Read gen Èlododowo 20 Bible Online

Èlododowo 20 - gen bible

Èlododowo 20

¹Vɛ̃ nana àmè kè nù ìa, mu sɔna èɖe lè e mè na àmè ò. Àhà sɛ̃sɛ̃ nana àmè kè nù ìa, wɔ̀nà tùkaɖa. Àmè kè nùnà àhà mà-ɖo kɔpea, mu nyi ènunyatɔ ò.

²Èfìɔ kè bijìa, nɔ̀nà sìgbè jãŋùta kè le do àpa a nène. Àmè kè gbà le do àdɔ̀mèze na èfìɔa le sɔ ye ŋutɔ be àgbè do àfɔ̀ku mè.

³Bùbu tɔ̀xɛ ye nɔ̀nà àmè kè le na àsà ènyà dɔ̃dɔ̃ mà-ɖo kɔpea ŋuti. Vɔ̀a, àmè kè àyè ku na a, bina èjì kaba.

⁴Kuviɔ̃tɔ mu jina la dè àgblè lè hùenu nyuɛ̃tɔa mè ò. Lè ènuyàya hùenua, mu la kpɔ ènuku ɖekpe la yà ò.

⁵Àgbètɔ be tamèsusuwo lè sìgbè èsì kè lè ànyigbã gɔ̃mèa nène. Àmè kè ɖo ènunya kpò ye teŋu kè ɖo woa ŋuti.

⁶Àmè sùgbɔ susuna be yèwo nyɔ. Vɔ̀a, ànùkuamè kè lè ègbèjia, fikɛ ye wo la kpɔ ɛ̀ lè ò?

⁷Àmè kè wɔ̀nà ènunyuɛ̃a, nɔ̀nà àgbè ànùkua tɔ̀. Eye ènu nyɔna na yebe jìjimèviwo.

⁸Ne èfìɔ ɖe nɔ̀ ànyi ɖo kòjoɖopea, e kpɔna ènu kè mu sɔ̀gbè òa, zè ɖèka.

⁹Àmè kɛ ye la teŋu gblɔ̃ be: “Èjì mu le dohùɛ do mù ò, ɖo èvuɛ̃ ɖekpe mu lè ŋuti nyè ò?”

¹⁰Tɔhonɔ̀ crìnà àmè tafu-tafu to sìkelì (ènu-dànu) zãzã mè.

¹¹Vifɛ̃ ŋutɔ cã ɖènà yebe àgbè nyuɛ̃ nɔ̀nɔ fiɔ to yebe wɔ̀nawo mè.

¹²Tɔhonɔ̀ kpò ye wɔ̀ èto kè sènà ènua kudo ŋùku kè kpɔna ènua kpata.

¹³Àmè kè dɔ̃na àlɔ̃ mà-ɖo kɔpea jènà èhiã mè. Bìa ŋùku, ji àpo ènuɖùɖu.

¹⁴Ènuplètɔ gblɔ̃nà be: “E xɔ̀ èci ŋutɔ!” Vɔ̀a, ne e plè è jo le yìa, e kpɔna jìjɔɛ so ènu kè be plèa ŋuti.

¹⁵Sìka mu dɛ̃ ò eye jònu xɔ̀asìwo cã bɔ, vɔ̀a, ènu kè xɔ̀ àsì wu woa kpata ye nyi ènufiɔàmè be ènyàwo.

¹⁶Ne àmè ɖe nɔ̀ ŋùkɔ̀ na àmèjro ɖe sɔ do ègàjìga lè àsi wòa, ne sɔ yebe ènu ɖe sɔ do àwòba gbɔ̀xue. Ɖo wò mu jèsi àmèjroa ò.

¹⁷Èfĩnu ɖùɖu vivina, vɔ̀a, e yomè a e va vlɛ̀nà ènu na àmè.

¹⁸Àmè kè lɔ̃nà ètopòɖoa be ènu zɔ̃nà sùu. Gbɔ̀xue wò la sɔ ènu ɖe be yèa wɔ̀a, bù e ŋuti kpɔ nyuɛ̃ ɖe.

¹⁹Àmè kè gblɔ̃nà àmè be ènyà pòxlaa, mu la teŋu wla àmè gɔ̃mè ò. Na àsà àmè kè pònà nupo màgbɔ̃jɛ̃a.

²⁰Àmè kè le sɛ̃kpɛ̃ na ètɔa kudo ènɔa be àgbè mè mu nyɔna ò (Àmè kè le gblɔ̃ ènyà kpòtoe so yebe àjìtɔawo ŋutia, la kpɔ gbledo). Yebe àgbè be vɔ̀vɔnua la nɔ̀ sìgbè kãligbɛ̃ cici lè vìvìti mè nène.

²¹Àdɔ̀kùnu kè sù àmè si àgbàgba fu ɖe màjèa, mu dɔ̃na àmè ji kaka yìnà vɔ̀vɔnu ò.

²²Mù gbà gblɔ̃ be: “Mù la ɖo èvuɛ̃ èvuɛ̃ tèpe ò.” Sɔ àpo èjìdodo dà ɖo Tɔhonɔ̀ ji, eye e la hlùɛ̃ wò gã.

²³Tɔhonɔ̀ crìnà àjè be ènudànuwo. Mu nyɔ be woa nɔ zã sìkelì kè wo sɔ tafuna àmè ò.

²⁴Tɔhonɔ̀ ŋutɔ ye kpɔna àmè be àgbè ji. Eŋuã àmè ɖekpe mu teŋu nya yebe àgbèa be vɔ̀vɔnu ò.

²⁵Woa do ènunana be ŋùgbè na Tɔhonɔ̀ mà dà ɛ̀ kpɔ, àlo woa kã àtãŋu gbɔ̀xue woa va bù e ŋuti kpɔa, hɛ̃nà àfɔ̀ku vana.

²⁶Èfìɔ ènunyatɔa jènasi àmè kè le wɔ̀ ènu bàɖàa, eye e crɔ̃na ɛ̀ godoo.

²⁷Èjìjigbè nyi kãligbɛ̃ kè Tɔhonɔ̀ sɔ do àgbètɔ mè ne bèa nɔ kɔ̀ yebe èjìmè.

²⁸Ànùkua àlo ègbèji nɔ̀nɔ kudo àdɔ̀mè nyuɛ̃ wɔ̀wɔ ye kpɔna èfìɔ ji. Àdɔ̀mènyuɛ̃ wɔ̀wɔ nana yebe ŋusɛ̃ linakè.

²⁹Ŋusɛ̃ nɔ̀ àmè ŋuti ye dona jìjɔɛ na ɖèkajɛ ku tùgbɛ̀jɛwo. Vɔ̀ èɖà ɣewo ye nana àmè sĩsĩwo nyana kpɔna.

³⁰Àbì jèje ɖe teŋu klɔ èvuɛ̃ jo. Eye èkpò àlo àlɔ̀kpo teŋu lè èjì be gòglòpe ɖì.