Read gen Èlododowo 21 Bible Online

Èlododowo 21 - gen bible

Èlododowo 21

¹Èfìɔ be èjì lè sìgbè ètɔ̀ sàsra lè Tɔhonɔ̀ be àlɔ̀ mè nène. E ye nana be yìnà fikè e jro be bèa yìa.

²Àmè sia àmè susuna be yebe wɔ̀nawo lè jɔ̀jɔɛ, vɔ̀a, Tɔhonɔ̀ ɖèka kpò ye nya àmè be èjì mè be susu.

³Ànùkua wɔ̀wɔ kudo àgbè nɔ̀nɔ jɔ̀jɔɛ jènà Tɔhonɔ̀ be ŋùmè wu vɔ̀sawo.

⁴Àmè bàɖà be vuɛ̃wo nyi àmè cìcri kudo ègòyiyi.

⁵Àmè kè wɔ̀nà ɖoɖowoa, trɔnazũ ècitɔ. Àmè kè cinajia trɔnazũ wɔ̀amènɔ̀.

⁶Àmè kèwo kpɔna èci to àjèɖàɖa mèa, ɖota woabe cɔ̃crɔ̃ mè. Wo kènà ɖo ènu kèwo mu ɖo àsìxɔ̀xɔ ò, eye wo mu dɔ̃na òa ŋuti.

⁷Àmè bàɖàwo crɔ̃ ɖo woabe èhlɔ̃ dãdãwo ŋuti. Nyàwo, wo mu wɔ̀nà ɖo èse ji ò.

⁸Gbèvũ nɔ̀nà àgbè kpòtoe, vɔ̀a, àmè wɔ̀ ànùkua, nɔ̀nà àgbè jɔ̀jɔɛ.

⁹E la nyɔ be woa nɔ̀ ci ègbã ji wu be woa nɔ̀ àxomè kudo nyɔ̃nù kè wɔ̀nà àjrè gbà lɔ̃nà èkɛ̃a.

¹⁰Àmè nyrãku jro wɔ̀nà ènu bàɖà, mu kpɔna ɖo e mè na ye ŋutɔ be xlɔ̃ cã ò.

¹¹Àmèkòtɔ be ètodɔ̃ ye nyina sùkunɔ̀ be ènunya fiɔfiɔ. Ne wo le fiɔ ènu ènunyatɔa, e sɔ wɔ̀nà èdɔ.

¹²Ènunyuɛ̃wɔ̀tɔ lena ŋùku ɖo àmè nyrãku be àxue ŋuti eye e tùtùnà wo ɖo gbledo mè.

¹³Àmè kè le tu yebe èto do àmè kè jè gbledo mèa, cã mu la kpɔ àlɔ̀do ne e va jè èhiã mè ò.

¹⁴Àmè kè le na ènu lè wawla mèa le fa àmè kè le bijìa. Ne e ɖiɖi ènunanaa ɖo yebe ègo mèa, e la ci yebe àdɔ̀mèze be èzòa.

¹⁵Èse ji kpɔkpɔ nyina jìjɔɛ na àmè nyuɛ̃wo. Vɔ̀a, e dona ŋɔji na àmè kèwo wɔ̀nà ènu bàɖàwo.

¹⁶Àmè kè mu lè èmɔ̃ nyuɛ̃a ji òa, kènà ɖo èkuwode ŋuti kaba.

¹⁷Àmè kè àgɔɖùɖu jɔ̀nàjì na a, la nyi wɔ̀amènɔ̀ tɛ̀gbɛ̀. Àmè kè àhà nùnu kudo ènuɖùɖu jɔ̀nàjì na a, mu la kpɔ èci gbèɖe ò.

¹⁸Àjèɖàtɔwo tɔ̀ ye nyi gbledo lè àmè kèwo nɔ̀nà àgbè nyuɛ̃, jɔ̀jɔɛa gbɔ.

¹⁹E la nyɔ be woa yì sò ci zògbè ji sɔ wu be woa nɔ̀ àxomè kudo nyɔ̃nù nyrãku kè lɔ̃nà àjrèwɔ̀wɔa.

²⁰Wo kènà ɖo àdɔ̀kùnu àdodoewo ŋuti lè ènunyatɔ gbɔ, vɔ̀a, àyèkukutɔ mu ɖona ènu nɔ̀ àmè si ɖekpe ò.

²¹Ànùkuamè kè kplɔ̀ àdɔ̀mè nyuɛ̃ wɔ̀wɔ do a, nɔ̀nà àgbè dìdì. Eye wo ɖona bùbu na ɛ̀ gbà sònà jɔ̀jɔɛ na ɛ̀.

²²Gbãdãgbã ènunyatɔ teŋu xɔ̀ èdù kè àgbògbò trɔ do a. E teŋu gbã èglì kèwo ŋuti dùkɔ̃a le dojì ɖoa.

²³Àmè kè lena yebe ènua, le si na gbledo.

²⁴Ènu ɖe mu ɖìnà ènu na ègòyitɔ kè crìnà àmè ò. Yebe ègòyiyia tɔna ŋùku lè yebe ènuwɔ̀wɔwo mè.

²⁵Àdɔ̀ wùnà kuviɔ̃tɔwo kaka wo kuna ɖo wo mu teŋu wɔ̀ ɖo woabe èjrowo ji ò. Nyàwo ye nyi be wo mu jina ènu ɖe la wɔ̀ ò.

²⁶Wo zãna woabe gàmè sɔ bìanàŋù àmèwo. Vɔ̀a, àmè nyuɛ̃ nana fàa eye mu wlana ènu ɖekpe na ye ɖokoe ò.

²⁷Àmè nyrãku be vɔsa wɔ̀nà àfɛ̃. Vɔ̀a, kè be gbà le wɔ̀ kudo susu vuɛ̃ a, gbà nyrã wu.

²⁸Àjè ɖaseɖùtɔ kuna, vɔ̀a, àmè kè nya àlekè wo ɖonatoa, ɖo èmɔ̃nu kpɔkpɔ la pò nupo.

²⁹Ènu bàɖàwɔ̀tɔ wɔ̀nà sìgbè ènu kè be le wɔ̀a, sɔ̀gbè nène. Vɔ̀a, àmè jɔ̀jɔɛ zãna àgbènɔ̀nɔ nyuɛ̃.

³⁰Àgbètɔ be ènunya àlo ènunya àlo ŋùgblèdède ɖekpe mu sɔ̀gbè lè Tɔhonɔ̀ be ŋùkɔ̀ ò.

³¹Wo blana àkpà na èsɔwo ɖo àhùawɔ̀wɔ be ŋùkèkè ŋuti, vɔ̀a, Tɔhonɔ̀ ye nana jiɖùɖua.