Read gen Èlododowo 2 Bible Online

Èlododowo 2 - gen bible

Èlododowo 2

¹Èvi nyè, ɖoto àpe ènyàwo, le àpe ègbè do àsiwo mè ɖo àsi.

²Ɖoto ènunya be ènufiɔ-àmè ne wòa ji ènu gɔ̃mè sèse.

³Ɛ̃ɛ, biɔ ènunya ne bèa kpe ɖo ŋuti wò, yɔ ènyà jɔ̀jɔɛ ne bèa do wò àlɔ̀.

⁴Ji ènunya sìgbè àlekè wo jina ègàa nène. Ji ì kudo àɖàŋù sìgbè àlekè wo jina àdɔ̀kùnu a nène.

⁵Ne wò wɔ̀ ènu kèawo kpataa, wò la sè bùbu ɖoɖo na Tɔhonɔ̀ be gɔ̃mè eye wò la nya Mawu.

⁶Ɛ̃ɛ, Tɔhonɔ̀ ye nana ènunya, ènugɔ̃mè kùku kudo ènunya so e gbɔ.

⁷E kpena ɖo àmè jɔ̀jɔɛwo ŋuti. E nyina àkpoxɔ̀nu na àmè kèwo wɔ̀nà ànùkua a.

⁸E lenabè na àmè kèwo dona bùbu èsewo ŋutia. E lena ŋùku ɖo yebe èxlɔ̃ ànùkuamèwo be èmɔ̃wo ŋuti.

⁹Ne wò ɖoto mù a, wò la nya ekèa be: jɔ̀jɔɛ, èse ji wɔ̀wɔ ku ànùkua wɔ̀wɔ kplɔ̀nà àmè yì jɔ̀gbè nyuɛ̃ mè.

¹⁰Ènunya la gɛ̃ ɖo àpo èjì mè eye wò la ɖɔ ènunya kpɔ ku jìjɔɛ.

¹¹Ŋùgblèdède ne cɔ̃ ji wò eye ènunya ne kpɔ ji wò.

¹²Wo la kplɔ̀ wò ne mù gbà jè èvuɛ̃ mè ò. Wo la ɖè wò to lè àjèɖàtɔwo dòmè,

¹³lè àmè kèwo gbe èmɔ̃ jɔ̀jɔɛa toto eye wo ke ɖo èmɔ̃ vuɛ̃ a ŋuti.

¹⁴Àmè kèawo nɔ̀nà jìjɔɛ mè sɔ wɔ̀nà èvuɛ̃, wo kpɔna jìjɔɛ lè woabe èhlɔ̃ dãdãwo mè.

¹⁵Wo mu tona nyàwo ò eye woabe wɔ̀nawo nyi ènu gɔ̃glɔ̃.

¹⁶Nène a ye wò la gbe ènu lè nyɔ̃nù àhasìwɔ̀tɔ ŋuti, la glo àmèjro nyɔ̃nù ènumèvivitɔa be èmɔ̃ tetrea.

¹⁷Àmèjro kèa gbe yebe èxlɔ̃ tùgbɛ̀jɛmètɔ̀a, nènea, e gble zòɖùɖu kè lè ye ku Mawu dòmèa.

¹⁸Yebe zɔ̃zɔ̃ le kplɔ̀ ɛ̀ yì cɔ̃crɔ̃ mè. Eye yebe wɔ̀nàawo le ɖiɖi ì yì kaka èkuwode.

¹⁹Àmè kèwo kpata le yì e gbɔawo mu la gbà trɔ gbɔ̀ gbèɖe ò. Wo mu la gbà trɔ kpɔ àgbè be èmɔ̃a ò.

²⁰Eŋuã, sɔ àmè nyuɛ̃wo be èmɔ̃, srɔ̃ àmè kèwo le wɔ̀ ènyuɛ̃a.

²¹Nyàwo, àmè jɔ̀jɔɛwo la nɔ̀ ànyigbã a ji, àmè kèwo ŋuti ènyà ɖekpe mu kù ɖo òa kpò ye la nɔ̀ funua.

²²Vɔ̀, wo ɖo la ɖè àmè vuɛ̃wo jo, àmè kèwo mu tona nyàwo òa, la jo lè ànyigbã a ji.