Read gen Èlododowo 18 Bible Online

Èlododowo 18 - gen bible

Èlododowo 18

¹Àmè kè le ji ye ŋutɔ ɖèka be nyɔnaa, mu teŋu nɔ̀nà àmè dòmè ò. E dona àdɔ̀mèze ɖo àmè kè le ji la do è àlɔ̀a ŋuti.

²Ènu kè jɔ̀nàjì na sùkunɔ̀a ye nyi be woa xɔ̀ yebe ènyàa sɔ wu be woa sè yebe ènyàa gɔ̃mè.

³Èku nyànyrã hɛ̃nà àmè cìcri vana eye èzũ hɛ̃nà ŋùkpɛ̃ vana.

⁴Àgbètɔ be ènyà ɖo gòglòpewo sìgbè àpù tɔ̀ nène. E jina sìgbè èsì kè ɖɔna nène vɔ̀a, e nyi ènunya be èsìdo.

⁵Mu nyi ènu nyuɛ̃ ɖe be nyi be woa nɔ xɔ̀ ènyà ɖo àgɔ̀jètɔ ta vɔ̀a, nɔ zĩ è ɖemànyatɔa ɖo e mè ò.

⁶Sùkunɔ̀ be ènyàwo hɛ̃nà ènyàdɔ̃dɔ̃ vana. Yebe ènupo pòpowo nana èwui kudo èkpò dàda.

⁷Ènumànyatɔ be ènyàwo kplɔ̀nà ɛ̀ yì cɔ̃crɔ̃ mè. Ye ŋutɔ be ènu kpò ye gbà nyina èmɔ̃ kè mè e la jèa.

⁸Àjèɖàɖa ɖo àmè si vivina sìgbè ènumèɖènu nène. E ɖona kaka àkpà mè na àmè.

⁹Àmè kè ɖènàkɔ̀ lè yebe èdɔ do àsi ŋuti kudo àmè kè le gble èdɔ do àsia, wo nyi ènɔ̀ ɖèka be èviwo.

¹⁰Tɔhonɔ̀ ɖo ŋusɛ̃ kè tɔ̃nà èkpa do àmè sìgbè àgbògbò nène. Àmè kè le wɔ̀ ènu nyuɛ̃a, kpɔna àgbɔ̃jèpò lè e gbɔ.

¹¹Àdɔ̀kùnu ye nyi ècitɔ be àgbɔ̃jèpò. E hena èmɔ̃ na ènuwo na ɛ̀ sìgbè èglìkpa kpò nène.

¹²Àmè be ègòyiyi kplɔ̀nà ɛ̀ yì cɔ̃crɔ̃ mè. Àmè kè wɔ̀ ye ɖokoe sumɔ̃via, ye wo nana gogo.

¹³Àmè kè ɖona ènyà ŋuti gbɔ̀xue ɖonato ènyàbiɔsèa, le ɖè yebe èlãnyinyi fiɔ eye e dona ŋùkpɛ̃ ye ɖokoe.

¹⁴Jìdodo ye kpena ɖo èdɔ̀nɔ̀ ŋuti. Vɔ̀a, ne èdɔ̀nɔ̀a bu jìdodoa ɖe, nukɛ ye la teŋu le è ɖotè ò?

¹⁵Àmè kè ɖo ènunyaa, jina la kpla ènu kpe è; ènunyatɔ ɖona èto ènufiɔfiɔ àdodoewo.

¹⁶Ènu nana hũnà àgbo sùgbɔ eye e wɔ̀nà be ènunatɔa donagò àmè kɔsùwo.

¹⁷Àmè kè pò nupo cucugbã lè kòjoɖopea, wɔ̀nà sìgbè yebe ènyà jɔ̀ nène. Vɔ̀a, ne àmè kè ŋuti e sɔ ènyà ɖo vaa, yebe ènyàwo sinatè ɖo ènyà kè ye ŋutɔ gblɔ̃ va yìa ŋuti.

¹⁸Ne woa gbe ènyà lè àmè cãcã mèa, wo dànà ègà sɔ sònà ènyà.

¹⁹E sɛ̃sɛ̃na ŋutɔ ne woa dogò kudo nɔ̀vi kè ji wo jè àgɔ̀ lèa, wu be woa yì xɔ̀ èdù ɖe kè ye àgbògbò trɔdoa. Ènyàdɔ̃dɔ̃wo tuna èjì kpikpikpi sìgbè èdù ɖe be àgbo kè wo do lɔkè na a nène.

²⁰Àmè teŋu kpɔ yebe ènuɖùɖu so yebe ènyàwo gbɔ̃gblɔ̃ mè. E teŋu nɔ̀ àgbè to yebe ènyà nya-gbɔ̃gblɔ̃ mè.

²¹Ènyà teŋu na èku àlo àgbè. Àmè kè ènupo pòpo vivina na a, ɖo la nɔ tɔtè kpɔ ye mè sonuwo cã.

²²Àmèkè kè ɖo yebe àsì ŋutia, fɔ̀ nyɔna. Tɔhonɔ̀ ye na ɛ̀ ènu kèa.

²³Wɔ̀amènɔ̀ pònà nupo to kukuɖèɖe mè, vɔ̀a, ècitɔ ya ɖona ènyà ŋuti kudo ŋusɛ̃.

²⁴Èhavi sùgbɔ ɖoɖo hɛ̃nà gbledo vana na àmè. Vɔ̀a, èxlɔ̃ àdodoe wɔ̀nà ànùkua sìgbè nɔ̀vi nène.