Read gen Èlododowo 23 Bible Online

Èlododowo 23 - gen bible

Èlododowo 23

¹Ne wò lè èkplɔ̃ ŋuti kudo àmè ɖìnyi ɖe a, kpɔ ɖokoe wò ji lè àmè kè lè ŋùkɔ̀ na wòa ŋuti.

²Ne nusuɖùtɔ ye wò nyia, le ɖokoe wò.

³Mù gbà vlũ pòdo ɖo àmè kèa be ènuɖùɖu àdodoewo ŋuti ò, wo la teŋu nyi èmɔ̃ tetre na wò.

⁴Mù gbà nɔ hlɔ̃ be yèa kpɔ èci ò, nɔ̀tè ètamè bùbu so ekèa ŋuti.

⁵Ne wò dà ŋùku kpɔ àdɔ̀kùnua, e sina zè ɖèka! E nya lekè wo zrònà sìgbè èhɔ̃ nène.

⁶Mù gbà ɖùnu lè àmè kè ɖo ŋuhuã ɖo nɔ̀via ŋutia gbɔ ò, yebe ènuɖùɖu mu gbà jro wò ò.

⁷Ènu kè be le susua, mu nyi nyàwo ò. E la gblɔ̃ na wò be “Ɖù ne wòa nù!” Vɔ̀a, mu le gblɔ̃ ɛ̀ so kaka yebe àdɔ̀mè ò.

⁸E yomè a, wò la trɔ jo ènu kè wò ɖù a na, eye vivi do àmè ŋuti wòa mu la gbà ɖo gɔ̃mè sèse ɖe ò.

⁹Mù gbà gblɔ̃ ènyà ɖekpe na sùkunɔ̀ ò: e la crì àpo ènyà jɔ̀jɔɛwo.

¹⁰Mù gbà ɖè àgblè be lipò be èkpewo jo sɔ hlà cɔɛviwo be ànyigbãwo ò.

¹¹Nyàwo, woabe ɖiatɔa ɖo ŋusɛ̃: e la xɔ̀ ènyà ɖo woa ta lè ŋùkɔ̀ na wò.

¹²Na àpo èjì ne xɔ̀ àfɔ̀ ɖo àfɔ̀ ji kè wo le na wòa, eye wòa ɖoto ètopòɖo kè ènunyatɔ le gblɔ̃ na wòa.

¹³Mù gbà si èvi wòa kpakpla ò. Ne wò pò èa, mu la ku ò!

¹⁴Co ne wò le pò èa, wò le hlùɛ̃ ɛ̀ lè èku si bòxũ ye.

¹⁵Èvi nyè, mù la kpɔ jìjɔɛ, ne àpo èjì le ji ènunya be èmɔ̃a.

¹⁶Èjì la jɔ̀ mù, ne wò le to nyàwoa.

¹⁷Mù gbà ɖo ŋuhuã na èvuɛ̃wɔ̀tɔ ò, vɔ̀ do bùbu Tɔhonɔ̀ ŋuti gbè sia gbè.

¹⁸Nène a, èsɔ̀ mè la nyɔ na wò, eye àpo ŋùɖo mu la gble ò.

¹⁹Èwò, èvi nyè ɖoto mù ne wòa trɔ zũ ènunyatɔ. Wò la zɔ̃ èmɔ̃ jɔ̀jɔɛa ji.

²⁰Mù gbà do èha kudo àmè kè nùnà vɛ̃ kaka munaa ò. Àlo àmè kè èlãɖùɖu jɔ̀nàjì na ŋutɔ ò.

²¹Àhànùmunɔ̀wo kudo àmè kèwo ɖùnà èlã sùgbɔa, la ci àyà mè. Woabe kuviɔ̃ wɔ̀wɔ la na be wo la ci àma.

²²Ɖoto ètɔ wò, e na wò va xixea mè. Mù gbà crì ènɔ̀ wò, wàlɛbɛ kè e la va ku nyagã ò.

²³Kpla àgbè nɔ̀nɔ lè nyàwo toto mè, kpla àlekè wo dènà ŋùgblè so ènu ŋutia, lɔ̃ ènufiɔfiɔ nyuɛ̃a kudo ènunya. Eye ne wò ɖo ènunana kèawoa, mù gbà zã wo yàkà yàkà ò.

²⁴Ɖèvi kè le wɔ̀ ènu nyuɛ̃a, dona jìjɔɛ nana ètɔa. Eye nyɔ̃nù kè jì ènunyatɔa, nɔ̀nà jìjɔɛ mè.

²⁵Èwò, do jìjɔɛ kèa na ètɔ wò kudo ènɔ̀ wò. Nyɔ̃nù kè jì wòa ne ɖu jìjɔɛ be èwè.

²⁶Èvi nyè, dojì ɖo ŋuti nyè ne wòa kplɔ̀ àpe kpɔwɛ do kudo jìjɔɛ.

²⁷Ɛ̃ɛ, nyɔ̃nù àhasìwɔ̀tɔ vuɛ̃ɖì wu ègũ tito, eye àmè bu be èsrɔ̃ nyɔ̃nù la do àfɔ̀ku àmè sìgbè vudo kè mu kèkè òa nène.

²⁸Sìgbè gbevũwo nènea, nyɔ̃nù kèawo trena èmɔ̃ na àmèwo. Wo na èsrɔ̃tɔ ŋusù sùgbɔ jè ànyi.

²⁹Àmè kɛ ye nyi ènuwɔ̀donɔ̀ ò? Àmè kɛ ye le gblɔ̃ be ne yè nya sã ò? Àmè kɛ ye le wɔ̀ àjrè eye be le xà ènu ètèmàtɔ ò? Àmè kɛ be ŋùkuwo mu le kpɔ ènu nyuɛ̃ ɖe ò?

³⁰Àhànùmunɔ̀ kè cakana àhà sɛ̃sɛ̃wo nùnà, mà-ɖo kɔpea ye!

³¹Mù gbà kpɔ vɛ̃ ne e le dàzò àlo e le sɔfu lè kɔpò wòa mè ò. E la yì ènu mè na wò bɔ̀bɔɛɖe.

³²Vɔ̀ lè vɔ̀vɔnua, e la ɖù wò sìgbè èdã nène, e la ŋɔ wò sìgbè jàkpàtà nène.

³³Wò la kpɔ ènu mànyatanawo eye wò la gblɔ̃ ènyà mà-ɖotawo.

³⁴Wò la susu be yè lè àpù be dòdò mè, lè ànyi mɔmlɔ̃ lè àpùjihũ be àsike gbɔ.

³⁵Wò la nɔ gblɔ̃ be: “Wo vìa mù co, àfi ɖekpe mu ve mù ò! Wo pò mù co, nyè mu sè vève ɖe ò! Mù ji be ma fɔ̃ kaba ne ma gbà ji àhà nùnu be èmɔ̃ nu.”