔwo ŋuti.

⁷Ènupo nya pòpo mu jènà sùkunɔ̀ ò, nènea ke ye àjèɖàɖa mu jènà ŋùkɔ̀nɔ̀tɔ cã ò.

⁸Ènu nana nyi nyɔna be àgbo na àmè kè le ji la na ènua. Àmèa susuna be e la hũ àgbowo kpata na yè.

⁹Àmè kè sɔna àgɔ̀jèje kènà a, la ɖo èxlɔ̃ sùgbɔ. Vɔ̀a, àmè kè ɖona ŋùku àmèwo be àgɔ̀jèje ji gà sia gàmèa, la bu yebe èxlɔ̃wo.

¹⁰Ŋùmèkãkã ɖèka sù la wɔ̀ èdɔ lè àmè kè ɖo ènunyaa mè wu èkpò fuu dodona sùkunɔ̀.

¹¹Ènu bàɖà wɔ̀wɔ kpò ye jɔ̀nàjì na àmè bàɖà. Nène a, e le hɛ̃ gbledo va ye ŋutɔ ɖokoe ji.

¹²E la nyɔ be woa dogò sisiblìsi kè si wo xɔ̀ èviawo lèa, sɔ wu be woa dogò sùkunɔ̀ kè ɖɔ kudo èlãnu wɔ̀wɔa.

¹³Àmè kè le wɔ̀ èvuɛ̃ ɖo ènyuɛ̃ tèpea be àxuedo la nɔ̀ gbledo mè.

¹⁴Ènudɔ̃dɔ̃ hɛ̃nà èdù be àjrè vana. Le ɖokoe wò kaba gbɔ̀xue àjrè gãa bèa jɔ̀.

¹⁵Tɔhonɔ̀ crìnà àmè kè do àmè mà-nyã ɖe èku mèa kudo àmè kè do àlìlɔ na àmè kè jè àgɔ̀a kpata.

¹⁶Nukɛ ye sùkunɔ̀ a la sɔ ègà sɔ wɔ̀ ò? E la teŋu sɔ plè ènunyã à? Gbèɖe! Yebe susu mu sùtè funu ò.

¹⁷Èxlɔ̃ ɖènà yebe lɔ̃lɔ̃ fiɔ lè ènu sia ènu mè. Vɔ̀a, àmè nɔ̀vi ye hànànu kudo àmè.

¹⁸Àmè kè mu lè nyuɛ̃ ɖe òa kpò ye teŋu ɖè gblɔ̃ be èyè ye ɖùfɛ̃ kè àmè bu ɖù a.

¹⁹Àmè kè lɔ̃nà ènyà dɔ̃dɔ̃a, lɔ̃ ènuvuɛ̃; eye ègòyitɔa pu dù le yì cɔ̃crɔ̃ mè.

²⁰Àmè kè àyè gɛdɛ na a, mu la kpɔ nyɔna ò. Àmè kè gblɔ̃nà àmè be ènyà vuɛ̃ a, la kpɔ gbledo.

²¹Àmè kè jì èvi kè àyè ku na a, mu la vò ò, eye ɖèvi kè ètagbɔ gble na a be ètɔa, mu la kpɔ jìjɔɛ ò.

²²Èjì kè xayaa la teŋu dà èdɔ̀. Vɔ̀a, àkpɔ̃ nana wo gũna ŋusɛ̃.

²³Àmè mà-wɔ̀ ànùkua ye lɔ̃nà xɔ̀nà ènunana lè wawla mè ne èse mu gbà va kù ì ò.

²⁴Àmè nyanu jina ènunya kè sɔ̀ àlɔ̀sɔpe na ɛ̀a. Àmè kè ètagbɔ gble na a be susu nɔ̀nà ènu kèwo wo mu la teŋu wɔ̀ òa ji.

²⁵Sumɔvi kè àyè ku na a, nyina tùkaɖa na ètɔa, eye yebe ènu wɔ̀nà ŋuzĩzĩ na ènɔa kè jì ìa.

²⁶Mu sɔ̀gbè be woa dɔ̃to na àmè kè mu nya èɖèe ò. Eye jɔ̀jɔɛ sòso mu na èmɔ̃ be woa pò àmè kè ɖo bùbua ò.

²⁷Àmè kè nya ènupo pòpoa, ɖènà yebe àɖàŋù fiɔ. Àmè kè lena ye ɖokoea, ɖo ènunya.

²⁸Ɛ̃ɛ, ènunyaa mu zena lè ègòta ò, vɔ̀a, ènupo pòpo kudo wɔ̀na mè ye e zena lè. Sùkunɔ̀ kè mu le pò nupo òa, teŋu ze ènunyatɔ. Ne mu gbe ɖè yebe ènu mànya fiɔ ò kpòa, wo la teŋu sɔ ɛ̀ sìgbè àmè kè ɖo ènunyaa nène.