Read gen Èlododowo 22 Bible Online

Èlododowo 22 - gen bible

Èlododowo 22

¹Nyikɔ nyuɛ̃ xɔ̀xɔ nyɔ wu èci kpɔkpɔ drì. Lɔ̃lɔ̃ ɖoɖo na àmè havi nyɔ wu sìka kudo klòsalò.

²Ènu ɖèka kè bɔ̀ ècitɔ kudo wɔ̀amènɔ̀ ɖodua ye nyi be Tɔhonɔ̀ na wo àgbè.

³Ne gbledo do ŋùmè ɖoɖaa, àmè kè mu punadù jè ènu mè òa, nyana àlekè wo la wɔ̀ ɖù e jia. Vɔ̀a, àmè kè mu kpɔ ènu ɖe be tèpe kpɔ òa, kpɔ̀tɔ̀ nɔ̀nà woabe ènu kè wo le wɔ̀a ji, eye e va hɛ̃nà àhovì va na wo.

⁴Àmè kè wɔ̀ ye ɖokoe ɖèvia, dona bùbu Tɔhonɔ̀ ŋuti. E va trɔnazũ ècitɔ, bùbu nɔ̀nà e ŋuti eye e nɔ̀nà àgbè dìdì.

⁵Èzãnuɖùtɔ be èmɔ̃ ɖɔna ku àŋùja kudo èmɔ̃ tetrewo. Àmè kè ji be yèa hlùɛ̃ yebe àgbè lè àjèɖàɖa mèa, la bu ì.

⁶Na èvi kpakpla nyuɛ̃ so gɔ̃mèjèje ke. E la kpɔ e ji kaka na yebe sĩsĩ mè.

⁷Ècitɔ tafuna wɔ̀amènɔ̀. Àmè kè ɖùfɛ̃a trɔnazũ èkluvi na àmè kè si e ɖùfɛ̃ lèa.

⁸Àmè kè le dɔ̃ màjɔ̀ màjɔ jia, la kpɔ hùɛgbledo; eye ènu bàɖà kè ji be le dɔ̃a, mu la teŋu nɔ̀ ànyi ò.

⁹Sìtuɖèɖe ye la nyi na àdɔ̀mè nyuɛ̃ wɔ̀tɔwo, ɖo wo le kpɔ wɔ̀amènɔ̀wo ji.

¹⁰Ɛ̃ɛ, nyà àmè kè le ɖì ègbɔ ènu sia ènua eye ènyà dɔ̃dɔ̃wo kpata la tɔtè. Eye àjrè kudo àmèzũzũ ɖekpe mu la gbà nɔ̀ ànyi ò.

¹¹Àmè kè lɔ̃nà àmè kè ɖo èjì mè kɔ̀kɔ̀ɛ eye be wɔ̀nà àdɔ̀mè nyuɛ̃a, nyina èfìɔ be èxlɔ̃.

¹²Tɔhonɔ̀ ŋutɔ ɖiana ènunya àdodoea, vɔ̀ e crɔ̃na àjèɖàtɔ be ènyà gbɔ̃gblɔ̃wo kpata.

¹³Kuviɔ̃tɔ gblɔ̃nà be: “Jãŋùta ɖe lè xixeanu. Ne mù toa, e la trɛ̃ mù lè àmèwo be ŋùku mè!”

¹⁴Nyɔ̃nù àhasìwɔ̀tɔwo be nupo pòpo nyi àfɔ̀ku be èmɔ̃ tetre. Àmè kèwo Tɔhonɔ̀ crìa, jènà èmɔ̃ kèa mè.

¹⁵Ɖèviwo lɔ̃nà ènu kè flùnà àmèa. Èkpò kpò ye la teŋu ɖè wo jo lè èvuɛ̃ kèa gbɔ.

¹⁶Àmè kè to màjɔ̀ màjɔ ji le tafu wɔ̀amènɔ̀a, le na ɛ̀ mɔnu kpɔkpɔ yeye bu. Àmè kè le na ènu àdɔ̀kùnɔ̀a, la trɔ zũ wɔ̀amènɔ̀.

¹⁷Ɖoto ènunyatɔwo be ènyà nyuɛ̃ ɖe, le ŋùku ɖo àpe àɖàŋù be nufiɔfiɔwo ŋuti.

¹⁸E la nyi jìjɔɛ na wò ne wò le wo ɖo àpo èjì mèa, ne wò sɔ̀gbè la nɔ pò nupo so woa ŋutia.

¹⁹Mù jro be wòa sɔ àpo èjìdo ɖo Tɔhonɔ̀ ji. Ènu kèa ŋuti ye egbèa, mù la fiɔ èwò cã ènyà kèawo.

²⁰Mù ɖè ènyàti kudo ŋùgblèdède ègbã ɖovò na wò.

²¹Ne wòa sɔ kpla àlekè wo pònà nupo kudo èjìɖèɖe tututua. Na àmè kè le dɔ̃ wòa, wò la nyi ànùkua-tikplɔtɔ.

²²Mù gbà fĩ wɔ̀amènɔ̀ ɖo e nyi wɔ̀amènɔ̀ ò. Lè kòjoɖopea, mù gbà zĩ àmè mà-ɖo xɔ̀namètɔa, ɖo ànyi ò.

²³Nyàwo, Tɔhonɔ̀ ŋutɔ la xɔ̀ ènyà ɖo àkɔ na wo. E la xɔ̀ àgbè lè àmè kè hlà woabe ènuwoa si.

²⁴Mù gbà nyi àmè kè dona àdɔ̀mèzea be èxlɔ̃ ò. Mù gbà zɔ̃ kudo àmè kè bina èjì kabaa ò.

²⁵Mu nyi nène òa, wò la va ɖì ì eye wò cã wò la jè èmɔ̃a mè.

²⁶Mù gbà xɔ̀ àmè bu be èfɛ̃ be ŋùkɔ̀ ò.

²⁷Ne wò mu va teŋu tu nène be èfɛ̃ òa, wo la xɔ̀ àpo ènu zãzãwo kpata, kaka jè àbàti kè ji wò le mlɔ̃ a ŋutɔ cã ji.

²⁸Mù gbà yì ɖè lipò kèwo tɔgbe wòwo ɖo ànyi sãa na mìabe ànyigbãwo jo ò.

²⁹Kpɔ àmè kè le wɔ̀ èdɔ nyuɛ̃ ɖe a ɖa, e la teŋu yì wɔ̀ èdɔ na èfìɔ fàa, wu ne bèa nɔ̀ èdɔwɔ̀tɔ bu kèwo àmè ɖe mu jèsi òa mè.