Read gen Èlododowo 24 Bible Online

Èlododowo 24 - gen bible

Èlododowo 24

¹Àmè nyrãkuwo be ènu mu gbà nɔ bìaŋù na wò ò, mù gbà ji gbèɖe la zɔ̃ èmɔ̃ ku wo ò.

²Nyàwo ènu gbegble be èta mè kpò wo bùnà, eye ènu bàɖà kè wo la wɔ̀a kpò be ènyà ye wo gblɔ̃nà.

³Ku bìbi wo teŋu tù èxɔ̀, eye wo la na be la likè ku ènunya.

⁴Ku àɖàŋù ye wo pònà tɛ ènu xɔ̀asì nyakpɔkpɔwo ɖo èxɔ̀ mè.

⁵Ènunyatɔ ɖo ŋusɛ̃, ne e gbà nyanu dè èdùa, eŋuã, e la gbà ɖo ŋusɛ̃ zè èvè kpe è.

⁶Nène a, wɔ̀ àkɔ̃ŋùta nyuɛ̃ ɖe gbɔ̀xue ne wòa so yì àhùa. Topòɖo sùgbɔ nana èjiɖùɖu.

⁷Sùkunɔ̀ mu la teŋu kè ɖo ènunya ŋuti ò. Ekèa ŋuti ye mu ɖo la kè ènu ne wo le gblɔ̃ èdù be ènyàa ò.

⁸Wo yɔna àmè kè ɖènà ènu bàɖà wɔ̀wɔ be àɖàŋùa be èdrãwɔ̀tɔ.

⁹Sùkunɔ̀ be ɖoɖowo kpata hɛ̃nà ènu bàɖà vana godo, eye àmè kè crìnà àmèa, donavlo ènu ɖekpekpe.

¹⁰Ne wò gbɔjɔ lè àzã kè gbè ènuwo kpata lè bàsàa, eŋuã ŋusɛ̃ vɔ̀ na wò keŋu-keŋu nyàwo!

¹¹Tukà na àmè kè wo sò èkufiɔ na, hlùɛ̃ àmè kè wo kplɔ̀ yì wùwùgbe kunùtɔ̀a gã.

¹²Èta mu nyɔ òa, wò la gblɔ̃ be: “Nyè mu nya ènu ɖekpe ò!” Vɔ̀ àmè kè nya èjìwo kpataa, nya nyàwoa. E le le ŋùku ɖo ŋuti wò, e nya ènu ɖekpekpe, e la ɖo ènu kè àmè sia àmè wɔ̀a tèpe na ɛ̀.

¹³Èvi nyè, nù ànyisi ɖo e nyɔ na wò, eye e la vivi lè ènu mè na wò.

¹⁴Wò ɖo la nya be nène ke e nyi na ènunya yeŋu. Ne e sù àsi wòa, èsɔ̀mè la nyɔ na wò eye wò mu la ɖù ŋùkpɛ̃ lè ènu kè wò le nɔ̀tè kpɔa ŋuti ò.

¹⁵Àmè nyrãku, mù gbà nɔ ɖè susu vuɛ̃ ɖo àmè kè le wɔ̀ ènyuɛ̃a be àxuedo ŋuti ne wòa yì xa yebe nɔ̀pe ò.

¹⁶Ne àmè kè le wɔ̀ ènyuɛ̃a jè ànyi zè adrɛ̃ cã a, e la sitè godo. Vɔ̀a, èdrãwɔ̀tɔ be ànyi jèpe mu nyana kpɔ ò.

¹⁷Mù gbà kpɔ jìjɔɛ ne kɛ̃tɔ wò jè ànyi ò, mù gbà ɖuwè ne ènu jɔ̀ ɖo e ji ò.

¹⁸Mu nyi nène òa, Tɔhonɔ̀ teŋu kpɔ ɛ̀ be mu nyɔ ne yèa gbà dɔ̃to na ɛ̀ ò.

¹⁹Mù gbà nɔ bijì do àmè kè le wɔ̀ ènuvuɛ̃a ò eye mù gbà hùãnu àmè nyrãku cã ò.

²⁰Èsɔ̀mè mu lè àmè kè le wɔ̀ ènu drã si ò eye yebe àgbè cã lè sìgbè kãligbɛ̃ kè le cia nène.

²¹Èvi nyè, do bùbu Tɔhonɔ̀ ku èfìɔ ŋuti. Mù gbà nɔ gogo àmè kè le ji la trɔ ènu sia ènu ò.

²²Nyàwo ye be nyi be àmè kèa la teŋu crɔ̃ lè àɖàbà pòpo ɖèka mè. Gbà wua, wò mu nya gbledo kè Tɔhonɔ̀ kudo èfìɔ la teŋu na be la va e ji ò.

²³Ɖoto ènunyatɔ be ètopòɖo buwo: Mù gbà nɔ do vòvòtoto àmèwo dòmè lè kòjoɖoɖo mè ò.

²⁴Ne kòjoɖotɔ gblɔ̃ na àmè kè jè àgɔ̀a be: “Wò mu nya èɖe òa”, àmèhaa sɛ̃nakpɛ̃ na kòjoɖotɔ ŋua, eye dùkɔ̃a crìnà ɛ̀.

²⁵Vɔ̀a, ne mu nyi nène òa, àmè kèwo le dohùɛa kpɔna jìjɔɛ eye wo biɔna Mawu be sìtu kudo nyɔna na kòjoɖotɔa.

²⁶Lɔ̃lɔ̃ be ɖèɖèfiɔ ye nyi ènyà ŋuti ɖoɖo ku èjìɖèɖe.

²⁷Wò teŋu bù èsrɔ̃ ɖèɖe be ètamè ne e nyi be wò jrà èsɔ̀mè ɖo vɔ̀a. E yomè a, wò teŋu sò àxue la ɖè èsrɔ̃.

²⁸Mù gbà sò àgɔ̀ na àpo havi mà-ɖo gɔ̃mè sèse ò. Àlo àjè ye wò le ji la ɖàa?

²⁹Mù gbà gblɔ̃ be: “Mù la wɔ̀ kudo è sìgbè àlekè be wɔ̀ kudo mù a nène, mù la trɔ ènu kè be wɔ̀ ku mù a na ɛ̀ ò”.

³⁰Gbè ɖèkaa, mù yì to kuviɔ̃tɔ ɖe be àgblè gbɔ, ŋusù màdojì ɖe be vɛ̃-gble gbɔ.

³¹Ègbe to ɖo àgblèa kpata mè, àŋùja vũ cɔ̃ vɛ̃kawo kaka be wɔ̀ sìgbè èglìkpa kè mù cɔ̃ ànyi a nène.

³²Mù bùtamè so ènu kè mù kpɔa ŋuti eye mù kè ɖo ekèa ŋuti be:

³³Ne wò le dɔ̃ àlɔ̃, àlo wò miɔ̃ ŋùku viɖe eye wò mlɔ̃ ànyi ènu ɖe mà-wɔ̀a,

³⁴wàlɛbɛ ŋua, èhiã la va zɛ̃ wò sìgbè èsàɖìtɔ nène, èhiã jèje la va xa wò le àvòmè sìgbè àxuegbãtɔ nène.